«យើងដាក់ចេញវិធានការដាច់ណាត់តាមរយៈការចុះហត្ថលេខាលើពាក្យស្នើរបស់អ៊ុយក្រែនសម្រាប់នីតិវិធីរហ័សចូលជាសមាជិកណាតូ។» ប្រធានាធិបតីអ៊ុយក្រែន វ៉ូឡូឌីមៀ ហ្សេលេនស្គី និយាយបែបនេះក្នុងសារវីដេអូមួយដែលបង្ហោះតាមបណ្ដាញ Telegram ។ ក្នុងវីដេអូនោះ លោក ហ្សេលេនស្គី ឈរដោយនាយករដ្ឋមន្ត្រី Denys Shmygal និងប្រធានសភាអ៊ុយក្រែន។

 

ក្នុងសារដដែល ប្រធានាធិបតីអ៊ុយក្រែន ក៏បញ្ជាក់ជាថ្មីពីការត្រៀមខ្លួនចរចាជាមួយរុស្ស៊ី ប៉ុន្តែមិនមែនលោក វ៉្លាឌីមៀ ពូទីន ឡើយ។

 

រុស្ស៊ីនៅថ្ងៃទី៣០ ខែកញ្ញា បានបញ្ចូលទឹកដីអ៊ុយក្រែនជាផ្លូវការមាន Luhansk, Donetsk, Kherson region និង Zaporizhzhia។ ក្នុងពិធីអធិកអធមមួយនៅវិមានក្រេមឡាំង លោក ពូទីន និយាយថា ការបញ្ចូលទឹកដីអ៊ុយក្រែន ជាឆន្ទៈរបស់ប្រជាជនរាប់លាននាក់ ហើយប្រជាជនក្នុងតំបន់ទាំងនោះ ក្លាយជាប្រជាជនរុស្ស៊ីរហូត។​ 

 

ជាមួយគ្នានេះ លោក ពូទីន ក៏ប្រកាសការពារទឹកដីដែលទើបបញ្ចូលនេះ ជាមួយនឹងការគំរាមនុយក្លេអ៊ែរទៀតផង។ លោក ពូទីន អះអាងថា អាម៉េរិកជាអ្នកបង្កើតឱ្យមានទម្លាក់នេះតាមរយៈការប្រើនុយក្លេអ៊ែរនៅជប៉ុនអំឡុងសង្រ្គាមលោកលើកទី២ ។

 

នៅឯអង្គការសហប្រជាជាតិវិញ រុស្ស៊ីក៏បានបោះឆ្នោតប្រឆាំងដំណោះស្រាយមួយរបស់ក្រុមប្រឹក្សាសន្តិសុខ ដែលថ្កោលទោសទង្វើរបស់ខ្លួន ខណៈចិនបានបោះឆ្នោអនុប្បវាទ។ ជាមួយគ្នានេះ អង់គ្លេស ក៏ប្រកាសដាក់ទណ្ឌកម្មបន្ថែមលើរុស្ស៊ី ស្របពេលដែលអាម៉េរិកនឹងចាត់វិធានការដូចគ្នាដែរ៕