អន្តរជាតិ
លោក Biden ថា បើរុស្ស៊ីហ៊ានប្រើ «អាវុធនុយក្លេអ៊ែរកលយុទ្ធ» នោះវាគឺជា «កំហុសដ៏ធ្ងន់ធ្ងរ» ស្ត្រីម្នាក់ដើរកាត់ស្ថានីយ៍ប្រេងឥន្ធនៈមួយ ដែលត្រូវបានបំផ្លាញដោយការបាញ់ប្រហាររបស់ទាហានរុស្ស៊ី នៅទីក្រុង Dnipro ប្រទេសអ៊ុយក្រែន ថ្ងៃទី ២៦ ខែតុលា ឆ្នាំ ២០២២។ ចែករំលែក
× ប្រធានាធិបតីសហរដ្ឋអាមេរិកលោក Joe Biden បានចេញការព្រមានខ្លាំងក្លាមួយលើប្រទេសរុស្ស៊ីកាលពីថ្ងៃអង្គារ ដោយព្រមានប្រឆាំងនឹងការប្រើគ្រាប់បែកផ្ទុកសារធាតុវិទ្យុសកម្ម ឬក៏អាវុធនុយក្លេអ៊ែរណាមួយផ្សេងទៀត នៅក្នុងសង្គ្រាមនៅប្រទេសអ៊ុយក្រែន។
នៅពេលដែលអ្នកយកព័ត៌មានម្នាក់បានសួរថា តើប្រទេសរុស្ស៊ីកំពុងបង្កើត «ប្រតិបត្តិការបង្វែរដាន» ដោយត្រៀមដាក់គ្រាប់បែកផ្ទុកសារធាតុវិទ្យុសកម្ម ដូចដែលខ្លួនបានចោទអ៊ុយក្រែនថាបានបំផ្ទុះគ្រាប់បែកនេះនៅក្នុងដែនដីរបស់ខ្លួន ឬក៏យ៉ាងណានោះ លោក Biden បាននិយាយថា៖
«ប្រទេសរុស្ស៊ីនឹងប្រព្រឹត្តិកំហុសដ៏ធ្ងន់ធ្ងរបំផុត ប្រសិនបើប្រទេសនេះប្រើអាវុធនុយក្លេអ៊ែរកលយុទ្ធ»។
លោក Biden បានបន្ថែមថា៖ «ខ្ញុំមិនទាន់ហ៊ានថា នេះជាប្រតិបត្តិការបង្វែរដានដើម្បីទម្លាក់កំហុសលើគេនោះទេ។ ប៉ុន្តែ វានឹងក្លាយជាកំហុសធ្ងន់ធ្ងរ [ប្រសិនបើរុស្ស៊ីហ៊ានធ្វើដូច្នេះ]»។
អ្នកនាំពាក្យក្រសួងការបរទេសសហរដ្ឋអាមេរិកលោក Ned Price បាននិយាយកាលពីថ្ងៃអង្គារថាមានហេតុផលដែលត្រូវបារម្ភ ដោយសារតែរុស្ស៊ី «បានបង្ហាញនូវលំនាំនៃការចោទប្រកាន់អ្នកដទៃអំពីរឿងនេះ ដែលនៅទីបំផុតគឺរុស្ស៊ីខ្លួនឯងជាអ្នករៀបចំផែនការ»។
កាលពីថ្ងៃចន្ទ លោក Price បានព្រមានថានឹងមាន «ផលវិបាកធ្ងន់ធ្ងរ» ប្រសិនបើរុស្ស៊ីប្រើអាវុធដូចនេះ។
ឯកអគ្គរដ្ឋទូតរុស្ស៊ីប្រចាំអង្គការសហប្រជាជាតិ លោក Vasily Nebenzya បានផ្ញើលិខិតមួយច្បាប់ទៅកាន់អគ្គលេខាធិការអង្គការសហប្រជាជាតិ លោក Antonio Guterres និងក្រុមប្រឹក្សាសន្តិសុខអង្គការសហប្រជាជាតិ កាលពីយប់ថ្ងៃចន្ទ ដោយបញ្ជាក់ថា ប្រទេសរុស្ស៊ី «នឹងចាត់ទុកការប្រើគ្រាប់បែកផ្ទុកសារធាតុវិទ្យុសកម្ម ដែលប្រព្រឹត្តិឡើងដោយប្រទេសអ៊ុយក្រែនថា ជាទង្វើភេរវកម្មនុយក្លេអ៊ែរ»។
រដ្ឋាភិបាលអ៊ុយក្រែនបានបដិសេធយ៉ាងដាច់អហង្ការចំពោះការចោទប្រកាន់របស់រដ្ឋាភិបាលរុស្ស៊ីនេះ និងបានចោទរដ្ឋាភិបាលរុស្ស៊ីវិញថា មានផែនការធ្វើដូច្នេះ ដើម្បីទម្លាក់កំហុសលើអ៊ុយក្រែនថាជាអ្នកធ្វើ ដើម្បីជាលេសឈ្លានពានបន្ថែមទៀតលើអ៊ុយក្រែន៕
© រក្សាសិទ្ធិដោយ thmeythmey.com