អន្តរជាតិ
លោកស៊ី៖ អាស៊ីប៉ាស៊ីហ្វិកមិនមែនជាតំបន់ស្ថិតក្រោមឥទ្ធិពលប្រទេសណាមួយឡើយ
× ប្រធានាធិបតីចិនលោក ស៊ី ជិនភីង លើកឡើងក្នុងសេចក្ដីថ្លែងការណ៍មួយនៅថ្ងៃទី១៧ ខែសីហា ថា តំបន់អាស៊ីប៉ាស៊ីហ្វិកមិនមែនជាតំបន់ដែលស្ថិតក្រោមឥទ្ធិពលប្រទេសណាមួយឡើយ ហើយក៏មិនមែន ជាកន្លែងប្រកួតប្រជែងរវាងប្រទេសមហាអំណាចដែរ។ មេដឹកនាំចិនរូបនេះជំរុញឱ្យកិច្ចសហប្រតិ បត្តិការសេដ្ឋកិច្ចអាស៊ីប៉ាស៊ីហ្វិក (APEC) ដោះស្រាយបញ្ហាក្នុងតំបន់ និងពង្រឹងការរួមបញ្ចូលពាណិជ្ជកម្មផងដែរ។
លោក ស៊ី ជិនភីង ទៅដល់ទីក្រុងបាងកកនៅថ្ងៃទី១៧ ខែវិច្ឆិកាដើម្បីចូលរួមកិច្ចប្រជុំមេដឹកនាំ APEC ចំនួន២ថ្ងៃ ខណៈដែលនឹងមិនមានការចូលរួមពីប្រធានាធិបតីអាម៉េរិក ចូ បៃឌិន និងប្រហែលប្រធានាធិបតីរុស្ស៊ី វ្ល៉ាឌីមៀ ពូទីន ផងដែរ។ លោក ស៊ី នឹងក្លាយជាឥស្សរជនដ៏សំខាន់មួយរូបក្នុងចំណោមមេដឹកនាំដែលចូលរួមមកពីតំបន់ដែលទីក្រុងវ៉ាស៊ីនតោននិងទីក្រុងប៉េកាំងបានប្រជែងគ្នាដណ្តើមឥទ្ធិពលជាយូរមកហើយ។
អវត្តមានអាម៉េរិកធ្វើឱ្យចិនមានជំហរល្អក្នុងការលើកកម្ពស់ចក្ខុវិស័យសេដ្ឋកិច្ចនៅពេលដែលមេដឹកនាំ ប្រមូលផ្តុំគ្នាដើម្បីពិភាក្សាបញ្ហាផ្សេងៗរួមមានអតិផរណា ការប្រែប្រួលអាកាសធាតុ ការកើនឡើងតម្លៃ អាហារ និងអសន្តិសុខថាមពលជាដើម។
ថ្លែងក្នុងសេចក្ដីថ្លែងការណ៍មួយចេញផ្សាយនៅល្ងាចថ្ងៃទី១៧ ខែវិច្ឆិកាទៅកាន់កិច្ចប្រជុំកំពូលនៃថ្នាក់ដឹកនាំធុរកិច្ចរួមជាមួយនឹងកិច្ចប្រជុំកំពូល APEC ប្រធានាធិបតីស៊ីលើកឡើងដោយប្រយោលពីសកម្មភាពបង្កបញ្ហារបស់អាម៉េរិកនៅក្នុងតំបន់មានគំនិតសង្រ្គាមត្រជាក់ អនុត្តរភាព ឯកតោភាគីនិយម និងការគាំពារនិយមជាដើម។
«អាស៊ីប៉ាស៊ីហ្វិកមិនមែនជាតំបន់ដែលរងឥទ្ធិពលរបស់ប្រទេសណាមួយឡើយ ហើយក៏មិនគួរក្លាយជា ទីតាំងដែលមហាអំណាចប្រជែងគ្នានោះដែរ។ (ទីនេះ) មិនត្រូវអនុញ្ញាតឱ្យមានការប៉ុនប៉ងធ្វើសង្គ្រាម ត្រជាក់ថ្មីដោយប្រជាជនពួកយើង ឬក្នុងសម័យរបស់យើងឡើយ»។ មេដឹកនាំចិនសង្កត់ធ្ងន់បែបនេះរួច បន្តថា ការប៉ុនប៉ងណាមួយដើម្បីបង្អាក់ឬសូម្បីតែរុះរើខ្សែច្រវាក់ផ្គត់ផ្គង់ឧស្សាហកម្មក្នុងតំបន់នឹងនាំឱ្យ កិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិកឈានដល់ទីបញ្ចប់។
លោក ស៊ី ក៏បាននិយាយថា បណ្ដាប្រទេសក្នុងតំបន់គួរតែដើរតាមផ្លូវនៃការអភិវឌ្ឍប្រកបដោយសន្តិភាព ភាពបើកចំហ ការរួមបញ្ចូលគ្នា និងសាមគ្គីភាពគ្នាផងដែរ។ បន្ថែមពីនេះ ប្រឈមមុខនឹងការវិវឌ្ឍថ្មីៗ សមាជិក APEC ចាំបាច់ត្រូវទាញបទពិសោធ និងមេរៀនពីអតីតកាលឆ្លើយតបទៅនឹងបញ្ហាប្រឈមនៃសម័យកាល។
មេដឹកនាំចិន ជំរុញសមាហរណកម្មសេដ្ឋកិច្ចក្នុងតំបន់អាស៊ីប៉ាស៊ីហ្វិក ហើយអំពាវនាវឱ្យមានការខិតខំរួមគ្នាក្នុងការបំបែកមូលដ្ឋានថ្មីក្នុងការអភិវឌ្ឍនិងការកសាងតំបន់អាស៊ីប៉ាស៊ីហ្វិកដែលមានអនាគតរួមគ្នា៕
© រក្សាសិទ្ធិដោយ thmeythmey.com