ស្រុកកំពង់ស្វាយ, កំពង់ធំ៖សកម្មភាពចុះផ្សព្វផ្សាយ បញ្ជ្រាបការយល់ដឹង ពីការប្រើប្រាស់គ្រឿងញៀន ក្នុងឃុំក្ដីដូងស្រុកកំពង់ស្វាយ ខេត្តកំពង់ធំ តែងធ្វើឡើងជា​រៀងរាល់ខែ។ នេះបើតាមលោក លៀង កែវ មេប៉ុសិ៍នគរបាលឃុំក្ដីដូង។

មេប៉ុស្តិ៍រូបនេះ បានបញ្ជាក់ទៀតថា ​បច្ចុប្បន្ន សកម្មភាពការជួញដូរ និងប្រើប្រាស់គ្រឿងញៀន ក្នុងឃុំនេះមិនមានសកម្មភាពទៀតក៏ដោយ ក្រោយបង្ក្រាបអ្នកជួញដូរកាលពីអំឡុងឆ្នាំ២០២០កន្លងមក។ ជុំវិញបញ្ហាគ្រឿងញៀននៅក្នុងឃុំក្តីដូងនេះ ​ប្រជាពលរដ្ឋបានលើកឡើងថា បច្ចុប្បន្នស្ថានភាពនៃការប្រើប្រាស់គ្រឿងញៀនហាក់ស្ងប់ស្ងាត់ មិនឃើញមានសកម្មភាពទៀតឡើយ ក្រោយអ្នកជួញដូរត្រូវបានចាប់ខ្លួន។ តែទោះយ៉ាងណា ពលរដ្ឋនៅតែព្រួយបារម្ភថា សកម្មភាពប្រើប្រាស់ និងជួញដូរ​គ្រឿងញៀន នឹងត្រឡប់មកវិញ នៅថ្ងៃអនាគត។​ តបនឹងក្តីបារម្ភនេះ ​លោក លៀង កែវ អះអាងថា អាជ្ញាធរ​ នៅតែបន្ត​ត្រួតពិនិត្យនិងតាមដាន​ ដើម្បីបង្ការការប្រើប្រាស់គ្រឿងញៀនក្នុងឃុំ។