នៅម៉ោង៣ និង ៤៥នាទី កីឡដ្ឋានខេមបូឌៀអ៊ែរវេរបស់បឹងកេត ទទួលគិរីវង់សុខសែនជ័យ។ នាជំនួប២លើកកន្លងមក ម្ចាស់ផ្ទះបឹងកេតដែលបច្ចុប្បន្នស្ថិតនៅលេខ៣លើតារាង បានយកឈ្នះទាំងពីរលើកលើក្រុមបាតគិរីវង់ ក្នុងលទ្ធផល ៦-០ និង៤-០។

 

ជំនួប៣គូទៀត សុទ្ធតែប្រព្រឹត្តទៅនាវេលាម៉ោង៦ និង៣០នាទីយប់ ដោយណាហ្គាវើលដ៍ ប្រកួតនៅកីឡដ្ឋានខេត្តកំពង់ស្ពឺរបស់ខ្លួនជាលើកទី២ ជាមួយក្រុមភ្ញៀវភ្នំពេញក្រោន។ ក្រុមទាំងពីរស្មើគ្នា ០-០ នៅជើងទីមួយ ហើយភ្នំពេញក្រោនឈ្នះ ៤-១ នៅជើងទីពីរ។ ពួកគេក៏ទើបជួបគ្នានៅក្នុងពានរង្វាន់សម្តេច ហ៊ុន សែន ផងដែរ ដោយភ្នំពេញក្រោនឈ្នះដោយការសម្រេចប៉េណាល់ទី ក្រោយលទ្ធផលទាំងពីរជើងគ្មានការស៊ុតបាល់បញ្ចូលទី។ បច្ចុប្បន្ន ភ្នំពេញក្រោនឈរលេងរៀងទី៤ និងណាហ្គាវើលដ៍នៅទី៥។

 

នៅស្តាតចាស់ឯណោះវិញ ក្រុមលេខ៧ កងយោធពលខេមរភូមិន្ទ ឬ Tiffy Army ទទួលក្រុមលេខ២ វិសាខា។ ជើងទីមួយ វិសាខាឈ្នះ ៣-០ ហើយកងយោធពលខេមរភូមិន្ទ សងសឹក ១-០ វិញនៅជើងទីពីរ។  សម្រាប់ជំនួបថ្មីៗ ក្នុងពានរង្វាន់សម្តេច ហ៊ុន សែន វិញ វិសាខា បានឈ្នះទាំងពីរជើងក្នុងលទ្ធផល ៣-១ និង ៣-០។

 

ស្របពេលជាមួយគ្នា ក្រុមកំពូលតារាងព្រះខ័នរាជស្វាយរៀង បើកកីឡដ្ឋានស្វាគមន៍ភ្ញៀវពីសៀមរាប គឺអង្គរថាយហ្គឺរ ដែលឈរនៅលេខរៀងទី៦។ ក្នុងជំនួបពីរលើកកន្លងមក ព្រះខ័នរាជស្វាយរៀង ឈ្នះទាំងពីរជើង ជាមួយនឹងលទ្ធផល ៤-១ និង ៤-០៕