«មេត្តាកុំបន្តចែករំលែក ឬផ្ញើរូបភាព ឬវីដេអូ​ ដែលបង្ហាញហេតុការដ៏អកុសលនេះលើបណ្តាញសង្គម ពីព្រោះទង្វើនេះ នឹងបង្កផលប៉ះពាល់អវិជ្ជមានទៅលើកុមារ គ្រួសារជនរងគ្រោះ និងមនុស្ស​ជាទីស្រឡាញ់របស់ពួកគេ»។​ ​នេះជាការអំពាវនាវ​របស់​អង្គការយូនីសេហ្វ​ប្រចាំកម្ពុជា ក្នុង​សារ​រំលែកទុក្ខ​ចំពោះ​ការបាត់បង់ជីវិត​កុមារ​ដែលជាសិស្ស​សាលា។

 

គ្រោះថ្នាក់ដ៍រន្ធត់នេះ បាន​កើតឡើងកាលពីយប់ថ្ងៃទី១៣ ខែតុលា ដោយបានសម្លាប់ជីវិតកុមារដែលជាសិស្សសាលាសរុប១១នាក់ក្នុងចំណោមមនុស្ស១៥នាក់ដែលនៅលើទូក។ កុមារ៤រូបទៀត បានរួចផុតពីសេចក្តីស្លាប់។ សាកសពកុមារាឈ្មោះ មាស សុវណ្ណារាជ អាយុ១៤ឆ្នាំ ត្រូវបានរកឃើញ នាព្រឹកថ្ងៃទី១៥ ខែតុលានេះ ដែលជាសាកសពចុងក្រោយ។

 

ការ​បង្ហោះរូប​ភាព​កុមាររងគ្រោះ ជាពិសេស​សាកសព​ដោយមិនមាន​ការបិទបាំង គឺជាការរំលោភបំពាន​មួយ​ទៅលើ​ជន​រងគ្រោះ និងក្រុមគ្រួសារជន​រងគ្រោះ ខណៈមួយចំនួន​នៅ​តែ​ប្រព្រឹត្ត​ទង្វើ​ខ្វះពិចារណា​បែបនេះ ដើម្បី​ទទួលបាន​ការ​ Like ការ Share ពីគណនី ឬទំព័រ​ហ្វេសប៊ុក​របស់ខ្លួន។

 

 បន្ថែមពី​លើនេះ បុគ្គលមួយចំនួន ព្យាយាម​រំខាន​ក្រុមគ្រួសារ ជាពិសេសឪពុកម្តាយ​កុមារ​រងគ្រោះ ដូចជាការ​សម្ភាស​សាកសួរមតិយោបល់ និងអារម្មណ៍ផ្សេងៗ ខណៈពួក​គាត់​ត្រូវ​ការ​ស្ងប់អារម្មណ៍៕