សម្តេច ស ខេង ដែលមានតួនាទីជាប្រធានគណៈកម្មាធិការសម្របសម្រួលថ្នាក់ជាតិប្រឆាំងការសម្អាតប្រាក់ផងនោះ លើកឡើងថា ការបើកកិច្ចប្រជុំនាព្រឹកនេះ គឺដើម្បីត្រៀមរៀបចំទទួលស្វាគមន៍ក្រុមការងាររបស់អង្គការ FATF។ អង្គការ FATF បានដាក់កម្ពុជាឲ្យស្ថិតក្នុងបញ្ជីប្រផេះនៃចំណោមប្រទេស ដែលមានហានិភ័យពីការលួចលាងលុយកខ្វល់ដោយឧក្រិដ្ឋជន។

នៅចំពោះមុខអ្នកកាសែត សម្តេចរដ្ឋមន្រ្តីមហាផ្ទៃ បង្ហាញក្តីសង្ឃឹមថា៖«យើង នឹងអាចដកខ្លួនចេញពីបញ្ជីប្រផេះ [របស់អង្គការ FATF] បាន ដោយសារឆន្ទៈនយោបាយរបស់រដ្ឋាភិបាល និងកិច្ចខិតខំប្រឹងប្រែងរបស់ក្រសួងពាក់ព័ន្ធ ក្នុងការប្រយុទ្ធប្រឆាំងការសម្អាតប្រាក់»។ 

 
សូមរម្លឹកឡើងវិញថា សម្តេច ស ខេង ធ្លាប់ថ្លែងក្នុងកិច្ចប្រជុំ១ ពាក់ព័ន្ធនឹងការប្រឆាំងការសម្អាតប្រាក់នេះ កាលពីចុងខែមិថុនា ឆ្នាំ២០២២កន្លងមកថា បើកម្ពុជា មិនត្រូវបានដកចេញពីបញ្ជីប្រផេះរបស់អង្គការ FATF ទេនោះ ធនាគារនៅកម្ពុជា នឹងមានឧបសគ្គក្នុងការធ្វើប្រតិបត្តិការលើវិស័យធនាគារ។ ក្នុងកិច្ចប្រជុំនាពេលនោះ សម្តេច បានអំពាវនាវឲ្យគ្រប់ក្រសួង ស្ថាប័ន អង្គភាព រួមគ្នាដកកម្ពុជាចេញពីបញ្ជីប្រផេះនេះឲ្យបាន។

 

ប្រទេស ដែលត្រូវចាត់ទុកថា មានស្ថានភាពមិនល្អពាក់ព័ន្ធនឹងការលួចសម្អាតប្រាក់កខ្វក់ដោយក្រុមឧក្រិដ្ឋជន ត្រូវប្រឹងប្រែងធ្វើកិច្ចការលើចំណុច២ គឺ  IO7 និង IO8។ IO7 សំដៅលើកិច្ចការក្នុងការបង្រ្កាបបទល្មើសឧក្រិដ្ឋពាក់ព័ន្ធនឹងការលួចសម្អាតប្រាក់ ឯ IO8 សំដៅលើកិច្ចការក្នុងការបង្កក ឬការរឹបអូសធនធានកខ្វក់របស់ឧក្រិដ្ឋជន។ 

 

ការស្រាវជ្រាវរកឲ្យឃើញពីប្រភពធនធានកខ្វក់របស់ឧក្រិដ្ឋជន ហើយឈានទៅដល់ការរឹបអូស ឬការបង្កកធនធានកខ្វក់ទាំងនោះ ដែលជាកិច្ចការក្នុងចំណុច IO8 ត្រូវរដ្ឋមន្រ្តីមហាផ្ទៃ ចាត់ទុកជាកិច្ចការ ដែលកម្ពុជាត្រូវបន្តធ្វើ ដើម្បីឲ្យកម្ពុជា អាចរួចផុតពីបញ្ជីប្រផេះរបស់អង្គការ FATF៕