ក្នុងការឆ្លើយតបនឹងសំណួរអំពីផលប៉ះពាល់របស់ទណ្ឌកម្មអាម៉េរិក នាយកប្រតិបត្តិតំបន់រដ្ឋបាល​ពិសេសហុងកុង John Lee អះអាងថា ទង្វើរបស់អាម៉េរិកបែបនេះ ជា​ទង្វើ​ព្រៃផ្សៃ​ណាស់ ហើយ​លោក​នឹង​មិនអធិប្បាយ​លើ​ផលប៉ះពាល់​នៃ​ទង្វើ​ព្រៃផ្សៃ​បែប​នេះ​ទេ។

 

«យើងអស់សំណើចពីអ្វីដែហៅថាទណ្ឌកម្ម»។ លោក Lee បានលើកឡើងបែបនេះរួចបន្តរិះគន់​អាម៉េរិក និងលោកខាងលិចថា ចេះតែដាក់ទណ្ឌកម្មលើប្រទេស និងបុគ្គលដទៃដោយគ្មាន​មូលដ្ឋាន​ច្បាប់ និងដោយឯកតោភាគី​ ឬធ្វើឡើងតែក្នុងចំណោមប្លុកខ្លួនឯង។ ចំណែកឯហុងកុងវិញសន្យានឹង អនុលោម​តាម​ដំណោះស្រាយ​ណាមួយ​របស់​អង្គការសហប្រជាជាតិ​ស្តីពី​ទណ្ឌកម្មព្រោះ​ហុងកុង​មាន​មូលដ្ឋាន​ច្បាប់​ដើម្បី​អនុវត្ត​តាម។

 

លោក Lee ជាមន្ត្រីចិនម្នាក់ក្នុងចំណោមមន្ត្រីចិនជាច្រើននាក់ដែលត្រូវបានរងទណ្ឌកម្មអាម៉េរិកក្នុងឆ្នាំ ២០២០ ដោយសារពាក់ព័ន្ធការធ្វើឱ្យធ្លាក់ចុះសេរីភាពនយោបាយនៅក្នុងទីក្រុងហុងកុង។

 

ការលើកឡើងរបស់មេដឹកនាំហុងកុងខាងលើ កើតឡើងស្របពេលទីក្រុងវ៉ាស៊ីនតោនកំពុងជំរុញឱ្យអាជ្ញាធរទីក្រុងនេះចាត់វិធានការលើនាវាកម្សាន្តរបស់មហាសេដ្ឋីរុស្ស៊ីលោក Alexei Mordashov ដែលរងទណ្ឌកម្មលោកខាងលិច ដោយសារមានទំនាក់ទំនងជិតស្និទ្ធជាមួយប្រធានាធិបតីរុស្ស៊ី វ្ល៉ាឌីមៀ ពូទីន។ នាវាកម្សាន្តនេះ ទៅដល់​ក្រុង​ហុងកុង​កាល​ពីថ្ងៃទី៥ ខែតុលា។​ ខណៈដែលហុងកុងមិនធ្វើអ្វី អាម៉េរិកព្រមានហុងកុងថា កំពុងតែបំផ្លាញកេរ្តិ៍ឈ្មោះ​ខ្លួនឯងក្នុង​នាម​ជា​មជ្ឈមណ្ឌលហិរញ្ញវត្ថុមួយ៕