តួនាទីបច្ចេកវិទ្យាហិរញ្ញវត្ថុ(Financial Technology / FinTech) នឹងផ្តល់លទ្ធភាពដល់ពលរដ្ឋ ជាពិសេសម្ចាស់សហគ្រាសធុនតូចនិងមធ្យម(SME)កាន់តែមានភាពងាយស្រួលក្នុងការទទួលបានសេវាហិរញ្ញវត្ថុផ្លូវការ។ ដើម្បីជំរុញការប្រើបច្ចេកវិទ្យាហិរញ្ញវត្ថុនៅកម្ពុជាប្រកបដោយបរិយាប័ន្ន ABC, CMA និង CAFT បានសហការគ្នាលើកកម្ពស់ប្រព័ន្ធអេកូ-បច្ចេកវិទ្យាហិរញ្ញវត្ថុនៅកម្ពុជា សម្រាប់ការធ្វើធុរកិច្ចក្នុងវិស័យធនាគារ និងហិរញ្ញវត្ថុ។
ការប្រើប្រាស់បច្ចេកទេសហិរញ្ញវត្ថុ (FinTech) ក្នុងឧស្សាហកម្មធនាគារកំពុងរីកចម្រើនយ៉ាងខ្លាំង តាមរយៈការដាក់ឱ្យប្រើប្រាស់ផលិតផល និងសេវាធនាគារប្រកបដោយភាពច្នៃប្រឌិត។ ដូចជា ការដាក់ឱ្យប្រើនូវកាតទូទាត់និម្មិត បច្ចេកវិទ្យា Contactless ការទូទាត់តាមទូរសព្ទដៃ ការទូទាត់ QR Code និងការវាយតម្លៃឥណទានតាមអនឡាញ ជាដើម។ ជុំវិញការីកចម្រើននេះ សមាគមធនាគារនៅកម្ពុជា(ABC) សមាគមមីក្រូហិរញ្ញវត្ថុកម្ពុជា(CMA) និងសមាគមសហព័ន្ធហិរញ្ញវត្ថុនិងបច្ចេកវិទ្យានៃកម្ពុជា(CAFT) បានចុះអនុស្សរណៈយោគយល់(MOU)នៅថ្ងៃទី១៩កញ្ញា ឆ្នាំ២០២២ ដើម្បីលើកកម្ពស់ការប្រើប្រាស់បច្ចេកវិទ្យាហិរញ្ញវត្ថុនៅកម្ពុជានេះ ឱ្យកាន់ប្រសិទ្ធភាពសម្រាប់ធុរជន និងពលរដ្ឋទូទៅ។
បើតាមសេចក្តីប្រកាសព័ត៌មានរួមរបស់ABC, CMA និង CAFT កិច្ចសហការរវាងសមាគមទាំងបីនេះនឹងអភិវឌ្ឍបន្ថែមលើក្របខណ្ឌបច្ចេកវិទ្យាហិរញ្ញវត្ថុ គឺដើម្បីបម្រើដល់ដៃគូនៅក្នុងឧស្សាហកម្ម ចំពោះវិស័យបច្ចេកវិទ្យាហិរញ្ញវត្ថុ សហគមន៍ធុរកិច្ចបង្កើតថ្មីនៅកម្ពុជា និងអនុវត្តក្រមប្រតិបត្តិសម្រាប់គ្រឹះស្ថានធនាគារ និង ហិរញ្ញវត្ថុ។ លើសពីនេះ ស្ថាប័នទាំងបី ក៏សហការរួមគ្នាលើសកម្មភាពនៃការអនុវត្តបច្ចេកវិទ្យាហិរញ្ញវត្ថុ និងការកសាងសមត្ថភាព ផងដែរ។
លោក Raymond Sia ប្រធានសមាគមធនាគារនៅកម្ពុជា បានលើកឡើងថា ឧស្សាហកម្មហិរញ្ញវត្ថុ គឺឧស្សាហកម្មបម្រើដល់ប្រជាជន(People-centric Industry) ហើយ
សេវាហិរញ្ញវត្ថុ គឺជាសេវាចាំបាច់ដំបូងគេសម្រាប់ពលរដ្ឋ។ លោកបានបញ្ជាក់ថា៖ « ឌីជីថលូនីយកម្ម នវានុវត្តន៍ និងបច្ចេកវិទ្យាហិរញ្ញវត្ថុ គឺនៅជុំវិញអតិថិជនរបស់យើង»។
ជាមួយគ្នានេះ លោក សុខ វឿន ប្រធានក្រុមប្រឹក្សាភិបាលសមាគមមីក្រូហិរញ្ញវត្ថុកម្ពុជា បន្ថែមថា កិច្ចសហការរវាង CMA, ABC និងCAFTនេះ មិនត្រឹមតែជួយលើកស្ទួយប្រព័ន្ធបច្ចេកវិទ្យាហិរញ្ញវត្ថុសម្រាប់គ្រឹះស្ថានហិរញ្ញវត្ថុប៉ុណ្ណោះទេ។ តែវា ក៏ជាឱកាសថ្មីមួយសម្រាប់ប្រជាជនកម្ពុជាបានសិក្សាស្វែងយល់បន្ថែមពីបចេ្ចវិទ្យាថ្មីៗ។ លោកបន្តនិយាយយ៉ាងដូច្នេះ៖ « ជាពិសេសវាជាឱកាសសម្រាប់អ្នកដែលមានអាជីវកម្មថ្មីក្នុងវិស័យហិរញ្ញវត្ថុ ដើម្បីយកទៅអនុវត្តឱ្យមានប្រសិទ្ធភាពក្នុងប្រតិបត្តិការរបស់ខ្លួននៅថ្ងៃអនាគត»។
សម្រាប់លោក ប៉ិល រ៉េម៉ីស៊ីសុផុន ប្រធានក្រុមប្រឹក្សាភិបាល សមាគមសហព័ន្ធហិរញ្ញវត្ថុ និងបច្ចេកវិទ្យានៃកម្ពុជា ការសហការជាមួយ ABC និង CMA គឺជាកម្លាំងចលករមួយ ដែលរួមគ្នាកាន់តែរឹងមាំក្នុងការដោះស្រាយបញ្ហាតាមវិស័យ ដោយការលើកកម្ពស់ការយល់ដឹង និងការអប់រំផ្នែកហិរញ្ញវត្ថុ។ លោកបន្តនិយាយដូច្នេះ៖ «ហើយអ្វីដែលសំខាន់បំផុតគឺការបង្កើតថ្មី ដើម្បីដោះស្រាយបញ្ហាប្រឈមមួយចំនួនដែលយើងកំពុងជួបប្រទះ និងបង្ហាញថាយើងមិនប្រឈមមុខតែម្នាក់ឯងទេ»។
ចំពោះកិច្ចសហការគ្នារវាងសមាគមទាំងបីខាងលើក្នុងការជំរុញការប្រើប្រាស់បច្ចេកវិទ្យាហិរញ្ញវត្ថុនេះ ក៏ទទួលបានការគាំទ្រពេញទំហឹងពីធនាគារជាតិនៃកម្ពុជា ផងដែរ។ លោក គិត សុវណ្ណារិទ្ធ អគ្គនាយករងត្រួតពិនិត្យទី១ នៃអគ្គនាយកដ្ឋានត្រួតពិនិត្យ ធនាគារជាតិនៃកម្ពុជា បានលើកឡើងថាកិច្ចសហការរវាងABC, CMA និង CAFTនេះ គឺជាព្រឹត្តិការណ៍ដ៏សំខាន់ និងសមិទ្ធិផលសម្រាប់ឧស្សាហកម្មហិរញ្ញវត្ថុទាំងមូល។
លោកបាននិយាយថា ៖ «ការសហការគ្នារវាងសមាគមទាំងបី បានចូលរួមចំណែកដល់កិច្ចខិតខំប្រឹងប្រែងរបស់ ធនាគារជាតិនៃកម្ពុជាក្នុងការលើកកម្ពស់បរិយាបន្នហិរញ្ញវត្ថុ តាមរយៈការធ្វើឱ្យប្រសើរឡើងនៃបច្ចេកវិទ្យាហិរញ្ញវត្ថុ និងនវានុវត្តន៍។ ដូច្នេះ! ជាមួយនឹងបច្ចេកវិទ្យាហិរញ្ញវត្ថុ យើងជឿជាក់ថានឹងផ្តល់នូវភាពងាយស្រួល តម្លៃសមរម្យ លទ្ធភាពទទួលបានហិរញ្ញវត្ថុសម្រាប់សហគ្រាសធុនតូច និងមធ្យម និងប្រជាជនដែលពីមុនមិនមានលទ្ធភាពទទួលបានសេវាហិរញ្ញវត្ថុផ្លូវការ»៕