លោក ឡី សុខុន មន្រ្តីគណបក្សភ្លើងទៀនខេត្តបាត់ដំបង ត្រូវតុលាការខេត្តបាត់ដំបង ប្រកាសសាលក្រម កាលពីថ្ងៃទី១៧ ខែវិច្ឆិកា ឆ្នាំ២០២២ កំណត់ឲ្យជាប់ពន្ធនាគាររយៈពេល៦ខែ ពីបទរំលោភចូលលំនៅឋាន។ នេះជាការអះអាងរបស់លោក ដួង សារ៉ាន ព្រះរាជអាជ្ញារង និងជាអ្នកនាំពាក្យអយ្យការអមតុលាការខេត្តបាត់ដំបង។
 
 

លោកព្រះរាជអាជ្ញារង ដួង សាវ៉ន បញ្ជាក់ក្នុងកិច្ចសម្ភាសជាមួយសារព័ត៌មានថ្មីៗ តាមទូរស័ព្ទ នៅថ្ងៃទី១៨ ខែវិច្ឆិកានេះ ដូច្នេះថា៖«ពុំមាន [តម្រូវឲ្យលោក ឡី សុខុន បង់ប្រាក់]ទេ។ មានត្រឹមតែការផ្តន្ទាទោសកំណត់ចំនួន៦ខែប៉ុណ្ណោះ»។ 

លោក ឡី សុខុន ត្រូវបានចោទពីបទរំលោភចូលលំនៅឋាន ដែលមានចែងក្នុងមាត្រា២៩៩នៃក្រមព្រហ្មទណ្ឌ ដោយសារអាជ្ញាធរ និងតុលាការ រកឃើញថា សកម្មភាពរបស់លោក ដែលចូលទៅថតអាជ្ញាធរដល់ក្នុងបរិវេណលំនៅឋានរបស់អ្នកដទៃដោយគ្មានការអនុញ្ញាត គឺជាការរំលោភលំឋានរបស់អ្នកដទៃ។ លោក ត្រូវចាប់ខ្លួន នៅថ្ងៃទី៨ ខែមិថុនា ឆ្នាំ២០២២ គឺ៣ថ្ងៃក្រោយនៃការបោះឆ្នោតឃុំ-សង្កាត់អាណត្តិទី៥។ លោក បានជាប់ឃុំជាង៥ខែរួចមកហើយ ដូច្នេះ បើគ្មានអ្វីប្រែប្រួល លោក នឹងត្រូវដោះលែងវិញ នៅថ្ងៃទី៩ ខែធ្នូ ឆ្នាំ២០២២។ 
 

អង្គការលីកាដូ បានផ្សព្វផ្សាយពីការរកឃើញរបស់ខ្លួនថា អាជ្ញាធរនៅរាជធានីភ្នំពេញ និងតាមបណ្តាខេត្តចំនួន បានរៀបចំតុ ក្រដាស ប៊ិច ដើម្បីចាំកត់ឈ្មោះប្រជាពលរដ្ឋ ដែលវិលមកពីបោះឆ្នោតវិញ៕