អន្តរជាតិ
IAEA នឹងត្រួតពិនិត្យទីតាំង២កន្លែងនៅអ៊ុយក្រែន ដែលរុស្ស៊ីចោទថាកំពុងផលិតគ្រាប់បែកវិទ្យុសកម្ម
ទាហានអ៊ុយក្រែនប្រើរថក្រោះ T-80 របស់រុស្ស៊ីដែលអ៊ុយក្រែនចាប់បាន នៅជិតទីក្រុង Bakhmut តំបន់ Donetsk កាលពីថ្ងៃទី២៧ ខែតុលា
×![]()
ដោយ: VOA
អគ្គនាយកទីភ្នាក់ងារថាមពលបរមាណូអន្តរជាតិ IAEA លោក Rafael Grossi បាននិយាយកាលពីថ្ងៃព្រហស្បតិ៍ថា ក្រុមអ្នកត្រួតពិនិត្យអន្តរជាតិរបស់លោក អាចនឹងទៅដល់ទីតាំង២នៅក្នុងប្រទេសអ៊ុយក្រែនក្នុងរយៈពេល២ថ្ងៃខាងមុខ ហើយនឹងចាប់ផ្តើមធ្វើការងារនៅកន្លែងទាំងពីរនៅក្នុងប្រទេសអ៊ុយក្រែន ដែលត្រូវបានប្រទេសរុស្ស៊ីចោទថាកំពុងយកសារធាតុនុយក្លេអ៊ែរ ដើម្បីផលិតគ្រាប់បែកផ្ទុកសារធាតុវិទ្យុសកម្ម នោះ។
លោក Grossi បានថ្លែងប្រាប់ក្រុមអ្នកសារព័ត៌មាននៅបុរី New Yorkថា៖ «ខ្ញុំបានពិភាក្សាគ្នាយ៉ាងទូលំទូលាយជាមួយរដ្ឋមន្ត្រីការបរទេសអ៊ុយក្រែន លោក Dmytro Kuleba ជុំវិញរឿងនេះ។ រដ្ឋមន្ត្រីការបរទេសអ៊ុយក្រែនរូបនេះ បានបញ្ជាក់ ហើយខ្ញុំយល់ស្របជាមួយលោក ដែលថា វិធីដ៏ល្អបំផុត ដើម្បីជម្រះនូវភាពមន្ទិលសង្ស័យនោះ គឹត្រូវអនុញ្ញាតឱ្យអ្នកត្រួតពិនិត្យចូលទៅមើលទីតាំងនោះតែម្តង»។
មន្ត្រីរុស្ស៊ីបានចោទប្រកាន់អស់ពេលជាច្រើនថ្ងៃមកហើយ ថាប្រទេសអ៊ុយក្រែន កំពុងរៀបចំផែនការអភិវឌ្ឍន៍និងប្រើប្រាស់នូវអ្វីដែលគេហៅថាជាគ្រាប់បែកផ្ទុកសារធាតុវិទ្យុសកម្ម» នៅក្នុងជម្លោះជាមួយប្រទេសរុស្ស៊ី។ ប្រទេសអ៊ុយក្រែននិងនិងសម្ព័ន្ធមិត្តលោកខាងលិចរបស់ខ្លួន បានបដិសេធការចោទប្រកាន់ទាំងនោះ ហើយសង្ស័យថារុស្ស៊ីប្រឌិតរឿងនេះឡើង ដើម្បីធ្វើជាលេសក្នុងការបង្កើនភាពតានតឹងនៅក្នុងសង្គ្រាមក្នុងប្រទេសអ៊ុយក្រែន ហើយដែលអាចជាប្រតិបត្តិការក្លែងក្លាយរបស់រដ្ឋាភិបាលក្រុងមូស្គូផងដែរ។
គ្រាប់បែកវិទ្យុសកម្ម ឬ dirty bombs គឹជាគ្រាប់បែកដែលយកគ្រឿងផ្ទុះរបស់អាវុធធម្មតា ទៅលាយជាមួយនឹងសារធាតុវិទ្យុសកម្ម ដើម្បីសាបព្រួសសារធាតុវិទ្យុសកម្ម ដែលអាចធ្វើឱ្យមនុស្សស្លាប់ជាច្រើននាក់។
លោក Grossi និយាយថា ក្រុមមន្ត្រីត្រួតពិនិត្យនឹងធ្វើរបាយការណ៍ ស្តីពីការរកឃើញរបស់ខ្លួនក្នុងប៉ុន្មានថ្ងៃខាងមុខ៕
ព័ត៌មានខ្លះនៅក្នុងសេចក្ដីរាយការណ៍នេះត្រូវបានដកស្រង់មកពីទីភ្នាក់ងារព័ត៌មាន Associated Press ទីភ្នាក់ងារព័ត៌មាន AFP និងទីភ្នាក់ងារព័ត៌មាន Reuters។
© រក្សាសិទ្ធិដោយ thmeythmey.com
