អន្តរជាតិ
លោក ស៊ី ថា លោកមានឆន្ទៈធ្វើការជាមួយអាមេរិកដើម្បីប្រយោជន៍ទៅវិញទៅមក
×![]()
ដោយ: VOA
ក្រុងប៉េកាំង- ប្រធានាធិបតីចិនលោក Xi Jinping បាននិយាយថា ប្រទេសចិនមានឆន្ទៈនៅក្នុងការធ្វើការជាមួយនឹងសហរដ្ឋអាមេរិកដើម្បីស្វែងរកវិធីឱ្យមានការឯកភាពគ្នាដើម្បីផលប្រយោជន៍របស់ប្រទេសទាំងពីរ។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន Reuters ដែលយោងលើសេចក្ដីរាយការណ៍របស់ទូរទស្សន៍រដ្ឋរបស់ចិនដែលបានផ្សាយកាលពីថ្ងៃព្រហស្បតិ៍កន្លងមក។
ការលើកឡើងរបស់លោក Xi នេះបានធ្វើឡើងនៅមុនជំនួបដែលអាចទៅរួចរវាងលោកនិងប្រធានាធិបតីសហរដ្ឋអាមេរិកលោក Joe Biden នៅក្នុងកិច្ចប្រជុំរបស់ក្រុមប្រទេស G-20 នៅក្នុងប្រទេសឥណ្ឌូណេស៊ីនៅខែវិច្ឆិកាខាងមុខ។
លោក Xi បានបញ្ជាក់នៅក្នុងសារមួយដែលថ្លែងនៅក្នុងពិធីមួយដែលរៀបចំឡើងដោយអង្គការគណៈកម្មាធិការជាតិស្ដីពីទំនាក់ទំនងរវាងសហរដ្ឋអាមេរិកនិងចិន (National Committee on U.S.-China Relations) កាលពីថ្ងៃពុធថា ក្នុងនាមជាប្រទេសមហាអំណាចចម្បង ប្រទេសចិននិងសហរដ្ឋអាមេរិកគួរតែពង្រឹងការទាក់ទងគ្នានិងកិច្ចសហប្រតិបត្តិការដើម្បីជួយផ្ដល់ស្ថិរភាពដល់ពិភពលោក។
ប្រទេសទាំងពីរមានការខ្វែងគំនិតគ្នាលើគោលនយោបាយរបស់ចិនចំពោះតៃវ៉ាន់ ទំនាក់ទំនងរបស់ចិនជាមួយនឹងប្រទេសរុស្ស៊ី និងកិច្ចប្រឹងប្រែងរបស់សហរដ្ឋអាមេរិកកាលពីពេលថ្មីៗនេះនៅក្នុងការរារាំងមិនឱ្យក្រុមហ៊ុនបន្ទះអេឡិចត្រូនិក semiconductor របស់សហរដ្ឋអាមេរិកលក់បច្ចេកវិទ្យាទៅឱ្យក្រុមហ៊ុនចិន។
កាលពីថ្ងៃពុធ លោក Biden បាននិយាយថា៖ «សហរដ្ឋអាមេរិកមិនចង់មានជម្លោះជាមួយនឹងប្រទេសចិននោះទេ»។
បន្ទាប់ពីលោក Xi ត្រូវបានសមាជគណបក្សកុម្មុយនីស្តចិនជ្រើសរើសឱ្យធ្វើជាមេដឹកនាំនៅអាណត្តិទី ៣ ជាបន្តទៀតកាលពីចុងសប្ដាហ៍កន្លងទៅនេះ រដ្ឋបាលរបស់លោក Biden បានសង្កត់ធ្ងន់អំពីសារៈសំខាន់នៃការរក្សាខ្សែទំនាក់ទំនងឱ្យនៅបើកចំហជាមួយនឹងរដ្ឋាភិបាលចិន៕
© រក្សាសិទ្ធិដោយ thmeythmey.com
