សម្តេច ទៀ បាញ់៖ ជោគជ័យកងទ័ពមួកខៀវកម្ពុជា មិនអាចកាត់ផ្តាច់ពីការគាំទ្ររបស់អាម៉េរិកឡើយ

ជាតិ

នយោបាយជាតិ

សម្តេច ទៀ បាញ់៖ ជោគជ័យកងទ័ពមួកខៀវកម្ពុជា មិនអាចកាត់ផ្តាច់ពីការគាំទ្ររបស់អាម៉េរិកឡើយ

16, Nov 2022 , 4:09 pm

រូបភាព

ជំនួបរវាងសម្តេច ទៀ បាញ់ រដ្ឋមន្រ្តីការពារជាតិកម្ពុជា និងលោក ផាទ្រិក មើហ្វ៊ី ឯកអគ្គរដ្ឋទូតអាម៉េរិក កាលពីថ្ងៃទី១៤ ខែវិច្ឆិកា ឆ្នាំ២០២២។ រូបពីទំព័រហ្វេសប៊ុករបស់សម្តេច ទៀ បាញ់

ដោយ៖ ទេពញាណ

ក្នុងជំនួបផ្ទាល់មុខជាមួយលោក ផាទ្រិក មើហ្វ៊ី (Patrick Murphy) ឯកអគ្គរដ្ឋទូតអាម៉េរិកប្រចាំកម្ពុជា សម្តេច ទៀ បាញ់ ឧបនាយករដ្ឋមន្រ្តី-រដ្ឋមន្រ្តីក្រសួងការពារជាតិ បានលើកឡើងពីគុណស្រ័យរបស់អាម៉េរិក ដែលជួយកម្ពុជាលើវិស័យផ្សេងៗ ដោយរាប់ទាំងការបណ្តុះបណ្តាលទ័ពមួកខៀវកម្ពុជា ដែលទៅបំពេញបេសកកម្មរក្សាសន្តិសុខតាមបណ្តាប្រទេសនានាក្រោមឆត្រអង្គការសហប្រជាជាតិផងដែរ។

«ជោគជ័យនៃបេសកកម្មរក្សាសន្តិភាពរបស់កងទ័ពកម្ពុជា គឺមិនអាចកាត់ផ្ដាច់បានពីការគាំទ្ររបស់សហរដ្ឋអាម៉េរិកឡើយ»។ នេះជាប្រសាសន៍របស់សម្តេច ទៀ បាញ់ ទៅកាន់លោកឯកអគ្គរដ្ឋទូតអាម៉េរិក ក្នុងជំនួបជាមួយគ្នាកាលពីថ្ងៃទី១៤ ខែវិច្ឆិកា ឆ្នាំ២០២២ ហើយត្រូវបានស្រង់យកទៅផ្សព្វផ្សាយលើគេហទំព័ររបស់ក្រសួងការពារជាតិកម្ពុជា។

សម្តេចរដ្ឋមន្រ្តី អរគុណរដ្ឋាភិបាល កងទ័ព និងប្រជាជនអាម៉េរិក ដែលកន្លងមក តែងជួយឧបត្ថម្ភទាំងស្មារតី សម្ភារៈ និងថវិកាដល់កម្ពុជា ពិសេសបានជួយបណ្ដុះបណ្ដាលកងទ័ពកម្ពុជាលើការដោះមីន ការរក្សាសន្តិសុខលម្ហសមុទ្រ ជំនាញសង្គ្រោះពេលមានគ្រោះមហន្តរាយក្នុងប្រទេស រួមទាំងការជួយបណ្តុះបណ្តាលកងទ័ពកម្ពុជា លើការរក្សាសន្តិភាព ការបោសសម្អាតមីន សម្រាប់អង្គការសហប្រជាជាតិ។

រដ្ឋមន្រ្តីការពារជាតិ បន្តថា ជាពិសេសទៀតនោះ ក្នុងឆ្នាំ២០០៩-២០១០ អាម៉េរិក បានជួយសាងសង់សាលាហ្វឹកហ្វឺនកងរក្សាសន្តិភាព អា សេ អូ (ACO) នៅក្នុងខេត្តកំពង់ស្ពឺ និងផ្ដល់សម្ភារៈមួយចំនួនដល់កម្ពុជា ព្រមទាំងគាំទ្រឲ្យកម្ពុជា បានធ្វើជាម្ចាស់ផ្ទះនៃលំហាត់ហ្វឹកហ្វឺនឆ្នាំអង្គរ២០១០។ សម្តេច បន្ថែមថា លំហាត់ហ្វឹកហ្វឺនឆ្នាំអង្គរ២០១០នេះ បានធ្វើឲ្យកងទ័ពកម្ពុជា ចេញទៅបំពេញបេសកកម្មនៅបរទេសកាន់តែកើនឡើង។

រីឯលោកឯកអគ្គរដ្ឋទូតវិញ លោក បានស្នើសុំការគាំទ្រពីសម្តេចរដ្ឋមន្រ្តី ក្នុងការបន្តស្រាវជ្រាវរុករកអដ្ឋិធាតុទាហានអាម៉េរិក ដែលបាន់ខ្លួនក្នុងអំឡុងសង្គ្រាមនៅកម្ពុជា។ បន្ថែមពីនេះ លោកទូត បានវាយតម្លៃខ្ពស់ចំពោះវិធានការរបស់កម្ពុជា ក្នុងឋានៈជាប្រធានអាស៊ាន ដែលប្រឹងប្រែងដោះស្រាយវិបត្តិនៅមីយ៉ាន់ម៉ា។

សម្តេច ទៀ បាញ់ ជម្រាបលោកឯកអគ្គរដ្ឋទូតថា សម្ដេច នឹងជំរុញក្រុមការងារ ឲ្យបង្កើនកិច្ចសហប្រតិបត្តិការជាមួយកងទ័ពជំនាញរបស់អាម៉េរិក ក្នុងការស្វែងរកអដ្ឋិធាតុទាហានអាម៉េរិក។ ប្រមុខការពារជាតិកម្ពុជា បង្ហាញក្តីសង្ឃឹមថា កិច្ចសហប្រតិការរនេះ នឹងធ្វើឲ្យកម្ពុជា-អាម៉េរិក ពង្រឹងចំណងសាមគ្គីភាព និងមិត្តភាពកាន់តែជិតស្និទ្ធ។

ក្រៅពីព័ត៌មានដែលសរសេរដោយក្រសួងការពារជាតិកម្ពុជា លោកឯកអគ្គរដ្ឋទូតអាម៉េរិក ក៏បានសរសេរសារខ្លីលើបណ្តាញធ្វីតធ័រដែរថា លោក បានជួបពិភាក្សាគ្នាជាមួយសម្តេច ទៀ បាញ់ ដែលជាប្រធាននៃកិច្ចប្រជុំរដ្ឋមន្រ្តីការពារជាតិអាស៊ានបូក។ លោកទូតនៃប្រទេសមហាអំណាចរូបនេះ បង្ហាញចំណាប់អារម្មណ៍ដូច្នេះថា៖«វាសំខាន់ ដែលគ្រប់ភាគីត្រូវប្រកាន់ខ្ជាប់នូវគោលការណ៍នៃសិទ្ធិសញ្ញាមិត្តិភាព និងកិច្ចសហប្រតិបត្តិការស្តីពីការគោរពបូរណភាពទឹកដី និងការមិនប្រើប្រាស់កងកម្លាំង»។

កិច្ចប្រជុំរដ្ឋមន្រ្តីការពារជាតិអាស៊ានបូក នឹងត្រូវរៀបចំឡើងក្នុងខេត្តសៀមរាម នៅចុងខែវិច្ឆិកា ឆ្នាំ២០២២។ លោកឯកអគ្គរដ្ឋទូត ជម្រាបសម្តេចរដ្ឋមន្រ្តីថា រដ្ឋមន្ត្រីការពារជាតិអាម៉េរិក នឹងមកកម្ពុជា ដើម្បីចូលរួមក្នុងកិច្ចប្រជុំរដ្ឋមន្រ្តីការពារជាតិអាស៊ានបូកនេះ។ សម្តេច តបវិញថា ក្រសួងការពារជាតិកម្ពុជា បានរៀបចំក្រុមការងាររួចជាស្រេចហើយ ដើម្បីទទួលស្វាគមន៍ដល់ប្រមុខការពារជាតិអាស៊ាន និងប្រមុខការពារជាតិនៃប្រទេសដទៃទៀត ដែលត្រូវអញ្ជើញមកចូលរួមកិច្ចប្រជុំនេះ។ កម្ពុជា ដែលជាប្រធានអាស៊ាន ទើបនឹងបញ្ចប់ការរៀបចំកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធនានា ដែលប្រព្រឹត្តទៅរាជធានីភ្នំពេញ ពីថ្ងៃទី១០ ដល់ថ្ងៃទី១៣ ខែវិច្ឆិកា ឆ្នាំ២០២២៕