គណៈរដ្ឋមន្រ្តីថៃ នៅថ្ងៃទី៣០ ខែសីហា បានបើកកិច្ចប្រជុំជាលើកដំបូង ចាប់តាំងពីតុលាការធម្មនុញ្ញ បានសម្រេចព្យួរតំណែងលោក ប្រាយុទ្ធ ចន្ទអូចា ជានាយករដ្ឋមន្រ្តី រហូតដល់មានសេចក្តីសម្រេចជុំវិញការកំណត់អាណត្តិរបស់លោក។ ក្នុងកិច្ចប្រជុំនោះ លោកឧបនាយករដ្ឋមន្រ្តី Prawit Wongsuwon ដឹកនាំកិច្ចប្រជុំនេះជាលើកដំបូង ក្នុងនាមជានាយករដ្ឋមន្រ្តីបណ្តោះអាសន្ន។ 

 

យ៉ាងណាមិញ កៅអីនាយករដ្ឋមន្រ្តីថៃ ត្រូវបានទុកឱ្យទំនេរ។ លោកPrawit បានអះអាងថា លោកមានបំណងទុកកៅអីនាយករដ្ឋមន្រ្តីឱ្យទំនេរដើម្បីផ្តល់កិត្តិយសដល់លោកប្រាយុទ្ធ ដែលមិនទាន់បានចេញពីតំណែង។ បើតាមនាយករដ្ឋមន្រ្តីបណ្តោះអាសន្នថៃរូបនេះ លោកអាចអង្គុយកៅអីឧបនាយករដ្ឋមន្រ្តីបាន។ 

 

បើទោះលោកប្ រាយុទ្ធ ត្រូវបានតុលាការធម្មនុញ្ញព្យួរតំណែងនាយករដ្ឋមន្រ្តីក៏ពិតមែន ប៉ុន្តែលោកនៅតែកាន់តំណែងរដ្ឋមន្រ្តីការពារជាតិមួយទៀត។ តំណែងប្រមុខការពារជាតិនេះ ត្រូវបានលោកប្រាយុទ្ធកាន់កាប់ចាប់តាំងពីឆ្នាំ២០១៩ មក។ 

 

ក្នុងកិច្ចប្រជុំរយៈពេល ៣ម៉ោង ដោយគ្មានសម្រាកនេះ ក៏មានវត្តមានរបស់លោក ប្រាយុទ្ធ ដែរ ប៉ុន្តែលោកចូលរួមតាមប្រព័ន្ធវីដេអូ Zoom ដោយមិនមាននិយាយអ្វីឡើយ ខណៈកិច្ចប្រជុំគណៈរដ្ឋមន្រ្តីលើកនេះ គ្មានរបៀបវារៈទាក់ទិននឹងក្រសួងការពារជាតិ។ នេះបើតាមការចុះផ្សាយរបស់កាសែតបាងកកប៉ុស្តិ៍។

 

តាមការបញ្ជាក់របស់លោក Wissanu Krea-ngam ឧបនាយករដ្ឋមន្រ្តីថៃ គណៈរដ្ឋមន្រ្តីបានអនុម័តវិសោធនកម្មលើបទបញ្ជាការិយាល័យនាយករដ្ឋមន្រ្តី ដែលអនុញ្ញាតឱ្យនាយករដ្ឋមន្រ្តីបណ្តោះអាសន្នសម្រេចលើការផ្ទេរមន្រ្តី រួមទាំងបញ្ហាទាក់ទិននឹងថវិកា៕