ជាតិ
យុវជនសកម្ម សេវាល្អ
កំពង់ធំ៖ អាជ្ញាធរឃុំកំពង់ស្វាយ នឹងជួសជុលផ្លូវមួយខ្សែប្រវែងជាង៨គីឡូម៉ែត្រ
×
ដោយ៖ ជឿង ស៊ីចាន់ (យុវជនឃុំកំពង់ស្វាយ)
ស្រុកកំពង់ស្វាយ, កំពង់ធំ៖ ក្នុងឆ្នាំ២០២២នេះ អាជ្ញាធរឃុំកំពង់ស្វាយ នឹងជួសជុលផ្លូវក្រួសក្រហមមួយខ្សែ ដែលមានប្រវែងប្រមាណ ៨គីឡូម៉ែត្រ ពីចំណុចភូមិកំពង់ស្វាយ ភ្ជាប់ទៅភូមិអូរសាលា ក្នុងឃុំកំពង់ស្វាយ ស្រុកកំពង់ស្វាយ ខេត្តកំពង់ធំ។ បើតាមលោក ជួន ថុល មេឃុំកំពង់ស្វាយ នីតិវិធីដេញថ្លៃដើម្បីជួសជុលផ្លូវនេះបានបញ្ចប់ហើយ ដោយគ្រោងចំណាយថវិកាប្រមាណ ១២ម៉ឺដុល្លារ។ លោក ជួន ថុល មេឃុំកំពង់ស្វាយ ពន្យល់បន្ថែម៖ «យើងដេញថ្លៃរួចហើយ។ យើងចាក់ដីសរួចហើយ ប៉ុន្តែវាលិច(ទឹក)។ ដល់ពេលចប់ទឹកស្រកនេះ យើងនឹងស្តារឡើងវិញ ចាក់ដីសបំពេញបន្ថែម រួចយើងដាក់ក្រួសក្រហម»។
បើតាមលោក ជួន ថុល ក្រៅពីទឹកជំនន់ ផ្លូវនៅក្នុងឃុំកំពង់ស្វាយខូចខាតដោយសារតែកត្តាយានយន្តដឹកលើសទម្ងន់ ពិសេសគឺការដឹកជញ្ជូនផលស្រូវអង្កររបស់ពលរដ្ឋ។ ដូច្នេះមេឃុំរូបនេះ ថាពិបាកនៅក្នុងការទប់ស្កាត់មិនឱ្យផ្លូវនានានៅក្នុងឃុំខូចខាតណាស់។ «បើយើងមិនឱ្យយានយន្តចូលដឹកស្រូវ ដឹកអង្ករពីកន្លែង(ក្នុងឃុំ)យើងទេនោះ ប្រជាពលរដ្ឋគាត់ស្រែក។ ហើយម្យ៉ាងទៀត សមិទ្ធផលដែលគាត់ធ្វើបាន ដូចជាស្រូវ ដូចជាអង្ករ បើឱ្យគាត់(ពលរដ្ឋ)ដឹកយកទៅដល់កន្លែងថ្នល់ កន្លែងអី គេបន្ថោក។ បើមកទិញដល់ភូមិ គាត់បានថ្លៃ។ អ៊ីចឹងយើងបិទយានយន្តអត់បានទេ។ កាលណាបើ(ផ្លូវ)ខូច យើងជួសជុលតាមដំណាក់កាល»។ មេឃុំកំពង់ស្វាយ ពន្យល់បន្ថែមដូច្នេះ។
លោក ជួន ថុល មេឃុំនៃឃុំកំពង់ស្វាយ ស្រុកកំពង់ស្វាយ ខេត្តកំពង់ធំ
លោក ជួន ថុល មេឃុំកំពង់ស្វាយ បានស្នើឱ្យប្រជាពលរដ្ឋទាំងអស់ ចូលរួមថែរក្សា និងបញ្ចៀសកុំឱ្យមានទឹកដក់នៅតាមផ្លូវមុខផ្ទះរៀងៗខ្លួន ដើម្បីធានាថាផ្លូវនានានៅក្នុងឃុំ អាចប្រើប្រាស់បានយូរឆ្នាំ និងសម្រួលដល់ការធ្វើដំណើររបស់ពលរដ្ឋ ។ «ខ្ញុំសំណូមពរឱ្យប្រជាពលរដ្ឋឱ្យជួយមើលទឹក នៅមុខផ្ទះខ្លួន។ កាលណាបើឃើញស្ទះទឹកទេ ឱ្យកាយប្រឡាយបាយោហ្នឹង ឱ្យហូរចូលលូ ដើម្បីកុំឱ្យស្ទះទឹក។ កាលណាបើមានស្ទះទឹក ដក់នៅកន្លែងណាទេ ឡាបើកបរទៅ វាចេះតែ(ផុង)ជ្រៅទៅៗ។ ឱ្យគាត់ចូលរួមឱ្យបានច្រើនទាំងអស់គ្នា។ កាលណាបើខ្វះការចូលរួម ធ្វើឱ្យរដ្ឋអំណាច ប្រឹងតែម្នាក់ឯងក៏ទៅអត់រួចដែរ។ អ៊ីចឹងទាល់តែប្រជាពលរដ្ឋជួយពិនិត្យពិច័យ ជួយមើល។ ចូលរួមទាំងអស់គ្នា»។ នេះជាសំណូមពររបស់មេឃុំកំពង់ស្វាយ។
សូមជម្រាបថា ឃុំកំពង់ស្វាយ មានភូមិសរុប១២ភូមិ ដែលមានប្រជាពលរដ្ឋរស់នៅជាង ១,៥ម៉ឺននាក់៕
(អត្ថបទនេះ គឺជាស្នាដៃរបស់ក្រុមយុវជន និងត្រូវបានរៀបរៀងឡើង ក្រោមជំនួយហិរញ្ញវត្ថុរបស់សហភាពអឺរ៉ុប និងទីភ្នាក់ងារសហប្រតិបត្តិការអភិវឌ្ឍអន្តរជាតិស៊ុយអ៊ែត តាមរយៈអង្គការតម្លាភាពកម្ពុជា និងអង្គការអាក់សិនអេតកម្ពុជា។ រាល់ខ្លឹមសារនៅក្នុងអត្ថបទនេះ គឺជាការទទួលខុសត្រូវរបស់ស្មេរ ឬផលិតករ ហើយមិនឆ្លុះបញ្ចាំងអំពីទស្សនៈរបស់សហភាពអឺរ៉ុប និងទីភ្នាក់ងារសហប្រតិបត្តិការ អភិវឌ្ឍអន្តរជាតិស៊ុយអ៊ែតនោះទេ)
© រក្សាសិទ្ធិដោយ thmeythmey.com