អន្តរជាតិ
ប្រមុខសិទ្ធិមនុស្ស UN ថា កំពុងស្ថិតក្រោមសម្ពាធខ្លាំងជុំវិញរបាយការណ៍ស្ថានភាពសិទ្ធិមនុស្សនៅស៊ីនជាំង ស្នងការអង្គការសហប្រជាជាតិទទួលបន្ទុកសិទ្ធិមនុស្ស Michelle Bachelet ។ រូបថត Xinhua
× ស្នងការសិទ្ធិមនុស្សរបស់អង្គការសហប្រជាជាតិ Michelle Bachelet អះអាងថា លោកស្រីកំពុងរងសម្ពាធយ៉ាងខ្លាំងថា ត្រូវឬមិនត្រូវចេញផ្សាយរបាយការណ៍ស្ដីពីស្ថានភាពសិទ្ធិមនុស្សនៅតំបន់ស៊ីនជាំង ទីដែលមនុស្សជាង១លាននាក់ត្រូវជឿថា ជាប់ឃុំខ្លួន។ ការចេញផ្សាយរបាយការណ៍នេះ ត្រូវបានពន្យារពេលជាយូរមកហើយបន្ទាប់ពីលោកស្រីទៅបំពេញទស្សនកិច្ចនៅស៊ីនជាំង។
ចាប់តាំងពីបំពេញទស្សនកិច្ចនៅចិននៅខែឧសភាមក លោកស្រី Michelle Bachelet បាននិយាយម្តងហើយម្តងទៀតថា នឹងចេញរបាយការណ៍ស្តីពីស្ថានភាពសិទ្ធិនៅតំបន់ស៊ីនជាំងមុនពេលអាណត្តិត្រូវបញ្ចប់នៅថ្ងៃទី ៣១ខែសីហា។
«យើងកំពុងព្យាយាមយ៉ាងខ្លាំងដើម្បីធ្វើអ្វីដែលខ្ញុំបានសន្យា»។ លោកស្រី Bachelet បាននិយាយបែបនេះក្នុងអំឡុងពេលសន្និសីទសារព័ត៌មានចុងក្រោយរបស់លោកស្រីក្នុងនាមជាឧត្តមស្នងការអង្គការសហប្រជាជាតិ (UN)ទទួលបន្ទុកសិទ្ធិមនុស្ស។
យ៉ាងណាមិញ លោកស្រីបានបន្ថែមថា ពេលវេលាជាក់លាក់នៃការចេញផ្សាយពីរបាយការណ៍នេះនៅមិនទាន់ប្រកាសនៅឡើយ ខណៈដែលការិយាល័យរបស់លោកស្រីស្ថិតនៅក្រោមសម្ពាធយ៉ាងខ្លាំង។ លោកស្រីបានអះអាងថា ការិយាល័យលោកស្រីទទួលបានព័ត៌មានច្រើនពីរដ្ឋាភិបាលចិន ហើយលោកស្រីកំពុងត្រួតពិនិត្យឡើងវិញដោយប្រុងប្រយ័ត្នពីព័ត៌មានទាំងនេះ មុនពេលចេញផ្សាយ។
ខណៈមិនទាន់បានបោះផ្សាយរបាយការណ៍នៅឡើយ លោកស្រី Bachelet បានទទួលលិខិតមួយដែលបានចុះហត្ថលេខាដោយប្រទេសនានារួមមានកូរ៉េខាងជើង វេណេស៊ុយអេឡា និងគុយបា ស្នើសុំមិនឱ្យចេញផ្សាយរបាយការណ៍ដែលត្រូវបានពន្យារពេលម្តងហើយម្តងទៀតនេះ។
កន្លងមក ប្រទេសលោកខាងលិចនិងបុគ្គលមួយចំនួនបានចេញមុខចោទប្រកាន់ចិនពីការរំលោភសិទ្ធិមនុស្សនៅតំបន់ស៊ីនជាំង ដោយរួមមានការឃុំឃាំង ការបង្ខំមនុស្សឱ្យធ្វើការ ការបំបែកគ្រួសារ ការបំផ្លាញទីតាំងវប្បធម៌ និងសាសនារបស់ជនជាតិវីហ្គ័រ។ លើសពីនេះ អាម៉េរិក និងប្រទេសលោកខាងលិចផ្សេងទៀតបានចោទចិនថាបានប្រព្រឹត្តអំពើប្រល័យពូជសាសន៍ប្រឆាំងនឹងក្រុមជនជាតិភាគតិចទៀតផង។
គួរបញ្ជាក់ថា ទស្សនកិច្ចលោកស្រី Bachelet ទៅកាន់តំបន់ស៊ីនជាំងកាលពីដើមឆ្នាំនេះ បង្កឱ្យមានការរិះគន់ជាច្រើន។ មុនដំណើរទស្សនកិច្ចរបស់លោកស្រីនេះ អាម៉េរិកបាននិយាយថា ខ្លួនមានការព្រួយបារម្ភយ៉ាងខ្លាំងលើដំណើរទស្សនកិច្ចរបស់លោកស្រី។ បន្ទាប់ពីលោកស្រី Bachelet ត្រលប់មកពីចិនវិញ ប្រទេសចំនួន៤៧ បានចុះហត្ថលេខាលើសេចក្តីថ្លែងការណ៍មួយដោយស្នើសុំឱ្យមានការសង្កេតលម្អិតបន្ថែមទៀតរួមទាំងការរឹតបន្តឹងដែលអាជ្ញាធរចិនបានដាក់ក្នុងដំណើរទស្សនកិច្ចនេះ៕
© រក្សាសិទ្ធិដោយ thmeythmey.com