ជាតិ
នយោបាយជាតិ
សាលក្រមតុលាការបារាំង៖ លោក ហ៊ុន ម៉ានី ថាសម្តេច ហ៊ុន សែន ជា មាសសុទ្ធ មិនខ្លាចភ្លើង
សម្ដេច ហ៊ុន សែន និងលោក ហ៊ុន ម៉ានី។ រូបភាពពីហ្វេសប៊ុកលោក ហ៊ុន ម៉ានី
×![]()
ភ្នំពេញ៖ តាមរយៈសាលក្រមសាលាដំបូងរបស់តុលាការប្រទេសបារាំង លោក ហ៊ុន ម៉ានី អះអាងថា សេចក្ដីសម្រេចរបស់តុលាការបារាំង បានផ្ដល់នូវភាពស្អាតស្អំ និងយុត្តិធម៌ដល់សម្ដេច ហ៊ុន សែន ថែមទៀត។
តែប៉ុន្មានម៉ោងក្រោយការប្រកាសសាលក្រមនៅឯប្រទេសបារាំងជុំវិញសំណុំរឿងដែលសម្តេច ហ៊ុន សែន ប្ដឹងលោកសម រង្ស៊ី សម្ដេច ហ៊ុន សែន បានអានសេចក្តីសម្រេចនោះដែលបញ្ជាក់ថា សម្តេចមិនបានពាក់ព័ន្ធនឹងករណីមរណភាពរបស់លោក ហុក ឡងឌី នៅក្នុងហេតុការណ៍ធ្លាប់ឧទ្ធម្ភាគចក្រក្នុងឆ្នាំ២០០៨ តាមការចោទប្រកាន់របស់លោក សម រង្ស៊ីនោះឡើយ។
លោក ហ៊ុន ម៉ានី ដែលជាកូនផង និងជាសមាជិករបស់គណបក្សកាន់អំណាចផង បានសាទរចំពោះសេចក្តីសម្រេចរបស់តុលាការបារាំង ដែលអត្ថាធិប្បាយថា បានផ្តល់ភាពស្អាតស្អំដល់មេដឹកនាំរបស់ប្រទេសកម្ពុជា។ សម្រាប់លោក ហ៊ុន ម៉ានី សាលក្រមរបស់តុលាការបារាំងបានបង្ហាញថា ការចោទប្រកាន់ដោយគ្មានភស្តុតាងពីក្រុមចលនាប្រឆាំង គឺជាការប៉ុនប៉ង បំភ្លៃការពិតដើម្បីធ្វើឱ្យប៉ះពាល់ដល់កិត្តិយសរបស់ថ្នាក់ដឹកនាំ។
លោក ហ៊ុន ម៉ានី បានសរសរនៅលើទំព័រហ្វេសប៊ុករបស់លោកយ៉ាងដូច្នេះថា៖«តែទោះយ៉ាងណាក្ដី ទង្វើទាំងនោះតែងទទួលបរាជ័យ ដោយសារ មាសសុទ្ធមិនខ្លាចភ្លើង។ សម្តេចតេជោគឺជាមាសសុទ្ធ ដែលមិនខ្លាចការប្រឈមជាមួយសកម្មភាពចោទប្រកាន់អគតិណាមួយឡើយ។»។
សេចក្តីសម្រេចរបស់តុលាការទីក្រុងប៉ារីស បានអនុញ្ញាតឱ្យ លោក ហ៊ុន ម៉ានី បានរម្លឹកឡើងវិញអំពីវីរភាព និងការលះបង់របស់ឪពុករបស់លោកចំពោះប្រទេសជាតិទៀតផង។ ការលះបង់ជីវិតក្នុង១០៥សមរភូមិ ការផ្តួលរំលំរបបខ្មែរក្រហម ការស្វែងរកសន្តិភាព និងការអនុវត្តដោយជោគជ័យនូវនយោបាយឈ្នះឈ្នះដើម្បីបង្រួបបង្រួមទឹកដី គឺជាព្រឹត្តិការណ៍ប្រវត្តិសាស្ត្រជាក់ស្ដែងរបស់សម្តេច ហ៊ុន សែន។ នេះបើតាមបញ្ជាក់របស់លោក ហ៊ុន ម៉ានី ដែលអះអាងថា គ្មានអ្នកណាអាចបំភ្លៃបាន។
ទន្ទឹមគ្នានេះ តំណាងរាស្ត្រមណ្ឌលកំពង់ស្ពឺ ក៏និយាយចំអកដល់អ្នកនយោបាយ និងអ្នកវិភាគព្រឹត្តិការណ៍នយោបាយមួយចំនួន ថាពួកគេមិនបានខ្វល់ខ្វាយ និងគិតគូរអំពីផលប៉ះពាល់នានាមកលើកម្ពុជា ដែលកើតចេញពីការផ្ទុះជំងឺកូវីដ និងសង្គ្រាមអ៊ុយក្រែន-រុស្ស៊ីនោះទេ។
លោក ហ៊ុន ម៉ានី បានធៀបប្រៀបសម្តេច ហ៊ុន សែន ទៅនឹងអ្នកដឹកនាំប្រទេសពិតប្រាកដ រីឯអ្នកនយោបាយប្រឆាំង គឺជាអ្នកតាំងខ្លួនជាអ្នកដឹកនាំ៕
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
7 ថ្ងៃ
