ការប្រកួតនៅទីលានបាល់ទាត់ EDC មានភាពតានតឹងជាខ្លាំង ដោយម្ចាស់ផ្ទះ អគ្គិសនីកម្ពុជា មិនបានបង្ហាញកម្រិតប្រកួតខុសគ្នាប៉ុន្មានទេ សម្រាប់ជើងទី១នេះ។ ព្រះខ័នរាជ ស្វាយរៀង បាននាំមុខ ១-០នៅតង់ទី១ ដោយកីឡាករ សឿយ វិសាល តែតបាល់បញ្ចូលទី ក្រោយពីមិត្តរួមក្រុម ទាត់បាល់ជ្រុង។ ចូលដល់តង់ទី២ នាទី៨៥ ក្រុមម្ចាស់ផ្ទះ ទទួលបានបាល់ពិន័យ១១ម៉ែត្រ ក្រោយពីក្រុមភ្ញៀវបង្ករកំហុងក្នុងតំបន់គ្រោះថ្នាក់។ កីឡាករ ចន្ថា ចន្ធាការ របស់អគ្គិសនីកម្ពុជា រ៉ា​ប់រងបាល់ពិន័យ ដោយស៊ុតបញ្ចូលទីដោយជោគជ័យ នាំឲ្យលទ្ធ១-១។
បញ្ចប់ការប្រកួត អគ្គិសនីកម្ពុជា ស្មើជាមួយ ព្រះខ័នរាជ ស្វាយរៀង ១-១។
 

លោក ទុំ សារ៉ាយ គ្រូបង្វឹកអគ្គិសនីកម្ពុជា បានប្រាប់សារព័ត៌មានថ្មីៗថា ក្រុមព្រះខ័នរាជស្វាយរៀង ជាក្រុមដ៏ល្អនៅលីគកំពូល ហើយការងារជាក្រុមរបស់ក្រុមនេះ គឺល្អ។ «យើង បានធ្វើការធ្ងន់សម្រាប់ការប្រកួតនេះ ដោយព្រះខ័នរាជស្វាយរៀង នាំមុខមុន ហើយចូលដល់តង់ទី២ ក្រុមអគ្គិសនីកម្ពុជា បានព្យាយាមធ្វើយ៉ាងមិចទាត់បញ្ចូលទីឲ្យបាន។ នេះ គឺជាលទ្ធផលល្អមួយ ដោយចុងម៉ោងយើងអាចតាមស្មើ ១គ្រាប់វិញ។»។
 

នៅថ្ងៃជាមួយគ្នានេះ ម្ចាស់ផ្ទះ កីឡដ្ឋាន Smart RSN នៅតែមិនអាចយកជ័យជម្នះលើក្រុម ណាហ្គាវើលដ៍ ដោយបញ្ចប់ការប្រកួត បានត្រឹមលទ្ធផល 0-0។ ​ចំណែកនៅទឹកដីកោះកុង ក្រុមភ្ញៀវបឹងកេត ឈ្នះ ម្ចាស់ផ្ទះ កោះកុងអេហ្វស៊ី លទ្ធផល២-០ និង នៅកីឡដ្ឋានស្តាតចាស់ កងយោធពលខេមរភូមិន្ទ ចាញ់ វិសាខា ក្នុងលទ្ធផល១-៣។ ការប្រកួតសម្រាប់ជើងទី២ នឹងធ្វើនៅថ្ងៃទី៣១ ខែសីហា ឆ្នាំ២០២២៕