ជាតិ
សេដ្ឋកិច្ច
អូស្រ្តាលី បន្តគាំទ្រកម្ពុជា ក្នុងការអនុវត្តច្បាប់ការពារអ្នកប្រើប្រាស់ឱ្យមានប្រសិទ្ធភាព លោក ប៉ាន សូរស័ក្ត រដ្ឋមន្ត្រីពាណិជ្ជកម្ម (ស្តាំ) កំពុងកាត់ខ្សែបូជាមួយ លោក Tim Ayres ឧបការីរដ្ឋមន្ត្រីក្រសួងពាណិជ្ជកម្ម របស់ប្រទេសអូស្ត្រាលី នៃការដាក់ឱ្យដំណើរការជាផ្លូវការនូវកម្មវិធី CACPP នៅខេត្តសៀមរាប នាថ្ងៃទី១៦កញ្ញា។
× សៀមរាប៖ រដ្ឋាភិបាលប្រទេសអូស្រ្តាលី បន្តផ្តល់ជំនួយ១,៣៥លានដុល្លារអូស្រា្តលី (ប្រមាណ៩០ម៉ឺនដុល្លារអាម៉េរិក) ដល់កម្ពុជា ដើម្បីអនុវត្តច្បាប់ការពារអ្នកប្រើប្រាស់ និងកិច្ចការប្រកួតប្រជែងឱ្យមានប្រសិទ្ធភាព។ ជំនួយនេះ នឹងត្រូវអនុវត្តឡើងតាមរយៈកម្មវិធីភាពជាដៃគូនៃកិច្ចការពារអ្នកប្រើប្រាស់កម្ពុជា-អូស្រ្តាលី (CACPP)។
កម្មវិធីភាពជាដៃគូនៃកិច្ចការពារអ្នកប្រើប្រាស់កម្ពុជា-អូស្រ្តាលី (Cambodia-Australian Consumer Commission Protection Partnership / CACPP) ត្រូវបានបើកដំណើរការជាផ្លូវការ ក្រោមវត្តមានលោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម ជាមួយ លោក Tim Ayres ឧបការីរដ្ឋមន្ត្រីក្រសួងពាណិជ្ជកម្ម របស់ប្រទេសអូស្ត្រាលី នាថ្ងៃទី១៦កញ្ញា។
លោក ប៉ាន សូរស័ក្តិ បានថ្លែងថា កម្មវិធីនេះគាំទ្រដល់ការអនុវត្តរបស់កម្ពុជានូវ ច្បាប់ស្តីពីកិច្ចការពារអ្នកប្រើប្រាស់ឆ្នាំ២០១៩ និងច្បាប់ស្តីពីការប្រកួតប្រជែងឆ្នាំ២០២១។ លោកបានបញ្ជាក់ថា កម្មវិធីនេះគឺជាផ្នែកមួយនៃកញ្ចប់ជំនួយរួម ដើម្បីជំរុញការស្តារសេដ្ឋកិច្ចក្នុងតំបន់ ក្រោយវិបត្តិកូវីដ-១៩។
លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម
បើរដ្ឋមន្ត្រីក្រសួងពាណិជ្ជកម្ម កម្មវិធីCACPP នឹងអនុវត្តរួមគ្នារវាងគណៈកម្មការកិច្ចការប្រកួតប្រជែង និងការពារអ្នកប្រើប្រាស់របស់ប្រទេសអូស្តា្រលី(ACCC) ជាមួយអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំរបស់កម្ពុជា (ក.ប.ប ឬ CCF)។ លោកបន្តនិយាយថា៖ «កម្មវិធី CACPP គឺជាឧបករណ៍មួយយ៉ាងសំខាន់ ដើម្បីការអនុវត្តច្បាប់របស់យើងប្រកបដោយប្រសិទ្ធភាព។ ដូច្នេះ ក.ប.ប របស់យើងកាន់តែរឹងមាំ ក្នុងការទទួលព័ត៌មាន និងសេវាផ្សេងៗរបស់ធុរជន»។
ជាមួយគ្នានេះ លោក Tim Ayres បានលើកឡើងថា កម្មវីធី CACPP គឺជានិមិត្តសញ្ញាដ៏អស្ចារ្យមួយនៃការតភ្ជាប់ទំនាក់ទំនងរវាងកម្ពុជា និង ប្រទេសអូស្ត្រាលី។ លោក បន្តនិយាយថា៖ «កាលណាយើងនិយាយការពារអ្នកប្រើប្រាស់ គឺជាពាក្យមួយដែលយើងត្រូវការពារដល់ប្រជាពលរដ្ឋ ពីធុរជនដែលអនុវត្តអំពើទុច្ចរឹត ឬមិនមានអនុលោមភាពទាំងស្តង់ដារគុណភាព និងតម្លាភាព»។
លោក Tim Ayres ឧបការីរដ្ឋមន្ត្រីក្រសួងពាណិជ្ជកម្ម របស់ប្រទេសអូស្ត្រាលី
បើតាមលោកឧបការី រដ្ឋមន្ត្រីក្រសួងពាណិជ្ជកម្ម និងជាឧបការីរដ្ឋមន្ត្រីក្រសួងផលិតកម្មរបស់ប្រទេសអូស្ត្រាលី កម្មវិធី CACPPនេះ ក៏បានជួយពង្រឹងការងាររបស់ប្រទេសអូស្ត្រាលី ក្រោមកិច្ចព្រមព្រៀងពាណិជ្ជកម្មសេរីអាស៊ាន-អូស្ត្រាលី-នូវែលសេឡង់(AANZFTA) ឱ្យកាន់តែទូលាយ ផងដែរ។ កម្មវិធីនេះ ជាផ្នែកមួយនៃគំនិតផ្តួចផ្តើមរបស់ភាពជាដៃគូមេគង្គ-អូស្រា្តលី ដែលមានថវិកា ២៣២លានដុល្លារអូស្រ្តាលី (ប្រមាណ១៥៥លានដុល្លាអាម៉េរិក) ដើម្បីជួយប្រទេសនៅតាមតំបន់មេគង្គ ស្តារឡើងវិញពីជំងឺកូវីដ-១៩៕
Tag:
ក.ប.ប
ការពារអ្នកប្រើប្រាស់
© រក្សាសិទ្ធិដោយ thmeythmey.com