អំឡុងពេលរីករាលដាលខ្លាំងនៃជំងឺកូវីដ-១៩ វិស័យទេសចរណ៍កម្ពុជា បានជាប់គាំង ដោយមិនមានវត្តមានទេសចរអន្តរជាតិ។ ចំណែកទេសចរជាតិ ចេញដើរកម្សាន្តតិចតួចប៉ុណ្ណោះតាមតំបន់ទេសចរណ៍ធម្មជាតិ។ ការណ៍នេះ បានធ្វើឱ្យខេត្តក្រុងមួយចំនួនស្ងប់ស្ងាត់យ៉ាងខ្លាំង។ 

 

ទោះជំងឺកូវីដ-១៩ ធ្វើឱ្យមានបញ្ហាជាច្រើនកើតឡើង តែលោក តុប សុភ័ក រដ្ឋលេខាធិការក្រសួងទេសចរណ៍ អះអាងថា ជំងឺកូវីដ-១៩ ក៏បានផ្ដល់ឱកាសឱ្យរដ្ឋាភិបាលកសាងផលិតផលទេសចរណ៍បន្ថែមដែរ។ លោកបន្តថា រដ្ឋាភិបាលកម្ពុជា បានកសាងហេដ្ឋារចនាសម្ព័ន្ធមួយចំនួនរយៈពេលជាង២ឆ្នាំនេះ សម្រាប់គាំទ្រដល់វិស័យទេសចរណ៍។

 

«ពេលដែលមានវិបត្តិក៏ជាពេលឱកាសសម្រាប់យើងដែរ។ ប៉ុន្តែមិនមានមានន័យថាយើងចង់ឱ្យមានវិបត្តិកើតឡើងទេ។ អំឡុងពេលយើងស្ថិតក្នុងបញ្ហាប្រទាក់ក្រឡា យ៉ាងស្មុគស្មាញនេះ ក៏ជាឱកាសមួយសម្រាប់យើង។ រដ្ឋាភិបាលបានកសាងហេដ្ឋារចនាសម្ព័ន្ធ ដែលគាំទ្រដល់វិស័យទេសចរណ៍ ជាក់ស្ដែងផ្លូវនៅព្រះសីហនុ ៣៤ខ្សែ ផ្លូវនៅសៀមរាប ៣៨ខ្សែ និងច្រកទ្វារអន្តរជាតិប៉ោយប៉ែតថ្មី»។ លោក តុប សុភ័ក លើកឡើងដូច្នេះក្នុងសន្និសីទសារព័ត៌មាន ស្ដីពី «សមិទ្ធផលសម្រេចបានរយៈពេល ៥ឆ្នាំកន្លងមករបស់ក្រសួងទេសចរណ៏»។

 

លោក តុប សុភ័ក បន្តថាក្រោយស្ថានភាពជំងឺកូវីដ-១៩ធូរស្រាលក្នុងឆ្នាំ២០២២នេះ វិស័យទេសចរណ៍កម្ពុជាបានងើបឡើងវិញបន្តិចម្ដងៗ។ កម្ពុជា បានក្លាយជាគោលដៅទេសចរណ៍មានសុវត្ថិភាព និងមានទំនុកចិត្តសម្រាប់ភ្ញៀវទេសចរ តាមរយៈចំនួនអ្នកទទួលបានវ៉ាក់សាំងបង្ការជំងឺកូវីដ-១៩។

 

សូមជម្រាបថា រយៈពេល៨ខែនៃឆ្នាំ២០២២ កម្ពុជាមានទេសចរផ្ទៃក្នុងប្រមាណ ៨លាន៥០ម៉ឺននាក់ កើនឡើង ២៤៥ភាគរយ។ ជាមួយគ្នានោះ កម្ពុជា ក៏ទទួលបានទេសចរអន្តរជាតិ រហូតដល់ជិត១លាននាក់ ដែលកើនឡើង ៥៨០ភាគរយ បើធៀបនឹងរយៈពេលដូចគ្នានៃឆ្នាំ២០២១៕