យោធាកូរ៉េខាងត្បូង និងអាម៉េរិកពីថ្ងៃទី៣១ ខែតុលា ដល់ថ្ងៃទី៤ ខែវិច្ឆិកាបើកសមយុទ្ធផ្លូវអាកាសរួមគ្នាដែលជាលំហាត់ដ៏ធំបំផុតមួយរបស់ប្រទេសទាំងពីរមានការចូលរួមដោយយន្តហោះចម្បាំងប្រមាណ ២៤០ គ្រឿង ហើយធ្វើលំហាត់សមជាង១៦០០ ប្រភេទ។ បើតាមការបញ្ជាក់របស់ប្រទេសទាំងពីរ​ សមយុទ្ធដែលហៅថា Vigilant Storm នេះធ្វើឡើងជាចាំបាច់ដើម្បីទប់ទល់នឹងការគំរាមពីកូរ៉េខាងជើង។

 

យ៉ាងណាមិញ ក្រសួងការបរទេសកូរ៉េខាងជើង ក៏ចេញសេចក្តីថ្លែងការណ៍ទាមទារឱ្យអាម៉េរិក និងកូរ៉េខាងត្បូងបញ្ឈប់លំហាត់យោធាបែបនោះ បើមិនដូច្នោះទេ ក្រុងព្យុងយ៉ាងនឹងចាត់វិធានការតបតយ៉ាងខ្លាំងក្លា។

 

«ស្ថានភាពនៅឧបទ្វីបកូរ៉េ និងតំបន់ជុំវិញឈានចូលដំណាក់កាលប្រឈមមុខដាក់គ្នាយ៉ាងធ្ងន់ធ្ងរដើម្បីដណ្តើមអំណាចម្តងទៀត ដោយសារតែចំណាត់ការយោធាឥតឈប់ឈរ និងគ្មានការប្រុងប្រយ័ត្នរបស់អាម៉េរិក និងកូរ៉េខាងត្បូង»។ នេះបើតាមទីភ្នាក់ងារព័ត៌មានរដ្ឋ​ KCNA ស្រង់សេចក្តីថ្លែងការណ៍របស់ក្រសួងការបរទេសកូរ៉េខាងជើងនាថ្ងៃទី៣១ ខែតុលា។ 

 

សេចក្តីថ្លែងការណ៍របស់ក្រសួងការបរទេសកូរ៉េខាងជើងបញ្ជាក់ទៀតថា ប្រសិនបើអាម៉េរិកមិនចង់ប្រឈមនឹងការវិវឌ្ឍដ៏ធ្ងន់ធ្ងរដែលប៉ះពាល់ដល់ប្រយោជន៍សន្តិសុខទេ អាម៉េរិកគួរតែបញ្ឈប់លំហាត់សម្រាប់សង្រ្គាមដែលគ្មានប្រសិទ្ធភាព និងគ្មានប្រយោជន៍នេះភ្លាម។ 

 

កូរ៉េខាងជើងព្រមទាំងព្រមានទៅអាម៉េរិកចំៗថា ប្រសិនបើក្រុងវ៉ាស៊ីនតោនបន្តបង្ករឿងយ៉ាងធ្ងន់ធ្ងរផ្នែកយោធា ក្រុងព្យុងយ៉ាងនឹងពិចារណាពីវិធានការចាំបាច់ដើម្បីការពារអធិបតេយ្យភាព សន្តិសុខរបស់ប្រជាជន និងបូរណភាពទឹកដីរបស់ខ្លួនពីការគំរាមយោធាពីខាងក្រៅ។ 

 

ប៉ុន្មានសប្តាហ៍ចុងក្រោយនេះ កូរ៉េខាងជើងទើបតែធ្វើសមយុទ្ធបាញ់គ្រាប់ពិតតាមអាកាស តេស្តមីស៊ីលជាច្រើនប្រភេទ និងបាញ់កាំភ្លើងធំជាច្រើនគ្រាប់ចូលព្រំដែនសមុទ្រមិនផ្លូវការរវាងកូរ៉េទាំងពីរដើម្បីជាការតបតទៅនឹងសមយុទ្ធយោធារួមគ្នារបស់អាម៉េរិក និងកូរ៉េខាងត្បូងដែលមានទាំងលំហាត់តាមអាកាស ដែនទឹក និងលើគោក៕