នាយករដ្ឋមន្ត្រីជប៉ុន គីស៊ីដា ហ្វូមីអូ ថា ជប៉ុននឹងជំរុញឱ្យអាហ្រិកទទួលបានកៅអីសមាជិកអចិន្ត្រៃយ៍ក្រុមប្រឹក្សាសន្តិសុខនៃអង្គការសហប្រជាជាតិ (UN) ដែលជាផ្នែកមួយនៃការធ្វើកំណែទម្រង់ស្ថាប័នដ៏មានឥទ្ធិពលមួយនេះឱ្យមានតំណាងគ្រប់ជ្រុងជ្រោយ។ លោក គីស៊ីដា ក៏បានសន្យាជួយជ្រោមជ្រែងអាហ្រិកក្នុងការស្ដារស្ថានភាពសន្តិសុខស្បៀងអាហារផងដែរ។
ថ្លែងតាមប្រព័ន្ធវីដេអូពីទីក្រុងតូក្យូក្នុងសន្និសីទអន្តរជាតិតូក្យូស្តីពីការអភិវឌ្ឍអាហ្វ្រិក នាយករដ្ឋមន្ត្រីជប៉ុន បានបញ្ជាក់ជាថ្មីពីការប្តេជ្ញាចិត្តរបស់ខ្លួនក្នុងការដោះស្រាយភាពអយុត្តិធម៌ដែលមានយូរមកហើយចំពោះតំបន់អាហ្វ្រិកដែលមិនមានតំណាងជាសមាជិកអចិន្ត្រៃយ៍ក្នុងក្រុមប្រឹក្សាសន្តិសុខ UN ។
«ដើម្បីឱ្យ UN ធ្វើការប្រកបដោយប្រសិទ្ធភាព និងដើម្បីសន្តិភាព និងស្ថិរភាពចាំបាច់ ត្រូវពង្រឹង UN ទាំងមូលតាមរយៈកំណែទម្រង់ក្រុមប្រឹក្សាសន្តិសុខ»។ លោក គីស៊ីដា បានសង្កត់ធ្ងន់បែបនេះ មុនបន្តថា UN កំពុងតែប្រឈមមុខនឹងចន្លោះខ្វះខាតមួយនេះ ហើយក៏ត្រូវដោះស្រាយបញ្ហាមួយនេះផងដែរ។
ក្រុមប្រឹក្សាសន្តិសុខ UN ត្រូវបានបង្កើតឡើងដោយសមាជិកចំនួន១៥ប្រទេសដែលក្នុងនោះ៥ប្រទេស ជាសមាជិកអចិន្ត្រៃយ៍មាន អាម៉េរិក, រុស្ស៊ី, ចិន, បារាំង និងចក្រភពអង់គ្លេស។ សមាសភាពនេះ បង្ហាញពីការខ្វះសមាមាត្រប្រទេសតំណាងពីតំបន់អាហ្វ្រិកក្នុងការពិភាក្សាបញ្ហាសំខាន់ៗក្នុងក្រុមប្រឹក្សាដ៏មានអំណាចមួយនេះ។ ជប៉ុនជាប់ឆ្នោតជាសមាជិកមិនអចិន្រ្តៃយ៍កាលពីខែមិថុនាកន្លងទៅ។
ក្នុងសារវីដេអូដដែលនេះ លោក គីស៊ីដា ក៏បានបានរំឭកឡើងពីការសន្យាផ្ដល់ប្រាក់ប្រហែល៣០ពាន់លានដុល្លារនៅទ្វីបអាហ្រ្វិកក្នុងរយៈពេល៣ឆ្នាំខាងមុខ ហើយបានសន្យាជួយស្ដារស្ថានភាពសម្រាប់សន្តិសុខស្បៀងអាហារ ជាមួយការសម្របសម្រួលជាមួយធនាគារអភិវឌ្ឍន៍អាហ្វ្រិកផងដែរ។
មេដឹកនាំជប៉ុនរូបនេះក៏បានប្រកាសពីផែនការតែងតាំងប្រេសិតពិសេសមួយរូបទៅកាន់តំបន់កុយរមាសអាហ្វ្រិក ដែលជាកន្លែងដែលរងគ្រោះរាំងស្ងួតដ៏យូរ ហើយអាច នឹងប្រឈមនឹងគ្រោះមហន្តរាយមនុស្សធម៌ដែលមិនធ្លាប់មានពីមុនមក។
លើសពីនេះ ជប៉ុន នឹងចាក់បញ្ចូលប្រាក់ចំនួន៨,៣លានដុល្លារជាជំនួយសម្រាប់ការអភិវឌ្ឍតំបន់ត្រីកោណរវាងម៉ាលី នីហ្សេ និងបួគីណាហ្វាសូដែលជាតំបន់សម្បូរដោយមាស ក៏ប៉ុន្តែត្រូវបានរងការវាយប្រហារដោយក្រុមប្រដាប់អាវុធក្នុងប៉ុន្មានឆ្នាំក្រោយនេះ ។ ជំនួយនេះ នឹងបង្កើតកិច្ចសហប្រតិបត្តិការល្អរវាងប្រជាពលរដ្ឋ និងអាជ្ញាធរមូលដ្ឋាន និងជួយកែលម្អសេវារដ្ឋបាលសម្រាប់ប្រជាពលរដ្ឋចំនួន៥លាននាក់ក្នុងតំបន់នេះ។
ទន្ទឹមនេះ លោក គីស៊ីដា បានសន្យានឹងផ្តល់ជំនួយក្នុងការបណ្តុះបណ្តាលមន្រ្តីប៉ូលិស និងគាំទ្រការបោះឆ្នោតដោយយុត្តិធម៌និងតម្លាភាពនៅទូទាំងទ្វីបអាហ្វ្រិក ហើយក៏គាំទ្រនីតិរដ្ឋនៅតំបន់មួយនេះផងដែរ៕