ជាតិ
នយោបាយជាតិ
សម្តេច ហ៊ុន សែន៖ កូនខ្ញុំ ចេះគោរពគ្នាណាស់ លោក ហ៊ុន ម៉ាណែត និង លោក ហ៊ុន ម៉ានី ក្នុងដំណើរ_តាមយន្តហោះរួមគ្នាមួយ។ រូបថត FB Hun Mani
× «បងប្អូនគេ គេមានឋានានុក្រមរបស់គេ! គេ [លោក ហ៊ុន ម៉ានី] ស្តាប់បងរបស់គេណាស់! គេគ្មានមហិច្ឆតាធ្វើនាយករដ្ឋមន្ត្រីជំនួសបងរបស់គេទេ»។ នេះជាប្រតិកម្មរបស់របស់សម្តេចនាយករដ្ឋមន្ត្រី ហ៊ុន សែន ដែលឆ្លើយតបទៅនឹងអត្ថបទអត្ថាធិប្បាយមួយរបស់សារព័ត៌មាន The Cambodia Daily។ តាមរយៈវត្តមាននៃសៀវភៅពីរក្បាលផ្សេងគ្នាដែលនិយាយអំពីលោក ហ៊ុន ម៉ាណែត និងអំពីលោក ហ៊ុន ម៉ានី សារព័ត៌មាននេះបានផ្សាយអត្ថបទវិភាគមួយនាពេលថ្មីៗនេះដោយអះអាង កូនប្រុសទាំងពីររបស់សម្តេច ហ៊ុន សែន កំពុងប្រជែងតួនាទីនាយករដ្ឋមន្ត្រី។
លោក លាង ដឺលុច ចាងហ្វាងនៃសារព័ត៌មានថ្មីៗ(ThmeyThmey)បានសរសេរ និងបោះពុម្ពសៀវភៅមានចំណងជើងថា «ក្តីសង្ឃឹម ហ៊ុន ម៉ានី» និង លោក ឆាយ សុផល សាស្ត្រាចារ្យសារព័ត៌មាន និងទំនាក់ទំនង បានសរសេរសៀវភៅដែលមានចំណងជើងថា៖ «កូនប្រុសច្បងនាយករដ្ឋមន្ត្រី ដំណើរឆ្ពោះទៅបន្តវេន ហ៊ុន ម៉ាណែត»។ ការសរសេរសៀវភៅរបស់អ្នកនិពន្ធទាំងពីរនេះ ត្រូវបានគេយកវិភាគថាកូនប្រុសរបស់សម្តេច ហ៊ុន សែន កំពុងប្រជែងគ្នាដណ្តើមធ្វើជានាយករដ្ឋមន្ត្រី។
ពីពិធីបើកការដ្ឋានសាងសង់ស្ពានអាកាសព្រះមុនី្នវង្ស និងស្ពានអាកាស សម្តេច គង់ សំអុល នាព្រឹកថ្ងៃទី៣១សីហា សម្តេច ហ៊ុន សែន ថ្លែងថា «លោក ឆាយ សុផល សរសេរអំពីកូនប្រុសច្បងនាយករដ្ឋមន្ត្រី, លោក លាង ដឺលុច សរសេរពី ហ៊ុន ម៉ានី [គឺ]គេយកទៅវិភាគនៅខេមបូឌា ដេលី ដែលគេថា កូនខ្ញុំទាំងពីរកំពុងប្រជែងគ្នាធ្វើនាយករដ្ឋមន្ត្រី។ ជម្លោះផ្ទៃក្នុងគ្រួសារធ្ងន់ធ្ងរ ដែលតម្រូវឱ្យលោក ហ៊ុន សែន ចេញមកសម្រួល»។
ជុំវិញនៃការវិភាគនេះ សម្តេច ហ៊ុន សែន បានឆ្លើយតបយ៉ាងដូច្នេះ៖ [ខ្ញុំ] អត់ចាំបាច់មកសម្របសម្រួលទេ! កូនរបស់ខ្ញុំ គេស្គាល់គ្នាណាស់ ហើយគេគោរពបងរបស់គេណាស់»។ ជាមួយគ្នានេះ សម្តេចនាយករដ្ឋមន្ត្រីបានផ្តាំ ថា បើគ្រួសាររបស់ខ្លួនមិនកើត កុំយកគ្រួសាររបស់គេមកប្រៀបធៀបដូចគ្រួសាររបស់ខ្លួន៕
Tag:
សម្តេច ហ៊ុន សែន
ហ៊ុន ម៉ាណែត
ហ៊ុន ម៉ានី
© រក្សាសិទ្ធិដោយ thmeythmey.com