ទូរសព្ទ​បាន​ក្លាយជា​តម្រូវ​ការដ៏សំខាន់សម្រាប់​ការសិក្សា​របស់​សិស្ស​តាម​ប្រព័ន្ធអនឡាញ​នាអំឡុង​បរិបទកូវីដ-១៩​កន្លងមក។ ទោះបីជា​ជំងឺរាតត្បាត​សកលនេះ ស្រាក​ស្រាន្ត​ក៏ដោយ ប៉ុន្តែការប្រើ​ប្រាស់ទូរសព្ទ​បាន​ក្លាយជា​ទម្លាប់​របស់​បណ្តា​សិស្ស​វ័យ​ក្មេង ដោយមាន​អាណាព្យាបាល​តិច​តួចបំផុត​ដែលបាន​ដកហូតពីកូនៗវិញ។ 

​ 

ពីផ្ទះ​ដល់​សាលា ទាំងម៉ោង​រៀន និងម៉ោង​ចេញលេង... ទូរសព្ទ​នៅជាប់​ដៃរហូត។ តួនាទីជា​មគ្គទេសអាជីព និងប្រឹក្សា នៃសាលាវិទ្យាល័យជប់វារី លោក ឆេង អឿន បែរជាមាន​ក្តី​បារម្ភជាងការ​រីករាយ នៅពេល​ដែល​សង្កេត​ឃើញ​សកម្ម​ភាព​សិស្ស​ក្មេងៗ​របស់ខ្លួនបែប​​នេះ។ 

 

គ្រួសារ សាលារៀន និង​សង្គម។ ទាំងនេះហើយ​ដែល​លោក ឆេង អឿន និង​ថ្នាក់ដឹកនាំ​នៃ​វិទ្យាល័យជប់វារី មិនអាច​បិទភ្នែក​ដោយធ្វើមិន​ដឹង​មិនលឺឡើយ។ លោក​បាន​រៀបរាប់ប្រាប់ ThmeyThmey25 ថា៖ «ការ​ប្រើ​ប្រាស់​ទូរសព្ទ​ដៃ​ក្នុង​ចំណោម​សិស្សៗ ពិតជាមាន​កម្រិតខ្ពស់។ ទាំងគ្រូ​បង្រៀន និងអាណាព្យាបាល សុទ្ធតែរអ៊ូ ដូច​គ្នា។ អាណាព្យាបាលខ្លះរវល់ ហើយ​ពួកគេ​បារម្ភពេលឃើញកូនៗ គិត​តែសំងំ​​ចុច​ទូរសព្ទនៅក្នុង​បន្ទប់»។

 

បច្ចុប្បន្ន ថា្នក់ដឹកនាំ​សាលាជាច្រើនមានការព្រួយចំពោះករណីនេះ រហូត​ឈានដល់ការដាក់ពិន័យផងដែរ។ ទោះបីជាយ៉ាងណាក៏ដោយ ការ​ដាក់ពិន័យ​បាន​ក្លាយជាអាវុធមុខ​ពីរ ដោយ​សាលា​ព្យាយាម​បង្ហាញ​ចេតនា​ល្អ​របស់ខ្លួន​ក្នុងការ​អប់រំសិស្ស ប៉ុន្តែ​ចំណាត់ការ​ផ្សេងៗ បែរជា​ទទួល​បាន​នូវការថ្នាំង​ថ្នាក់​ពី​សំណាក់​មាតាបិតា ឬអាណាព្យបាល​សិស្ស​មួយចំនួន។

 

សិស្សានុសិស្ស កាន់ទូរសព្ទដៃច្រើនជាងកាន់សៀវភៅ និងឈ្ងោកមើលទូរសព្ទច្រើនជាងឈ្ងោកធ្វើលំហាត់។ តាមរយៈការឃ្លាំមើលយ៉ាងយកចិត្តទុកដាក់របស់ លោក ឆេង អឿន សិស្សនុសិស្សភាគច្រើនប្រមូលផ្តុំគ្នាលេងហ្គេម ខ្លះមើលវីដេអូអាសអាភាស ឬវីដេអូមិនសមរម្យមួយចំនួន។ 

 

លោកគ្រូមគ្គទេសអាជីពវ័យ៥៥ឆ្នាំរូបនេះ លើកឡើងពីផលប៉ះពាល់ដូច្នេះថា ៖«កាលណាសិស្សមើលរឿងអាសអាភាស វាអាចបង្កើតជាអារម្មណ៍ស្រើបស្រាលជាមួយរូបភាព។ ប្រសិនបើពួក​គេ​លេងហ្គេម វាអាចជក់លេងទៅ ខាតពេលវេលារៀនសូត្រ ហើយអត់សូវយកចិត្តទុកដាក់ក្នុងការសិក្សា ហើយកម្រិតនៃការសិក្សាធ្លាក់ចុះ»។

 

ក្រៅពីខូចអារម្មណ៍សិក្សា ការមើលមាតិកា ឬវីដេអូមិនសមរម្យមួយចំនួន ក៏បានជះឥទ្ធិពលអាក្រក់ដល់ឥរិយាបថ និងរបៀបនិយាយស្តីរបស់យុវជន រួមទាំងកុមារខ្លះផងដែរ។ លោកគ្រូ ឆេង អឿន សម្គាល់ឃើញថា សីលធម៌ មានការធ្លាក់ចុះច្រើន ជាពិសេសការប្រើប្រាស់ពាក្យសំដីរបស់សិស្សានុសិស្ស។ លើសពីនេះ ទំនាក់ទំនងរវាងកូនៗ នឹងអាណាព្យាបាល ក៏មិនសូវមានភាពស្និទ្ធស្នាល ដ្បិតកូនៗប្រើពេលវេលាជាមួយទូរសព្ទច្រើនជាង។ 

 

ទន្ទឹមនឹងការធ្លាក់ចុះផ្នែកសីលធម៌ ល្បែងកម្សាន្ត ដែលកុមារតែងនាំគ្នាលេងនាម៉ោងចេញលេងដូចជា លោតអន្ទាក់ លេងអ៊ូ លេងកៅស៊ូ លេងសី និងល្បែងកម្សាន្តជាច្រើនទៀត មិនសូវមានដូចមុនឡើយ។ ការណ៍នេះ បានធ្វើឱ្យល្បែងកម្សាន្ត ដែលកុមារជំនាន់មុនៗនិយមលេងបាត់បង់បន្តិចម្តងៗ។ 

ដើម្បីកែប្រែទម្លាប់មិនល្អរបស់សិស្សានុសិស្ស និងរៀបចំសណ្ដាប់ធ្នាប់សាលាឱ្យមានភាពល្អប្រសើរឡើងវិញ វិទ្យាល័យជប់វារី បានបង្កើតវិន័យ៦ចំណុចបន្ថែម ដោយការប្រើប្រាស់ទូរសព្ទដៃរបស់សិស្សស្ថិតនៅក្នុងចំណុចទី៤។ 

 

ចំពោះវិន័យ ដែលបានចែងគឺ សិស្សប្រើទូរសព្ទ លេងហ្គេម ក្នុងបរិវេនសាលា ក្នុងថ្នាក់ លើកទីមួយ នឹងត្រូវពិន័យជាទឹកប្រាក់ ១ពាន់រៀល  រួមទាំងដកទូរស័ព្ទទុក១សប្តាហ៍។ ប្រសិនបើលោកគ្រូតាមទាន់លើកទី២ នោះនឹងពិន័យ ១ម៉ឺនរៀល និងអញ្ជើញឪពុកម្តាយមកធ្វើកិច្ចសន្យា ដើម្បីបញ្ជាក់ថា បើមានលើកទី៣ នឹងមិនប្រគល់ទូរសព្ទឲ្យវិញឡើយ។ ចំពោះទូរសព្ទនោះ ខាងសាលានឹងលក់ក្នុងតម្លៃសមរម្យ ដើម្បីយកប្រាក់កសាងរោងប្រជុំសិស្ស ។ 

 

ក្រោយអនុវត្តវិន័យបាន២សប្តាហ៍ លោកឃើញថា ឥរិយាបថសិស្សមានការប្រែប្រួល និងមិនមានការប្រមូលផ្តុំគ្នាលេងទូរសព្ទដូចមុនឡើយ។ លើសពីនេះ សិស្សក៏ស្តាប់បង្គាប់ច្រើន ជាពិសេសប្តូរពីការលេងទូរសព្ទ មកអង្គុយអានសៀវភៅ ធ្វើលំហាត់ និងលេងល្បែងកម្សាន្តច្រើន។

 

«យើងឃើញសិស្សមានឥរិយាបថប្រែប្រួល។ នៅពេលយើងឱ្យបើកមេរៀន សិស្សក៏បើកមេរៀនស្រាវជ្រាវ ដែលងាយស្រួលក្នុងការគ្រប់គ្រង។ មានការ​ក៏កាត់បន្ថយសកម្មភាពដើរអើតតាមថ្នាក់ផ្សេង។ អ៊ីចឹងពេលយើងរឹតបន្តឹងទៅ សិស្សមានការប្រែប្រួល ហើយវាមានការសិក្សាស្រាវជ្រាវច្រើនជាងទុកពេលអត់ប្រយោជន៍»។ នេះជាការលើកឡើងរបស់លោក ឆេង អឿន។

 

គ្រូមគ្គទេសអាជីព និងប្រឹក្សា នៃសាលាវិទ្យាល័យជប់វារី រូបនេះ បាន​បញ្ជាក់ថា ​ការដាក់វិន័យនៅវិទ្យាល័យជប់វារី មិនបានហាមឃាត់សិស្សក្នុងការប្រើប្រាស់ទូរសព្ទដើម្បីទំនាក់ទំនងជាមួយអាណាព្យាបាល ឬបងប្អូនឡើយ។ សាលាក៏បានលើកទឹកចិត្តឱ្យសិស្សានុសិស្ស ប្រើប្រាស់ក្នុងការស្រាវជ្រាវ ដើម្បីទទួលចំណេះថ្មីៗ ជាពិសេស ការសិក្សាស្រាវជ្រាវបន្ថែមទៅលើកម្មវិធី STEM ។

 

កាលពីខែសីហាកន្លងទៅ សិស្សនុសិស្ស នៃវិទ្យាល័យជប់វារី បានចូលរួមគម្រោង STEM នៅទីរួមខេត្តខេត្តបន្ទាយមានជ័យ ចំនួន១០ស្តង់ ដោយមានសិស្សចូលរួមចំនួន២៦ក្រុម។ បើតាមលោកគ្រូ ឆេង អឿន សិស្សានុសិស្សបានខិតខំស្រាវជ្រាវទៅតាមប្រធានបទ និងបានធ្វើបទបង្ហាញយ៉ាងក្លាហាន។ 

 

ទន្ទឹមនោះ អាណាព្យាបាល ក៏សប្បាយចិត្ត និងរីករាយចំពោះវិធានការនេះ ទោះការអនុវត្តវិន័យដំបូងមានការមិនពេញចិត្តពីឪពុកម្តាយខ្លះក្តី។ លោក ឆេង អឿន បានឱ្យដឹងថា នៅពេលអនុវត្តវិន័យដំបូង អាណាព្យាបាលមួយចំនួនមិនបានយល់ពីបំណង ព្រោះពួកគាត់មិនដឹងថា កូនៗមកសាលាលេងហ្គេម មិនចូលរៀន។ ប៉ុន្តែ ក្រោយមានការអញ្ជើញជួបពិភាក្សាគ្នា អាណាព្យាបាលភាគច្រើនសាទរ និងគាំទ្រលើវិធានការនេះ៕