នាំយក Lucas Paqueta ពី Lyon តម្លៃ ៥៩,៦លានដុល្លារនេះ ជាតម្លៃមួយដែលខ្ពស់បំផុតដែល West Ham មិនធ្លាប់បានចំណាយពីមុនមក។ កីឡាករដែលក្រុម ញញ្ញួរយក្សធ្លាប់នាំចូលថ្លៃបំផុតគឺ ខ្សែប្រយុទ្ធ Sebastien Haller ក្នុងឆ្នាំ ២០១៩។ កីឡាករវ័យ ២៥ឆ្នាំ រូបនេះជាកីឡាករទី៨ ហើយដែលលោក Devid Moyes បាននាំមករដូវកាលនេះ ដោយទទួលបានកិច្ចសន្យា៥ឆ្នាំជាមួយក្លិបភាគខាងកើតទីក្រុងឡុងដ៍មួយនេះ។
 

ក្នុងសន្និសីទកាសែតពេលបង្ហាញខ្លួន Paqueta បាននិយាយថា រូបគេមានអារម្មណ៍សប្បាយចិត្តខ្លាំង ដែលទទួលបានបទពិសោធថ្មី ហើយក៏រំពឹងជោគជ័យនៅលីគអង់គ្លេស។

«ខ្ញុំពិតជាសប្បាយចិត្តដែលបានមកដល់ទីនេះ។ ខ្ញុំរំពឹងថានេះជាការចាប់ផ្តើមដំបូងនៃដំណើរនៅ Premier League របស់ខ្ញុំ ហើយខ្ញុំក៏រំពឹងទទួលបានជោគជ័យនៅទីនេះ។ រដូវកាលមុន ​West Ham ក៏បង្ហាញទម្រង់លេងបានយ៉ាងល្អ ដូច្នេះខ្ញុំសង្ឃឹមថាពួកគេក៏បន្តលេងបានល្អ ហើយនឹងល្អបន្ថែមទៀតសម្រាប់រដូវកាលនេះក៏ដូចជាពេលវេលាខ្ញុំនៅទីនេះ។»។ Paqueta និយាយបែបនេះ។
 

Paqueta អំឡុងពេលលេងនៅ Lyon បង្ហាញខ្លួនឱ្យក្រុមខ្លាំងរបស់បារាំងបានចំនួន៨០លើក ក្រោយផ្លាស់ពីក្រុម AC Milan ក្នុងតម្លៃខ្លួន១៨លានដុល្លារ កាលឆ្នាំ ២០២០។

ជាមួយការមកដល់កីឡាករវ័យ ២៥ឆ្នាំ លោក Devid Moyes និយាយថាលោកសម្លឹងឃើញការប្រកួតប្រជែងរបស់ក្រុមនៅក្នុងពានរង្វាន់អឺរ៉ុប។
 

«រូបគេជាកីឡាករដែលខ្ញុំតែងតែចង់បានរយៈពេលយូរមកហើយ ហើយពិតណាស់ យើងមើលឃើញរូបគេក៏ព្រោះតែរដូវកាលមុន យើងខិតកៀកអាចនឹងឈ្នះពានរង្វាន់ Europa League។ យើងក៏រំពឹងទទួលបានផលវិជ្ជមានពីកីឡាករដ៏មានទេពកោសល្យដូចរូបគេ ហើយគេក៏ត្រូវការពេលវេលាសម្រាប់ការលេងនៅ Premier League។» នេះជាការបញ្ជាក់របស់លោក Moyes។