ជុំវិញការលើកឡើងរបស់លោក សម រង្ស៊ី នេះ ត្រូវបានសម្ដេច ហ៊ុន សែន ចំអកវិញថា លោក សម រង្ស៊ី ឈ្នះ ដោយសារតុលាការមិនបានសម្រេចឱ្យបង់លុយ១អឺរ៉ូ ជូនសម្ដេច តាមបណ្ដឹងទាមទារប៉ុណ្ណោះ។ ប្រមុខរដ្ឋាភិបាល ក៏បានផ្ដាំដៃគូនយោបាយប្រឆាំងខ្លួនជិត៣០ឆ្នាំនេះទៀតថា បើមិនសុខចិត្តលើការសម្រេចរបស់តុលាការ ហើយប្ដឹងទៅឧទ្ធរណ៍បារាំងនោះ សម្ដេច កំដរលេងបានគ្រប់ពេល។ 

កន្លងមកលោក សម រង្ស៊ី បានចោទសម្ដេច ហ៊ុន សែន ថា ជាអ្នកនៅពីក្រោយ មរណភាពរបស់លោក ហុក ឡង់ឌី អតីតអគ្គស្នងការនគរបាលជាតិ ដោយសារការផ្ទុះយន្តហោះ កាលពីឆ្នាំ២០០៨ ។ មេដឹកបនាំប្រឆាំងមួយនេះ បានអះអាងទៀតថា លោក ឌី វិជ្ជា ដែលជាកូនប្រុសលោក ហុក ឡង់ឌី ក៏មានបំណងសងសឹកឱ្យឪពុកផងដែរ ដោយមានសម្តេច ស ខេង ឧបនាយករដ្ឋមន្រ្តី-រដ្ឋមន្រ្តីក្រសួងមហាផ្ទៃ គាំទ្រផែនការសងសឹកនេះ។ នេះជាមូលហេតុ ដែលនាំឱ្យសម្តេច ហ៊ុន សែន និងលោក ឌី វិជ្ជា រួមគ្នាប្តឹងលោក សម រង្ស៊ី ទៅតុលាការបារាំងពីបទបរិហារកេរ្តិ៍ តាំងពីអំឡុងខែសីហា ឆ្នាំ២០១៩មកម្ល៉េះ។ 
 

សម្តេច ស ខេង ក៏ប្តឹងលោក សម រង្ស៊ី ពីបទបរិហារកេរ្តិ៍ដែរ តែសម្តេច សម្រេចដាក់បណ្តឹងនៅតុលាការស្រុកខ្មែរ មិនដាក់បណ្តឹងទៅតុលាការបារាំងនោះទេ៕