មេដឹកនាំអាម៉េរិកលោកបៃឌិន និងមេដឹកនាំហ្វីលីពីន​ បានជួបពិភាក្សាគ្នាផ្ទាល់នៅជំនួបក្រៅ​មហាសន្និបាតអង្គការសហប្រជាជាតិ។ នេះគឺជាលើកទីមួយហើយដែល មេដឹកនាំទាំងពីរ​បាន​ជួប​មុខ​ទល់មុខផ្ទាល់តាំងពីលោក Ferdinand Marcos Jr បានឡើងកាន់តំណែងប្រធានាធិបតីហ្វីលីពីន។

 

ក្នុងសន្និសីទកាសែតក្រោយជំនួប លោក បៃឌិន បានលើកឡើងថា ខណៈភាគីទាំងពីរបានចាប់​ផ្ដើម​កិច្ចសន្ទនា លោកចង់ជជែកពីបញ្ហាសមុទ្រចិនខាងត្បូងដែលចិនកំពុងតែជះឥទ្ធិពលលើផង និង​បញ្ហា​ផ្សេងៗទៀតទាក់ទងនឹងការរីករាលជំងឺកូវីដ-១៩ និងថាមពលកើតឡើងវិញ ។

 

«តួនាទីរបស់អាម៉េរិកក្នុងការការពារសន្តិភាពនៅក្នុងតំបន់របស់ពួកយើង ជារឿងមួយដែលត្រូវបាន​កោតសរសើរយ៉ាងខ្លាំងដោយប្រទេសទាំងអស់នៅក្នុងតំបន់ និងជាពិសេសហ្វីលីពីន»។​ លោក Marcos Jr លើកឡើងបែបនេះក្នុងសន្និសីទកាសែតដដែលនោះបែបនេះ។

 

ទន្ទឹមនេះ ចំពោះទំនាក់ទំនងប្រទេសទាំងពីរដែលហាក់ល្អក់កករអំឡុងពេលចុងក្រោយនៃការកាន់​តំណែងរបស់អតីតប្រធានាធិបតីហ្វីលីពីន រ៉ូឌ្រីហ្គោ ឌូទើតេ លោក បៃឌិន បញ្ជាក់ថា ទំនាក់​ទំនង​ប្រទេសទាំងពីរនៅតែមានសារសំខាន់ទោះបីមានបញ្ហារកាំរកូសបន្តិចក៏ដោយ។

 

ទាក់ទិននឹងរឿងនៅអ៊ុយក្រែន លោក បៃឌិន ក៏បានថ្លែងអំណរគុណដល់ហ្វីលីពីនដែលបាន ប្រឆាំងនឹងការលុកលុយមួយនេះផងដែរ។ ប្រធានាធិបតី បៃឌិន បានសម្គាល់ថា ហ្វីលីពីនជា ប្រទេសមួយក្នុងចំណោមសម្ព័ន្ធមិត្តអាម៉េរិកដ៏ទៃៗទៀតដែលបានថ្កោលទោសរុស្ស៊ីយ៉ាងឆាប់រហ័ស។

 

គួរបញ្ជាក់ថា ហ្វីលីពីន គឺជាសម្ព័ន្ធមិត្តដ៏សំខាន់មួយរបស់អាម៉េរិក និងជាទីតាំងយុទ្ធសាស្ត្រដ៏សំខាន់ ក្នុងករណីដែលអាម៉េរិកត្រូវការការដាក់ពង្រាយកម្លាំងនៅតាមមូលដ្ឋានយោធាដើម្បីការពារតៃវ៉ាន់ក្នុងការឆ្លើយតបនឹងការវាយប្រហាររបស់ចិនណាមួយដែលអាចកើតមាន។ អាម៉េរិក​ចង់​បានការសម្រេច​ចិត្តលើ​មូលដ្ឋានទ័ពនៅហ្វីលីពីនឱ្យ​កាន់តែ​ច្រើន​ដោយសារ​តម្រូវការ​ក្នុង​ការ​រៀបចំ​សកម្មភាព​ឆ្លើយ​តប​នឹង​ភាព​អាសន្នបែបនេះ៕