អំឡុងការប្រកួតទល់ក្រុម Tottenham Hotspur ក្នុងទឹកដី Old Trafford កាលពីថ្ងៃទី១៩ ខែតុលា​ ដែល Man United បានយកឈ្នះក្នុងលទ្ធផល ២-០ ខ្សែប្រយុទ្ធវ័យ ៣៧ឆ្នាំ មិនត្រូវបានគ្រូបង្វឹកផ្លាស់ប្តូររូបគេឱ្យចូលលេងឡើយ។ នៅនាទី ៨៩នៃការប្រកួតដែលហៀបនឹងបញ្ចប់ Ronaldo បានបង្ហាញអាកប្បកិរិយាមិនសប្បាយចិត្ត ហើយបានដើរចេញពីទីលានមុនបញ្ចប់ការប្រកួត។ 
 

ចំណែកក្រោយពីការប្រកួតបានបញ្ចប់ទៅអ្នកចាត់ការសញ្ជាតិហូឡង់ លោក Erik ten Hag មិនបាននិយាយអ្វីខ្លាំងទាក់ទងនឹងរឿងដែល Ronaldo ចាកចេញពីក្រុមមុនការប្រកួតបញ្ចប់នោះទេ។ អ្នកចាត់ការវ័យ ៥២ឆ្នាំ បានត្រឹមតែនិយាយពីបញ្ហា Ronaldo អំឡុងកិច្ចសម្ភាស៍ជាមួយទូរទស្សន៍ Sky Sports ក្នុងកីឡដ្ឋានក្រោយប្រកួតតិចតួចប៉ុណ្ណោះ ។
 

«ខ្ញុំនឹងបកស្រាយអំពីបញ្ហាវិន័យជាមួយ Ronaldo នៅថ្ងៃស្អែក ប៉ុន្តែពេលនេះយើងត្រូវការអបអរជ័យជម្នះថ្ងៃនេះសិន។ Cristiano Ronaldo នឹងមិនក្លាយជាផ្នែកនៃក្រុម Manchester United សម្រាប់ការប្រកួតដែលនឹងធ្វើឡើងនាថ្ងៃទី២១ ទល់ក្រុម Chelsea ឡើយ ហើយក្រុមកីឡាករផ្សេងទៀតត្រូវការផ្តោតអារម្មណ៍ខ្លាំងសម្រាប់ការប្រកួតបន្ទាប់។»។ លោក Ten Hag បាននិយាយក្នុងកិច្ចសម្ភាស៍ជាមួយទូរទស្សន៍ Sky Sports បែបនេះ។
 

​​​អាកប្បកិរិយា Ronaldo ពេលជួប Spur រងការរិះគន់ខ្លាំងពីសំណាក់អតីតកីឡាករ Manchester United Peter Schmeichel។ អតីតអ្នកចាំទីរូបនេះ និយាយថាខ្សែប្រយុទ្ធវ័យ ៣៧ឆ្នាំ កំពុងក្លាយជាមនុស្សរំខាននៅក្នុងទឹកដី Old Trafford។
 

កាលពីរដូវកាលមុនក្រោយវិលត្រលប់មកបិសាចក្រហមជាថ្មី Ronaldo រកបាន២៤គ្រាប់ឱ្យ Man United រាល់គ្រប់ការប្រកួត ដែលជាការផ្ទេរមកពីក្រុម Juventus។ ឆ្លងកាត់ ១០ប្រកួតនៃ Premier league ខ្សែប្រយុទ្ធក្រុមជម្រើសជាតិព័រទុយហ្គាល់ទើបតែបង្ហាញខ្លួន ២ប្រកួតប៉ុណ្ណោះនៃ Premier League។
 

​បច្ចុប្បន្ន Man United ស្ថិតនៅចំណាត់ថ្នាក់លេខ៥ នៃ Premier League មាន ១៩ពិន្ទុ ដោយឈរពីក្រោមក្រុម Chelsea លេខ៤ ត្រឹមតែ ១ពិន្ទុប៉ុណ្ណោះ ឆ្លងកាត់ ១០ប្រកួតមកនេះ៕