ក្រោយដំណើរទស្សនកិច្ចរបស់ប្រធានសភាតំណាងអាម៉េរិក លោកស្រីណាន់ស៊ី ផេឡូស៊ី ទៅកោះតៃវ៉ាន់នៅដើមខែសីហាកន្លងទៅ ចិនបានធ្វើសមយុទ្ធយោធាជាញឹកញាប់នៅជុំវិញដែនទឹក និងដែនអាកាសកោះមួយនេះ។ ស្របគ្នានេះ កោះតៃវ៉ាន់ក៏បានធ្វើសមយុទ្ធ ដើម្បីពង្រឹងសមត្ថភាពយោធាខ្លួនដែរ។

 

ស្របពេលមានការគំរាមកំហែងពីសំណាក់ចិន រដ្ឋាភិបាលកោះតៃវ៉ាន់ នៅថ្ងៃទី២៥ ខែសីហា បានដាក់ស្នើសំណើបង្កើនថវិកាជាតិសម្រាប់ផ្នែកយោធាចំនួន ១៣.៩ ភាគរយ ដោយមានទំហំការចំណាយលើយោធាចំនួន ១៩,៤១ ពាន់លានដុល្លារក្នុងឆ្នាំ២០២៣។ សំណើនេះមានកំណត់ត្រាខ្ពស់បំផុតពីសំណើកន្លងមក ហើយវាអាចអនុវត្ដបានលុះត្រាតែសភាតៃវ៉ាន់អនុម័ត។ នេះគឺជាឆ្នាំទីប្រាំមួយជាប់ៗគ្នាសម្រាប់ កំណើននៃការចំណាយលើវិស័យការពារជាតិតៃវ៉ាន់ ចាប់តាំងពីឆ្នាំ២០១៧មក។

 

ក្នុងទំហំថវិកាទាំងនោះ វារួមបញ្ចូលថវិកាប្រមាណ៣,៥ពាន់លានដុល្លារ សម្រាប់ចំណាយលើយន្តហោះចម្បាំង គ្រឿងបរិក្ខារយោធាផ្សេងៗ និងមូលនិធិពិសេសរបស់ក្រសួងការពារជាតិ។ កាលពីឆ្នាំមុនក្រុងតៃប៉ិ បានប្រកាសការចំណាយលើផ្នែកការពារជាតិត្រឹមតែចំនួន​ ៨.៦៩ពាន់លានដុល្លារត្រឹមឆ្នាំ​២០២៦ ​ដោយការចំណាយភាគច្រើនលើសព្វាវុធ​កងទ័ពជើងទឹក មីស៊ីល និង​នាវាចម្បាំង​

 

សូមបញ្ជាក់ថា ចិន នៅក្នុងខែមីនា​ កន្លងទៅ បានប្រកាសចំណាយថវិកាលើយោធាសម្រាប់ឆ្នាំនេះ ក្នុងទំហំ ២១១ពាន់លានដុល្លារ៕