បញ្ហាប្រឈមធំបំផុតគឺនៅរដូវវស្សាដែលមានភ្លៀងស្រកចូលថ្នាក់​។ មិនតែប៉ុណ្ណោះ ពីដាន និងដំបូលអគារចាប់ផ្ដើមពុកផុយនិងធ្លាក់ជាបន្តបន្ទាប់។ លោក រៀបរាប់ដូច្នេះថា៖«យើងបានដឹងពីស្ថានភាពនេះហើយយើងបានប៉ះប៉ូវវាខ្លះដែរ។ បញ្ហាប្រឈមនៅខែវស្សា ដោយសារមានភ្លៀងលិចចូលបន្ទប់ចំនួន២។ យើងមានកង្វល់ខ្លះដែរ ព្រោះយើងមើលមិនឃើញ ដូចជា ស៊ីប្រូយើងធ្លាក់ពីលើចុះមកក្រោម ហើយពីដានហ្នឹង ជួនកាលវាធ្លាក់មកប្រាវ អ៊ីចឹងយើងបានហាមសិស្សមិនឱ្យដើរតាមចន្លោះ និងកន្លែងពុំទាន់បានជួសជុលនោះទេ»។ 

 

ថ្វីបើ អគារនេះចាស់ ប៉ុន្តែ គណៈគ្រប់គ្រង់សាលាពុំអាចទុកចោលនោះទេ ដោយសារចំនួនសិស្សបានកើនឡើងយ៉ាងខ្លាំងក្នុងរយៈពេល៥ឆ្នាំចុងក្រោយ។ បច្ចុប្បន្ន វិទ្យាល័យបូទុមសាគរ មានអគារចំនួនសិក្សាចំនួន៣ និងសិស្សប្រមាណ៥០០នាក់។ 
 

បើតាម លោក ផាត ផុន អគារនេះចាំបាច់ត្រូវជួសជុល ឬសាងសង់ថ្មី ពុំបើដូច្នេះទេ នឹងបង្កគ្រោះថ្នាក់និងរំខានដល់ការសិក្សារបស់យុវជន ខណៈសាលាកំពុងខ្វះខាតបន្ទប់រៀន។ កន្លងទៅ លោកក៏ធ្លាប់ស្នើទៅកាន់មន្ទីរអប់រំ យុវជន និងសប្បុរសជនឱ្យជួយជុសជុល និងកសាងថ្មីផងដែរប៉ុន្តែ សំណើនេះ មិនជោគជ័យ។ នាយករងសាលារូបនេះ ស្នើឱ្យក្រសួងអប់រំ និងភាគីពាក់ព័ន្ធជួយពន្លឿនការជួសជុល និងសាងសាង ឡើងវិញដើម្បីបម្រើដល់ការងារអប់រំក្នុងស្រុកបូទុមសាគរ។ 
 

លោក ប្រាប់ដូច្នេះថា៖« ដាច់ខាត យើងចង់បានអគារនេះឱ្យស្អាតល្អឡើងវិញដោយជួសជុលឱ្យមានសុវត្ថិភាព ឬកសាងថ្មី ព្រោះយើងអត់ចង់ឱ្យបាត់បង់អគារនេះទេ។យើងអាចទ្រាំបានក្នុងរយៈពេលសាងសង់ ឬជួសជុលឡើងវិញប៉ុន្តែបើក្នុងលក្ខខណ្ឌថាអត់ទាំងស្រុងតែម្ដង យើងមានការលំបាកក្នុងការសិក្សាដោយសារយើងខ្វះបន្ទប់»។ 


 

យុជន ដន ធីឌួង ជាសិស្សថ្នាក់ទី៩វិទ្យាល័យបូទុមសាគរ បានបង្ហាញក្ដីបារម្ភពាក់ព័ន្ធសុវត្ថិភាពនៅពេលកំពុងរៀនដោយសារការធ្លាក់ចុះនូវពីដាន និងដំបូលសាលា។ មិនតែប៉ុណ្ណោះ ភ្លៀងស្រក់ចូលបន្ទប់ក៏បានប៉ះពាល់ដល់ការសិក្សារបស់គេផងដែរ។ 
 

ធីឌួង បានលើកឡើងថា នាខែវស្សានេះមានភ្លៀងធ្លាក់លិចជ្រាបចូលបន្ទប់នៅពេលកំពុងរៀន។ ពេលខ្លះ ត្រូវសើមសៀវភៅ និងតុរៀនខណៈរូបគេព្រួយបាម្ភខ្លាំងចំពោះការធ្លាក់ចុះដំបូលអគារ។ យុវជនរូបនេះប្រាប់ដូច្នេះថា៖«ខ្ញុំមានការបារម្ភបន្តិចបន្តួចដែរ ព្រោះខែនេះជាខែភ្លៀង អ៊ីចឹង វាសាចនិងស្រកទឹកភ្លៀងមកនៅពេលយើងកំពុងរៀន។ ម្យ៉ាងទៀត យើងបាម្ភខ្លាចពីដាន ធ្លាក់មក»។ 
 

ស្រដៀងគ្នានេះ យុវតី សាន ទៀងបានឱ្យដឹងដែរថា  អគារនេះ មានស្ថានភាពចាស់ និងបែកបាក់ត្រង់ផ្នែកខ្លះហើយជារើយៗតែងតែមានភ្លៀងស្រកចូលបន្ទប់សិក្សា។ យុវតីរូបនេះ ស្នើឱ្យមានការជួយជុលឡើងវិញ ដើម្បីបង្កភាពងាយស្រួលសល់ការសិក្សារបស់ពួកគេ។ យុវតី សាន ទៀង បានប្រាប់ដូច្នេះថា៖« ខ្ញុំចង់ឱ្យគាត់(ក្រសួងអប់រំ)ដាក់បង្អួញ រៀបពីដាន និងប្រកដំបូលឡើងវិញ ព្រោះយើងពិបាករៀនដែរ។ពេលខ្លះយើងត្រូវប្ដូរតុចុះឡើង ដើម្បីគេចភ្លៀង»៕

ស្ថានភាពលិចធ្លាយពីដានអាគារ