ជាតិ
នយោបាយជាតិ
១៦ឆ្នាំមកនេះ កម្ពុជាបញ្ជូនកម្លាំងជាង៨០០០នាក់ក្នុងបេសកកម្មថែរក្សាសន្តិភាពពិភពលោក
×![]()
ដោយ: រួបរួម
កម្ពុជា បាន និងកំពុងរួមចំណែកយ៉ាងសំខាន់ក្នុងកិច្ចសហប្រតិបត្តិការថែរក្សាសន្តិភាពពិភពលោក ក្រោមឆត្រអង្គការសហប្រជាជាតិ។ នេះជាការលើកឡើងរបស់សម្តេចនាយករដ្ឋមន្ត្រី ហ៊ុន សែន ក្នុងឱកាសទិវាសន្តិភាពអន្តរជាតិ ថ្ងៃទី២១ ខែកញ្ញា ឆ្នាំ២០២២។
តាមរយៈសារលិខិតចុះកាលពីថ្ងៃទី១៩ ខែកញ្ញា ប្រមុខរដ្ឋាភិបាល បានបញ្ជាក់ថា ចាប់ពីឆ្នាំ២០០៦ ដល់ឆ្នាំ២០២២ កម្ពុជា បញ្ជូនកងកម្លាំងមួកខៀវ សរុបចំនួន ៨៣០២នាក់ ក្នុងនោះស្ត្រី៥៨០នាក់ទៅបំពេញបេសកកម្មថែរក្សាសន្តិភាពរបស់អង្គការសហប្រជាជាតិ។
ប្រទេសចំនួន៩ដែលកងកម្លាំងកម្ពុជាទៅបំពេញបេសកកម្មរួមមាន ឆាត ស៊ូដង់ ស៊ូដង់ខាងត្បូង អាហ្វ្រិកកណ្តាល លីបង់ ស៊ីប ស៊ីរី ម៉ាលី និងយេម៉ែន។ បើតាមសម្តេច ហ៊ុន សែន បច្ចុប្បន្ន កងកម្លាំងកម្ពុជាសរុប៨០១នាក់ (ស្ត្រី១១៨នាក់) កំពុងបំពេញបេសកកម្មនៅស៊ូដង់ខាងត្បូង លីបង់ ម៉ាលី អាហ្វ្រិកកណ្តាល និងយេម៉ែន។
ក្នុងសារលិខិតដដែល មេដឹកនាំកម្ពុជា បានរំលឹកពីមេរៀនភ្លើងសង្គ្រាមអស់ជាងពីរទសវត្សរ៍ដ៏ជូរចត់ ជាពិសេសក្នុងរបបវាលពិឃាតខ្មែរក្រហម រហូតដល់ឈានដល់ការកសាងសន្តិភាពឡើងវិញ ដោយរាប់ចាប់ពីកិច្ចព្រមព្រៀងសន្តិភាពក្រុងប៉ារីសឆ្នាំ១៩៩១ វត្តមានរបស់អាជ្ញាធរបណ្តោះអាសន្ន (UNTAC) ដល់ឆ្នាំ១០៩៩៣ និងការទទួលបានសន្តិភាពទាំងស្រុងនៅឆ្នាំ១៩៩៨ តាមរយៈគោលនយោបាយឈ្នះ-ឈ្នះ។
ក្រៅពីលើកឡើងពីភាពជោគជ័យក្នុងការប្រយុទ្ធប្រឆាំងកូវីដ-១៩ សម្តេច ហ៊ុន សែន បានគូសបញ្ជាក់ពីកិច្ចប្រឹងប្រែងរបស់កម្ពុជាក្នុងការកែប្រែខ្លួនទៅជាប្រទេសចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសចំណូលខ្ពស់នៅឆ្នាំ២០៥០។
ក្នុងក្របខណ្ឌតំបន់ និងអន្តរជាតិ សម្តេចវាយតម្លៃខ្ពស់ពីកិច្ចប្រឹងប្រែងរបស់កម្ពុជា និងបណ្តាមេដឹកនាំសមាជិកអាស៊ាន លើការឆ្លើយតបរួមគ្នាចំពោះបញ្ហាប្រឈម សំដៅរួមចំណែកថែរក្សាសន្តិភាព ស្ថិរភាព សន្តិសុខ និងការអភិវឌ្ឍប្រកបដោយចីរភាពនៅក្នុង និងក្រៅតំបន់អាស៊ាន។
ទិវាសន្តិភាពអន្តរជាតិ ត្រូវបានអង្គការសហប្រជាជាតិកំណត់យកថ្ងៃទី២១ ខែកញ្ញា ជារៀងរាល់ឆ្នាំ។ ឆ្នាំនេះ ទិវាសន្តិភាពអន្តរជាតិ ប្រារព្ធឡើងក្រោមមូលបទ «បញ្ចប់ការរើសអើងជាតិសាសន៍ និងកសាងសន្តិភាព» ដោយផ្តោតលើការពង្រឹងសាមគ្គីភាពអន្តរជាតិ ការថែរក្សា និងការលើកកម្ពស់សន្តិភាព ស្ថិរភាព និងវិបុលសុខសម្រាប់មនុស្សជាតិ៕
Tag:
មួកខៀវ
© រក្សាសិទ្ធិដោយ thmeythmey.com
