វត្តមានមេដឹកនាំមហាអំណាចអាម៉េរិក និងចិន នៅកម្ពុជា នាអំឡុងកិច្ចប្រជុំកំពូលអាស៊ាន នាំឲ្យមានការនិយាយសាជាថ្មីឡើងវិញ ពីរឿងមូលដ្ឋានទ័ពជើងទឹកសមុទ្ររាម។ ភាគីអាម៉េរិក នៅតែបង្ហាញឥរិយាបថបែបសង្ស័យដូចមុនៗថា មូលដ្ឋានទ័ពរាម មានទ័ពចិនលួចលាក់ខ្លួន។ ឯភាគីចិន បន្តព្យាយាមពន្យល់ដូចរាល់ដងថា ចិន ពិតជាបានជួយកម្ពុជាក្នុងការអភិឌ្ឍមូលដ្ឋានទ័ពរាមមែន តែគ្មានដាក់ទ័ពឲ្យឈរជើងនៅទីនោះឡើយ។ 
 

ក្នុងសន្និសីទសារព័ត៌មាន កាលពីថ្ងៃទី១៤ ខែវិច្ឆិកា ឆ្នាំ២០២២ អ្នកស្រី ម៉ៅ នីង (Mao Ning) អ្នកនាំពាក្យក្រសួងការពារជាតិចិន ឆ្លើយតបនឹងសំណួររបស់អ្នកកាសែតដូច្នេះថា៖«ការអភិវឌ្ឍមូលដ្ឋានទ័ពរាម ដែលមានការជួយពីចិន គឺជាសកម្មភាពធម្មតានៃការផ្តល់ជំនួយដល់កម្ពុជា។ គោលបំណង គឺពង្រឹងសមត្ថភាពទ័ពជើងទឹកកម្ពុជា ក្នុងការការពារបូរណភាពដែនសមុទ្ររបស់កម្ពុជាខ្លួន​ឯង»។ 
 

អ្នកស្រី អធិប្បាយថា ការជួយកម្ពុជាពីសំណាក់ចិន ក្នុងការអភិវឌ្ឍមូលដ្ឋានទ័ពរាម គឺស្របនឹងច្បាប់នៃប្រទេសទាំង២ ហើយក៏ស្របនឹងច្បាប់អន្តរជាតិដែរ។ អ្នកស្រី បន្តថា កម្ពុជា ធ្លាប់លាតត្រដាងជាច្រើនដងមកហើយពីករណីមូលដ្ឋានទ័ពរាមនេះ។ អ្នកស្រី សង្ឃឹមថា ប្រទេសដទៃនៅក្រៅតំបន់ នឹងមើលឃើញជាសកម្មភាពធម្មតា ចំពោះការផ្លាស់ប្តូរ និងកិច្ចសហប្រតិបត្តិការរវាងកម្ពុជា-ចិន។ 
 

ការចោទសួររបស់អ្នកកាសែតទៅកាន់អ្នកនាំពាក្យក្រសួងការពារជាតិចិន ជុំវិញបញ្ហាមូលដ្ឋានទ័ពរាម កើតឡើងក្រោយពីលោក ចូ បៃឌិន ប្រធានាធិបតីអាម៉េរិក បានឆ្លៀតលើកយកបញ្ហានេះ ទៅនិយាយក្នុងជំនួបផ្ទាល់មុខជាមួយសម្តេចនាយករដ្ឋមន្រ្តី ហ៊ុន សែន នៅកម្ពុជា។ សេតវិមានប្រធានាធិបតីអាម៉េរិក អះអាងតាមរយៈសេចក្តីថ្លែងការណ៍អំពីជំនួបនេះ ដូច្នេះថា៖«លោកប្រធានាធិបតី បានលើកឡើងពីក្តីបារម្ភលើស្ថានភាពមូលដ្ឋានទ័ពរាម និងបានបញ្ជាក់ពីសារសំខាន់នៃការបង្ហាញតម្លាភាពពេញលេញ លើសកម្មភាពរបស់ទ័ពចិន នៅមូលដ្ឋានទ័ពនេះ»។ 
  

សម្តេច ហ៊ុន សែន ទទួលជួបលោក លី ខឹឈាំង នៅវិមានសន្តិភាព កាលពីថ្ងៃទី៩ ខែវិច្ឆិកា ឆ្នាំ២០២២។