សេចក្តីថ្លែងការណ៍របស់គណបក្សភ្លើងទៀន ដែលចេញនៅថ្ងៃទី១៣ ខែកញ្ញា ឆ្នាំ២០២២ បានសរសេរដូច្នេះថា៖«គណបក្សភ្លើងទៀន យល់ឃើញថា ការដំឡើងប្រាក់ខែដល់២១៥ដុល្លារក្នុង១ខែ គឺអាចជួយដល់កម្មករ-កម្មការិនីខ្មែរបានមួយចំណែក បើទោះបីជាការដំឡើងកម្រិតនេះ មិនទាន់សមល្មមចំពោះការប្រឈមនឹងជីវភាពរស់នៅរបស់កម្មករ-កម្មការិនី ក្នុងស្ថានភាពដែលទំនិញ មានម្ហូបអាហារ តម្លៃទិញ មធ្យោបាយធ្វើដំណើរ និង កន្លែងស្នាក់នៅ មានតម្លៃខ្ពស់ជាងប្រទេសជិតខាងនោះ»។ 
 

ជាមួយគ្នានេះ គណបក្សភ្លើងទៀន ស្នើឲ្យរដ្ឋាភិបាល សម្រួលជាមួយម្ចាស់រោងចក្រ-សហគ្រាស ក្នុងការនាំចូលវត្ថុធាតុដើម និងជំរុញដល់ការផលិតវត្ថុធាតុដើមក្នុងស្រុក ដើម្បីអាចផ្តល់លទ្ធភាពដំឡើងប្រាក់ខែលើសពី៣០០ដុល្លារដល់កម្មករ-កម្មការិនី ចាប់ពីឆ្នាំ២០២៤ទៅ។ 
 

ភាគីគីទាំង៣ គឺភាគីមេសហជីព ដែលតំណាងកម្មករ ភាគីនិយោជក (ថៅកែ) និងភាគីរដ្ឋាភិបាល បានចរចាគ្នាអស់៣លើករួចមកហើយ អំពីការកំណត់តួលេខថ្មីនៃប្រាក់ខែរបស់កម្មករផ្នែកវាយនភណ្ឌ កាត់ដេរ ផលិតផលស្បែកជើង និងផលិតផលធ្វើដំណើរ។ កិច្ចចរចានេះ ត្រូវការ៥ជុំឯណោះ ទើបភាគីទាំង៣ ឈានដល់បោះឆ្នោត ដើម្បីសម្រេចចុងក្រោយអំពីចំនួនប្រាក់ខែសម្រាប់កម្មករក្នុងឆ្នាំ២០២៣។ កិច្ចចរចាលើកទី៤ បានប្រព្រឹត្តទៅនៅថ្ងៃទី១៣ ខែកញ្ញា ហើយកិច្ចចរចាលើកទី៥ ដែលជាចុងបញ្ចប់ ត្រូវក្រសួងការងារ ជូនដំណឹងថា នឹងប្រព្រឹត្តនៅថ្ងៃ២១ ខែកញ្ញា។ 
 

ក្នុងកិច្ចចរចាលើកទី៣ មេសហជីព បានបន្ថយតួលេខរបស់ខ្លួនចុះបន្តិចថែមទៀត ដោយបន្ថយពីតួលេខ២១៥ដុល្លារ មកនៅតួលេខ២១៣ដុល្លារវិញ ខណៈតំណាងនិយោជក យល់ព្រមដំឡើងប្រាក់ខែជូនកម្មករតែ២ដុល្លារប៉ុណ្ណោះ គឺពី១៩៤ដុល្លារ ទៅ១៩៦ដុល្លារ។ ប្រាក់ខែរបស់កម្មករសម្រាប់ឆ្នាំ២០២២នេះ គឺ១៩៤ដុល្លារ៕