កីឡាជាតិ
ជាតិ
ចាញ់លទ្ធផល ៩-០ ដូចគ្នា គ្រូ Bournemouth និង Dundeeត្រូវបណ្តេញចេញថ្ងៃដូចគ្នា
× លោក Scott Parker អ្នកចាត់ការក្រុម AFC Bournemouth ដែលទើបវិលត្រលប់មកពីក្របខណ្ឌ Championship ថ្ងៃទី៣០ ខែសីហា ត្រូវក្លិបបណ្តេញចេញ៣ថ្ងៃក្រោយ បន្ទាប់ពីប្រកួតចាញ់ Liverpool ដល់ទៅ ៩-០ ។ នៅស្កុតឡែនវិញ លោក Jack Ross ត្រូវក្រុម Dundee United នៅលីគកំពូលស្កុតឡែន បណ្តេញចេញថ្ងៃដូចគ្នា។
អាចជាការចាប់ផ្តើមដ៏អាក្រក់សម្រាប់ AFC Bournemouth ក៏ដូចជាលោក Parker ឆ្លងកាត់៤ប្រកួតដើមរដូវកាលនៅ Premier League រកបានត្រឹមតែ ៣ពិន្ទុប៉ុណ្ណោះ ហើយស្ថិតនៅលំដាប់លេខ១៧ ក្នុងតារាង។ Bournemouth ចាប់ផ្តើមជំនួបដំបូងឈ្នះ Aston Villa ២-០ ក៏ពិតមែន តែ៣ប្រកួតចុងក្រោយក្រុមលោក Parker រងបរាជ័យបន្តបន្ទាប់ ដោយចាញ់ man City ៤-០ ចាញ់ Arsenal ៣-០ និងចាញ់ Liverpool ឆ្ងន់បំផុត ៩-០។
ក្រោយត្រូវបានក្លិបប្រកាសបណ្តេញចេញ លោក Maxim Demin ត្រូវជាម្ចាស់ក្លិប Bournemouth បានចេញសេចក្តីប្រកាសអរគុណលោក Scott Parker ចំពោះការខិតខំប្រឹងប្រែងជួយក្រុមកន្លងមក។
«ខ្ញុំចង់កត់ត្រារាល់ការដឹងគុណរបស់ខ្ញុំចំពោះការខិតខំប្រឹងប្រែងរបស់លោក Scott និងក្រុមការងាររបស់លោកអំឡុងពេលធ្លាប់រួមរស់ជាមួយយើងកន្លងមក។ ទោះជាយ៉ាងនេះ ក្នុងការបន្តដំណើរការក្នុងនាមជាក្រុមមួយ ហើយក្លិបទាំងមូលតាមគោលដៅដែលគ្រោងទុកនិងជានិរន្តរភាព គ្មានលក្ខខណ្ឌណាមួយអាចបង្អាកដំណើរយើងបានឡើយ។»។ នេះបើតាមសម្តីរបស់លោក Maxim Demin។
ក្លិប Bournemouth ក៏បានប្រកាសដែរថាពួកគេកំពុងតែស្វែងរកអ្នកចាត់ការថ្មីក្នុងការកាន់កាប់ការងារ ហើយលោក Gary O’Neil ត្រូវដឹកនាំក្រុមបណ្តោះអាសន្ន។
ដោយឡែក គ្រូបង្វឹកក្រុម Dundee United នៃលីគស្កុតឡែនឯណោះវិញ គឺលោក Jack Ross គ៏ត្រូវបានក្លិបបណ្តេញចេញថ្ងៃតែមួយដូចលោក Parker ដែរ។ ពោលគឺក្រោយ៣ថ្ងៃក្រោយ Dundee United ត្រូវក្រុម Celtic FC លត់ ៩-០។
បើតាមក្លិប Dundee United ថ្ងៃទី៣០ ខែសីហា លោក Jack Ross ត្រូវក្លិបបញ្ចប់ការងារ ហើយភ្លាមៗនោះលោក Liam Fox ដែលជាគ្រូជំនួយត្រូវមកគ្រប់គ្រងក្រុមបណ្តោះអាសន្ន។
សូមជម្រាបថា AFC Bournemouth នឹងត្រូវស្វាគមន៍ក្រុម Wolverhampton Wanderer សម្រាប់ជំនួបសប្តាហ៍ទី៥ នៃយុទ្ធនាការ Premier League។ ចំណែក Dundee United ត្រូវប៉ះក្រុម Livingston នៃជំនួបពានរង្វាន់ League Cup របស់ស្កុតឡែនយប់ថ្ងៃទី៣១ ខែសីហានេះ៕
Tag:
Scott Parker
Bournemouth
Dundee United
© រក្សាសិទ្ធិដោយ thmeythmey.com