ជាតិ
ក្រសួងអប់រំ មិនតម្រូវឱ្យបេក្ខជនធ្វើតេស្តរកកូវីដ-១៩ មុនពេលប្រឡងឡើយ លោក ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា
× ភ្នំពេញ៖ ក្រសួងអប់រំ យុវជន និងកីឡា នឹងរៀបចំការប្រឡងសញ្ញាបត្រមធ្យមសិក្សាទុតិយភូមិឆ្នាំសិក្សា ២០២១-២០២២ នៅថ្ងៃទី៥-៦ ធ្នូខាងមុខ ។ សម្រាប់ឆ្នាំនេះ ក្រសួងអប់រំ មិនតម្រូវឱ្យបេក្ខជនធ្វើតេស្តរកមេរោគកូវីដ-១៩ មុនមួយថ្ងៃនៃការប្រឡងឡើយ។ បើតាមលោក ហង់ជួន ណារ៉ុន សិស្សកើតជំងឺកូវីដ-១៩ នឹងត្រូវប្រឡងនៅក្នុងបន្ទប់ពិសេស ដែលក្រសួងបានរៀបចំ។
ក្រសួងអប់រំ យុវជន និងកីឡា មិនតម្រូវឱ្យបេក្ខជនធ្វើតេស្តរកមេរោគកូវីដ-១៩ ឡើយ ពោលគឺបេក្ខជនអាចចូលប្រឡងបាន ដោយគ្រាន់តែពាក់ម៉ាស់ឱ្យបានជាប្រចាំក្នុងពេលប្រឡង។ ក្នុងសន្និសីទសារព័ត៌មានស្ដីពីដំណើរការប្រឡងសញ្ញាបត្រមធ្យមសិក្សាទុតិយភូមិ នៅព្រឹកថ្ងៃទី២១ វិច្ឆិកានេះ លោក ហង់ជួន ណារ៉ុន រដ្ឋមន្រ្តីក្រសួងអប់រំ លើកឡើងដូច្នេះ៖ «ក្នុងការប្រឡងលើកនេះ គឺក្រសួងអនុវត្តទៅតាមស្ដង់ដាប្រតិបត្តិការរបស់ក្រសួងនៅក្នុងការគ្រប់គ្រងជំងឺកូវីដ គឺមានន័យថា យើងនឹងមិនមានការធ្វើតេស្តមួយថ្ងៃមុនទេ។ ប៉ុន្តែក្រសួងអំពាវនាវសូមឱ្យបេក្ខជនទាំងអស់ត្រួតពិនិត្យមើលសុខភាពដោយខ្លួនឯង ប្រសិនបើមានអាការៈមិនស្រួល សូមធ្វើតេស្តជាមុន និងជូនដំណឹងមកក្រសួង។ ក្រសួងនឹងរៀបចំបន្ទប់ពិសេស សម្រាប់បេក្ខជនចូលប្រឡងបាន»។
បើតាមលោក ហង់ជួន ណារ៉ុន ការរៀបចំបន្ទប់ពិសេសសម្រាប់បេក្ខជនមានជំងឺកូវីដ-១៩ គឺដើម្បីបង្ការហានិភ័យដល់បេក្ខជនផ្សេងទៀត។ ជាមួយគ្នានេះ បេក្ខជនចូលរួមប្រឡងទាំងអស់ ត្រូវពាក់ម៉ាស់ជាប្រចាំ ដើម្បីបន្តការពារសុវត្ថិភាព។
សូមបញ្ជាក់ថា ការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ៥ ធ្នូ ២០២២នេះ មានបេក្ខជនប្រឡងចំនួន ១២៨ ១៣៤នាក់ និងមានមណ្ឌលប្រឡង ២២១ ស្មើនឹង៥១៧៤បន្ទប់។ សម្រាប់ថ្ងៃប្រកាសលទ្ធផល ក្រសួងអប់រំ កំណត់យកថ្ងៃទី ២៧ ធ្នូសម្រាប់រាជធានីភ្នំពេញ និងខេត្តកណ្ដាល និងថ្ងៃទី២៨ ធ្នូ សម្រាប់ខេត្តផ្សេងៗ៕
Tag:
អប់រំ
បាក់ឌុប
សញ្ញាបត្រមធ្យមសិក្សាទុតិយភូមិ
© រក្សាសិទ្ធិដោយ thmeythmey.com