នៅក្នុងភាគទី៨ នៃរឿងLittle Women អតីតទាហានជើងចាស់មួយរូបមកពីកូរ៉េខាងត្បូង បានរៀបរាប់ប្រាប់តួអង្គសំខាន់មួយរូបនៅក្នុងរឿងជុំវិញ ការសម្លាប់ទាហានវៀតកុង ២០រូប ដោយធៀននឹងការស្លាប់របស់ទាហានមកពីកូរ៉េខាងត្បូងមួយរូប។ ក្នុងរឿងភាគមួយនេះ ទាហានកូរ៉េខាងត្បូងច្រើនជាង ៣២ម៉ឺននាក់ ត្រូវបានបញ្ជូនទៅវៀតណាម ដើម្បីជួយអាម៉េរិកក្នុងសង្រ្គាមនៅវៀតណាម នៅចន្លោះឆ្នាំ ១៩៦៤ ដល់ឆ្នាំ១៩៧៣។ 

 

តួអង្គទាហានជើងចាស់រូបនោះ បានរៀបរាប់ថា ទាហានកូរ៉េខាងត្បូងមួយនាក់ បានសម្លាប់ទាហានវៀតណាមច្រើនជាង ២០រូបឯណោះ។ យ៉ាងណាមិញ គេមិនបានដឹងឡើយថាតើទាហានវៀតណាមខាងជើងប៉ុន្មានរូប ត្រូវបានសម្លាប់ដោយទាហានកូរ៉េខាងត្បូង។ 

 

ទាក់ទិននឹងប្រវត្តិសាស្រ្តខ្លួនបែបនេះ អាជ្ញាធរវៀតណាមទទួលបន្ទុកលើប្រព័ន្ធផ្សព្វផ្សាយ និងព័ត៌មានអេឡិចត្រូនិច បានដាក់លិខិតមួយទៅក្រុមហ៊ុន Netflix ឱ្យលុបចោលរឿងកូរ៉េខាងត្បូងមួយនោះ នៅក្នុងប្រទេសខ្លួន ក្រោមហេតុផលបំពានច្បាប់ប្រទេស និងខុសប្រវត្តិសាស្រ្តវៀតណាម រួមទាំងជាការវាយប្រហារលើប្រទេស និងវីរបុរសវៀតណាម។ 

 

ក្នុងលិខិតដដែលនោះ វៀតណាមបា​នដាក់កំហិតឱ្យក្រុមហ៊ុន Netflix លុបចោលរឿងភាគកូរ៉េខាងត្បូងចេញត្រឹមថ្ងៃទី៥ ខែតុលានេះ ខណៈរឿងLittle Women នៅតែបន្តចាក់ផ្សាយនៅរសៀលថ្ងៃទី៥ ខែតុលាដដែល។ 

 

គួររំឭកថា ចាប់តាំងពីឆ្នាំ២០២០ ក្រុមហ៊ុន Netflix បានលុបរឿងចំនួន ៣ នៅវៀតណាម បន្ទាប់ពីមានការតវ៉ាពីអាជ្ញាធរ ជុំវិញការបំពានអធិបតេយ្យរបស់វៀតណាម៕