ឧស្សាហកម្មយានយន្តនៅកម្ពុជាកំពុងពង្រឹងការលក់រថយន្តថ្មីដល់ប្រជាជន។ រថយន្តភាគច្រើន ត្រូវបាននាំចូលជារថយន្តមូល។ ចំណែក រថយន្តផ្សេងទៀត ត្រូវបាននាំចូលជាគ្រឿងបង្គុំ និងយកមកដំឡើងនៅរោងចក្រក្នុងស្រុកផងដែរ។ ការណ៍នេះ បានធ្វើឱ្យរថយន្តលក់ក្នុងស្រុកមានតម្លៃទាប ដែលរថយន្តទាំងនោះនាំចូលពីប្រទេសថៃ។ ការនាំចូលរថយន្តថ្មី និងគ្រឿងបង្គុំសម្រាប់ដំឡើងនៅក្នុងស្រុក ក៏បានកើនឡើងគួរឱ្យកត់សម្គាល់។
 

លោក គុណ ញឹម អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា លើកឡើងក្នុងសន្និសីទសារព័ត៌មាន​ស្តីពីវឌ្ឍនភាពនៃការអនុវត្ដប្រមូលពន្ធលើយានយន្ដគ្មានពន្ធ និងអាករនាំចូលដែលមានស្រាប់ក្នុងប្រទេស នាថ្ងៃទី៥ ខែតុលា ថា៖ «ការនាំចូលរថយន្តថ្មីភាគច្រើន គឺនាំចូលមកពីប្រទេសថៃ ព្រោះប្រទេសនេះជាសមាជិកអាស៊ាន និងជាសមាជិកនៃកិច្ចព្រមព្រៀង ATIGA (ASEAN Trade in Goods Agreement)។ ការនាំចូលរថយន្តមកពីថៃ ស្ថិតក្នុងអត្រាពន្ធសូន្យ ដោយជាប់តែអាករពិសេស និងអាករលើតម្លៃបន្ថែមប៉ុណ្ណោះ ដែលនាំឱ្យបន្ទុកពន្ធធ្លាក់ចុះ ធ្វើឱ្យតម្លៃរថយន្តធ្លាក់ចុះផងដែរ»។