អន្តរជាតិ
ប្រមុខការទូតចិន និងអាម៉េរិកជជែកគ្នាតាមទូរស័ព្ទលើទំនាក់ទំនងទ្វេភាគីដែលល្អក់កករ លោក វ៉ាង យី និងលោក អាន់តូនី ប្លីងខិន នាជំនួបកន្លងមក។ រូបថត Xinhua
× រដ្ឋមន្ត្រីការបរទេសចិន វ៉ាង យី និងរដ្ឋមន្ត្រីការបរទេសអាម៉េរិក អាន់តូនី ប្លីងខិន បានជជែកគ្នាតាមទូរស័ព្ទដោយផ្លាស់ប្តូរទស្សនៈគ្នា ស្តីពីទំនាក់ទំនងទ្វេភាគីដែលត្រូវមើលឃើញថា មិនសូវល្អប៉ុន្មានឡើយ។ ប្រមុខការទូតចិន ក៏ស្នើឱ្យអាម៉េរិកបញ្ឈប់សកម្មភាពដែលប៉ះពាល់ប្រយោជន៍របស់ចិនដែរ។
ក្នុងកិច្ចសន្ទនាតាមទូរស័ព្ទជាមួយលោក អាន់តូនី ប្លីងខិន រដ្ឋមន្ត្រីការបរទេសចិន វ៉ាង យី ថ្លែងថា ការធ្វើឱ្យទំនាក់ទំនងចិន-អាម៉េរិកប្រែទៅរកស្ថិរភាព និងការបំពេញផលប្រយោជន៍ភាគីទាំងពីរដែលស្របតាមការរំពឹងចង់បានរបស់សហគមន៍អន្តរជាតិ ជាគោលបំណងនៃជំនួបមួយនេះ។
លោក វ៉ាង និយាយដោយត្រង់ៗថា ការដាក់ទណ្ឌកម្មរបស់អាម៉េរិកលើការនាំចេញថ្មីរបស់ចិន និងការរឹតត្បិតលើការវិនិយោគនៅចិន ជាទង្វើដែលបំពានច្បាប់ពាណិជ្ជកម្មសេរី ហើយធ្វើឱ្យខូចសិទ្ធិ និងផលប្រយោជន៍ស្របច្បាប់របស់ចិន។ ប្រមុខការទូតចិន ស្នើឱ្យអាម៉េរិកកែតម្រូវ។
បើតាមសេចក្ដីប្រកាសរបស់ក្រសួងការបរទេសចិននៅថ្ងៃទី៣១ ខែតុលា លោក វ៉ាង ដែលជាទីប្រឹក្សារដ្ឋចិនផង ទទូចឱ្យអាម៉េរិកបញ្ឈប់ការទប់ស្កាត់ និងការបង្អាក់ដំណើរទៅមុខរបស់ចិន ហើយចៀសវាងការបង្កើតឧបសគ្គថ្មីចំពោះទំនាក់ទំនងរវាងប្រទេសទាំងពីរ។
ក្នុងសេចក្ដីប្រកាសដដែល ក្រសួងការបរទេសចិនបង្ហាញពីលទ្ធផលសមាជបក្សកុម្មុយនីស្តចិនលើកទី២០ ដែលចិនបានផ្ញើសារទៅកាន់ពិភពលោកថា ខ្លួននឹងប្រកាន់ខ្ជាប់គោលបំណងក្នុងការការពារសន្តិភាពពិភពលោក និងការលើកកម្ពស់ការអភិវឌ្ឍរួម ព្រមទាំងបន្តអនុវត្តគោលនយោបាយរដ្ឋជាមូលដ្ឋាននៃការបើកចំហ។
ជាការឆ្លើយតប លោកប្លីងខិនអះអាងថា អាម៉េរិកយកចិត្តទុកដាក់ចំពោះសមាជទី២០នេះ។ បើតាមលោក ប្លីងខិន ភាគីអាម៉េរិកមានឆន្ទៈរក្សាទំនាក់ទំនង និងកិច្ចសហប្រតិបត្តិការជាមួយចិនក្នុងដំណាក់កាលបន្ទាប់នៃទំនាក់ទំនងទ្វេភាគី និងស្វែងយល់ពីមូលដ្ឋានគ្រឹះនៃទំនាក់ទំនងប្រទេសទាំងពីរ។
រឿងនៅអ៊ុយក្រែនក៏ជាត្រូវបានលើកឡើងជាប្រធានបទមួយក្នុងជំនួបរវាងរដ្ឋមន្ត្រីការបរទេសទាំងពីរផងដែរ។ លោក វ៉ាង សង្កត់ធ្ងន់ថា ភាគីទាំងអស់គួរតែបង្កើនកិច្ចខិតខំការទូតដើម្បីចៀសវាងការកើនឡើងភាពតានតឹងបន្ថែមទៀត ឬសូម្បីតែការបាត់បង់ការគ្រប់គ្រងស្ថានការណ៍តែម្ដង៕
© រក្សាសិទ្ធិដោយ thmeythmey.com