ក្នុងជំនួបជាមួយលោកឧត្តមសេនីយ៍ឯក ស៊ីមុន ស្ទូអាត (Simon Stuart) មេបញ្ជាការកងទ័ពជើងគោកអូស្ត្រាលី លោកឧត្តមសេនីយ៍ឯក ហ៊ុន ម៉ាណែត មេបញ្ជាការកងទ័ពជើងគោកកម្ពុជា បានផ្តួចផ្តើមគំនិតឲ្យបង្កើនទំនាក់ទំនងរវាងកងទ័ពជើងគោកប្រទេសទាំងពីរថែមមួយកម្រិតទៀត។

 ជំនួបនេះ ប្រព្រឹត្តទៅក្នុងថ្ងៃទី៤ ខែតុលា ឆ្នាំ២០២២ ក្នុងឱកាសដែលលោក ហ៊ុន ម៉ាណែត ទៅបំពេញទស្សនកិច្ច និងចូលរួមពិធីពិព័រណ៍ការពារដែនគោគអន្តរជាតិ ដែលត្រូវបានរៀបចំឡើងនៅប្រទេសអូស្ត្រាលី។ 

 

លោកឧត្តមសេនីយ៍ឯក ស៊ីមុន ស្ទូអាត ឆ្លើយតបថា លោកឯកភាពចំពោះគំនិត និងសំណើរបស់លោកឧត្តមសេនីយ៍ឯក ហ៊ុន ម៉ាណែត។ មេបញ្ជាការកងទ័ពជើងគោកអូស្ត្រាលី ថែមទាំងលើកឡើងថា ភាគីទាំងពីរ អាចពិនិត្យមើលកិច្ចសហប្រតិបត្តិការលើការងារជំនួយមនុស្សធម៌ និងការសង្គ្រោះពីគ្រោះមហន្តរាយបន្ថែមទៀតនៅពេលអនាគត។

 

ជាមួយគ្នានេះ មេបញ្ជាការកងទ័ពជើងគោកអូស្ត្រាលី បានវាយតម្លៃខ្ពស់ចំពោះជោគជ័យរបស់កម្ពុជាក្នុងការប្រយុទ្ធប្រឆាំងនឹងជំងឺកូវីដ-១៩ ហើយបានស្នើឲ្យមេបញ្ជាការកងទ័ពជើងគោកកម្ពុជា ចែករំលែកបទពិសោធពាក់ព័ន្ធនឹងការទប់ស្កាត់ជំងឺរាតត្បាតនេះ។ លោក ហ៊ុន ម៉ាណែត ចែករំលែកអំពីវិធានការនានារបស់រាជរដ្ឋាភិបាលកម្ពុជា ដែលបានដាក់ចេញ ដើម្បីទប់ស្កាត់ជំងឺកូវីដ-១៩។ 

 

បន្ថែមពីនេះ លោក ហ៊ុន ម៉ាណែត បានអរគុណរដ្ឋាភិបាល និងប្រជាជនអូស្រ្តាលី ដែលតែងជួយឧបត្ថម្ភដល់កម្ពុជា ជាពិសេសក្នុងដំណាក់កាល ដែលកម្ពុជាស្វែងរកសន្តិភាព និងការកសាងប្រទេសកម្ពុជាឡើងវិញ។ 

 

ក្រៅពីជំនួបជាមួយមេបញ្ជាការកងទ័ពជើងគោកអូស្រ្តាលី លោក ហ៊ុន ម៉ាណែត ក៏មានជំនួបជាមួយមេបញ្ជាការកងទ័ពជើងគោកនៃប្រទេសដទៃទៀតដែរ ដូចជា ជំនួបជាមួយលោកឧត្តមសេនីយ៍ទោ ចន បូស្វេល (John Boswell) មេបញ្ជាការកងទ័ពជើងគោកនូវែលសេឡង់ និងជំនួបជាមួយឧត្តមសេនីយ៍ឯក រ៉ូមីអូ ប្រ័រនើ ជូនៀ (Romeo S Brawner Junior) មេបញ្ជាការកងទ័ពជើងគោកហ្វីលីពីន ជាដើម ដែលបានទៅចូលរួមពិធីពិព័រណ៍ការពារដែនគោកអន្តរជាតិនៅអូស្ត្រាលីដែរ៕