នឹងរួមចំណែកជំរុញឱ្យសិស្សដែលមានពិការភាព បន្តការសិក្សារហូតដល់ចប់បាក់ឌុប។

​

 

 

ក្នុងវិទ្យាល័យទួលក្បិល សិ្ថតក្នុងឃុំកំពង់ស្វាយ ស្រុកកំពង់ស្វាយ ខេត្តកំពង់ធំមានសិស្សានុសិស្ស ចំនួន ១ ០៣៣នាក់ ក្នុងនោះសិស្សស្រី៥៣៦នាក់។ លោក ជា ចន្ថា នាយករងវិទ្យាល័យទួលក្បិល បានឱ្យដឹងថា ក្នុងក្នុងចំណោមសិស្សទាំងអស់នោះ មានអ្នកដែលមានពិការភាពមានចំនួន ៦នាក់ ដែលភាគច្រើនជាសិស្សខ្សោយគំហើញ។  «ពិការហ្នឹង គឺពិការភ្នែក។ ដូចភ្នែកគាត់ម្ញ៉ូប។ តែគាត់ពាក់វ៉ែនតាទៅមើលឃើញ។ អ្នកពិការជើងជិះរទេះ គឺអត់មានទេ»។ នេះជាការពន្យល់បន្ថែមរបស់លោក នាយករងវិទ្យាល័យទួលក្បិល។ 

 

ដើម្បីបង្កភាពងាយស្រួលបន្ថែម ដល់ការសិក្សារបស់សិស្សដែលមានពិការភាព ​ពួកគេ ត្រូវបានផ្តល់អាទិភាព ឱ្យ​អង្គុយតុខាងមុខ ខណៈសាលា ក៏បាន និងកំពុងសាងសង់បង្គន់អនាម័យ ដែលមានជម្រាលផងដែរ។ ​លោក ជា ចន្ថា លើកឡើងថា៖«មានសារៈសំខាន់ណាស់ ដោយសារអី គាត់ខ្វេងខ្វង់ដៃជើង បើឱ្យគាត់​ឡើងដូចយើងធម្មតា គឺអត់បានទេ ពីព្រោះយើងយកចិត្តទុកដាក់ចំពោះគាត់។ បើអត់ធ្វើឱ្យគាត់ គាត់ទី១ បើសិនគាត់​ឡើងចុះទៅបង្គន់អនាម័យពិបាក អាចបោះបង់ការសិក្សា។ ដោយសារអី ដោយសារគាត់ពិបាក។ អ៊ីចឹងយើងយកចិត្តទុកចំពោះគាត់ ដើម្បីឱ្យគាត់រៀន​ចប់ចុងចប់ដើម ដូចសិស្សអត់ពិការដែរ»។

 

យ៉ាងណាក៏ដោយ លោកនាយករងវិទ្យាល័យទួលក្បិល បញ្ជាក់ថា សម្រាប់អគារសិក្សា​ដែលសាងសង់ពីមុន ថ្នាក់ដឹកនាំសាលាក៏មានផែនការក្នុងការសាងសង់ជម្រាលបន្ថែមដែរ ដោសារតែគំរូម៉ូតពីមុនមិនទាន់បានបញ្ចូលការគិតគូរដល់សិស្សដែលមានពិការភាពនៅឡើយ។  ​ទន្ទឹមនឹងនេះ លោក ជា ចន្ថា ក៏អះអាងដែរថា​ ការស្ថាបនាសំណង់ផ្សេងៗទៀត នៅក្នុងសាលានៅថ្ងៃអនាគត នឹងភ្ជាប់ជាមួយជម្រាលសម្រាប់ជនមានពិការភាពផងដែរ។

​

នាយករងវិទ្យាល័យរូបនេះ ក៏បានជំរុញឱ្យសំណូមពរដល់អាណាព្យាបាលអាណាព្យាបាល​ដែលពិការភាព ជំរុញ និងលើកទឹកចិត្តកូន ​បន្ថែមផងដែរ ដើម្បីផ្តល់លទ្ធភាពឱ្យអ្នកមានពិការភាព ទទួលបានអប់រំល្អប្រសើរ៕