អន្តរជាតិ
ពាក់ព័ន្ធការចរចាCOC លោកគង់ ភោគថា កម្ពុជាបានដើរតួនាទីស្ថាបនាបំផុត លោក គង់ ភោគ អ្នកនាំពាក្យកិច្ចប្រជុំកំពូលអាស៊ានលើកទី៤០ និង៤១ នៅក្នុងសន្និសីទសារព័ត៌មាននាថ្ងៃទី១១ ខែវិច្ឆិកា ឆ្នាំ២០២២។ រូបភាព៖ LAY Sopheavotey
× លោក គង់ ភោគ អ្នកនាំពាក្យកិច្ចប្រជុំកំពូលអាស៊ានលើកទី៤០ និង ៤១ បានអះអាងថា ពាក់ព័ន្ធនឹងការចរចាក្រមប្រតិបត្តិសមុទ្រចិនខាងត្បូង(COC) កម្ពុជា បានដើរតួនាទីស្ថាបនាបំផុត ក៏ដូចជាចូលរួមចំណែក និងជំរុញ ដើម្បីធ្វើយ៉ាងណាឱ្យការចរចាបានបញ្ចប់សព្វគ្រប់។
ជាច្រើនឆ្នាំមកហើយ ក្រមប្រតិបត្តិសមុទ្រចិនខាងត្បូង នៅតែបន្តចរចា និងបានផ្អាកមួយរយៈ ដោយសារជំងឺកូវីដ-១៩។ ថ្មីៗនេះ ការចរចាលើក្រមប្រតិបត្តិសមុទ្រចិនខាងត្បូង បានចាប់ផ្តើមឡើងវិញនៅកម្ពុជា។ ក្រមប្រតិបត្តិ COC ជាវិធានមួយ ដែលមានចែងពីយន្តការក្នុងការដោះស្រាយជម្លោះនៅក្នុងសមុទ្រចិនខាងត្បូង។
ជុំវិញការចរចាក្រមប្រតិបត្តិសមុទ្រចិនសមុទ្រខាងត្បូងនេះ លោកគង់ ភោគ អ្នកនាំពាក្យកិច្ចប្រជុំកំពូលអាស៊ានលើកទី៤០ និង៤១ បានថ្លែងនៅក្នុងសន្និសីទសារព័ត៌មាននាល្ងាចថ្ងៃទី១១ ខែវិច្ឆិកាថា៖ «កម្ពុជាបានដើរតួនាទីស្ថាបនាបំផុត និងចូលរួមចំណែក ដើម្បីជំរុញពនឿនឱ្យការចរចានេះ បានចប់សព្វគ្រប់។
មិនតែប៉ុណ្ណោះ មន្រ្តីក្រសួងការបរទេសកម្ពុជារូបនេះ បានរំឮកឡើងវិញថា ការអានលើកទីមួយពាក់ព័ន្ធជាមួយសេចក្តីព្រាងCOC បានចាប់ផ្តើមនៅក្នុងឆ្នាំ២០១៨ និងរួចរាល់នៅក្នុងខែកក្កដាឆ្នាំ២០១៩។ ចំណែកការអានលើកទីពីរ បានចាប់ផ្តើមនៅក្នុងឆ្នាំ ២០១៩ ប៉ុន្តែវាត្រូវផ្អាកទៅវិញ ដោយសារជំងឺកូវីដ-១៩ ។ ក្រោយជំងឺកូវីដ-១៩ មានភាពធូរស្រាល ការចរចាបានចាប់ផ្តើមឡើងវិញ នៅសៀមរាប។
ត្រង់ការផ្អាកការចរចា COC លោកគង់ ភោគ បានពន្យល់ថា កិច្ចចរចារបៀបនេះ មិនអាចពិភាក្សាតាមរយៈប្រព័ន្ធវីដេអូ Zoom បានទេ គឺត្រូវការជួបគ្នា និងជជែកគ្នាដោយផ្ទាល់។
បើតាមអ្នកនាំពាក្យកិច្ចប្រជុំកំពូលអាស៊ាន ក្នុងពេលកម្ពុជាធ្វើជាប្រធានអាស៊ាន ដំណើរចរចាលើក្រមប្រតិបត្តិសមុទ្រចិនខាងត្បូង មានវឌ្ឍនភាពច្រើន បើទោះភាពយឺតយ៉ាវបន្តិចក្តី ដោយសារជំងឺកូវីដ-១៩។ លោកគង់ ភោគ បានបង្ហាញក្តីសង្ឃឹមថា វឌ្ឍភាពនេះ អាចជួយឱ្យប្រធានផ្លាស់វេនក្រោយៗទៀត អាចបញ្ចប់ការចរចា បានទាន់ពេលវេលា៕
© រក្សាសិទ្ធិដោយ thmeythmey.com