អន្តរជាតិ
នយោបាយអន្តរជាតិ
កូឡុំប៊ីនិងវេណេស៊ុយអេឡា ស្តារទំនាក់ទំនងការទូតឡើងវិញបន្ទាប់ពីកាត់ផ្តាច់ជាង ៣ ឆ្នាំ ប្រធានាធិបតីឆ្វេងនិយមថ្មីរបស់កូឡុំប៊ី លោក Gustavo Petro ។ រូបថត AFP
× កូឡុំប៊ី និងវេណេស៊ុយអេឡា ប្រកាសស្តារទំនាក់ទំនងការទូតពេញលេញឡើងវិញ បន្ទាប់ពីកាត់ផ្តាច់ទំនាក់ទំនងជាមួយគ្នារយៈពេល៣ឆ្នាំ។ ឯកអគ្គរដ្ឋទូតថ្មីរបស់កូឡុំប៊ី Armando Benedetti ទៅដល់រដ្ឋធានីការ៉ាកាសនៅថ្ងៃទី២៨ ខែសីហា។
«ទំនាក់ទំនងជាមួយវ៉េណេស៊ុយអេឡា មិនគួរត្រូវបានកាត់ផ្តាច់ឡើយ។ យើងជាបងប្អូននឹងគ្នា ហើយបញ្ហាមិនអាចបំបែកពួកយើងបានទេ»។ លោកឯកអគ្គរដ្ឋទូតថ្មីរបស់កូឡុំប៊ី លោក Armando Benedetti ប្រចាំវេណេស៊ុយអេឡាបានសរសេរបែបនេះលើបណ្ដាញសង្គម Twitter នៅថ្ងៃទី២៩ ខែសីហា។
លោក Benedetti ត្រូវបានស្វាគមន៍ដោយអនុរដ្ឋមន្ត្រីការបរទេសវេណេស៊ុយអេឡាលោក Rander Pena Ramirez ។ លោកក៏បានបង្ហោះសារលើបណ្ដាញសង្គម Twitterថា ទំនាក់ទំនងរវាងកូឡុំប៊ី និងវេណេស៊ុយអេឡាជាទំនាក់ទំនងប្រវត្តិសាស្ត្រ ហើយលោកនឹងធ្វើការដើម្បីសុភមង្គលរបស់ប្រជាជន។
គួរបញ្ជាក់ថា ប្រធានាធិបតីឆ្វេងនិយមថ្មីរបស់កូឡុំប៊ី លោក Gustavo Petro និងប្រធានាធិបតីវេណេស៊ុយអេឡា លោក Nicolas Maduro បានប្រកាសកាលពីថ្ងៃទី ១១ ខែសីហាពីគម្រោងស្តារទំនាក់ទំនងការទូត ដែលត្រូវបានកាត់ផ្តាច់នៅឆ្នាំ ២០១៩។
ទីក្រុងការ៉ាកាស បានផ្តាច់ទំនាក់ទំនងជាមួយទីក្រុងបូហ្គោតានៅដើមឆ្នាំ ២០១៩ បន្ទាប់ពីសមាជិកនៃក្រុមប្រឆាំងរបស់វេណេស៊ុយអេឡាបានព្យាយាមឆ្លងកាត់ទឹកដីកូឡុំប៊ីជាមួយនឹងឡានដឹកទំនិញដែលផ្ទុកអាហារ និងថ្នាំ។
យ៉ាងណាមិញទំនាក់ទំនងរវាងប្រទេសទាំងពីរហាក់ប្រែជាល្អឡើងវិញបន្ទាប់ពីលោក Gustavo Petro បានចូលកាន់តំណែងជាប្រធានាធិបតីនៅដើមខែសីហា។ លោក Petro ដែលជាប្រធានាធិបតីឆ្វេងនិយមដំបូងរបស់កូឡុំប៊ី បាននិយាយថា លោកនឹងទទួលស្គាល់លោក Maduro រួមទាំងធ្វើការជាមួយរដ្ឋាភិបាលវេណេស៊ុយអេឡាលើបញ្ហាជាច្រើន ដូចជាការប្រយុទ្ធជាមួយក្រុមឧទ្ទាមនៅតាមព្រំដែនជាដើម៕
Tag:
កូឡុំប៊ី
វេណេស៊ុយអេឡា
© រក្សាសិទ្ធិដោយ thmeythmey.com