បញ្ជាការដ្ឋានកងទ័ពពិសេសនៃកងទ័ពជើងគោកកម្ពុជា និងកងទ័ពខេត្តបិញយឿងនៃប្រទេសវៀតណាម បានចងសម្ព័ន្ធមេត្រីភាពជាមួយគ្នា។ ពិធីចងសម្ព័ន្ធមេត្រីភាពនេះ ត្រូវបានរៀបចំឡើង កាលពីថ្ងៃទី១៩ ខែវិច្ឆិកា ឆ្នាំ២០២២ ក្រោមអធិបតីភាពរបស់ឧត្តមសេនីយ៍ឯក ខឹម ជាសាឃឿន មេបញ្ជាការរងនៃបញ្ជាការដ្ឋានកងទ័ពជើងគោកកម្ពុជា។

 

លោក ខឹម ជាសាឃឿន មើលឃើញថា ការចងសម្ព័ន្ធមេត្រីភាពរវាងបញ្ជាការដ្ឋានកងទ័ពពិសេសកម្ពុជា និងកងទ័ពខេត្តបិញយឿងរបស់វៀតណាម នឹងផ្តល់ឱកាសឲ្យភាគីទាំង២ បានជួយគ្នាទៅវិញទៅមកលើគ្រប់វិស័យ ដោយផ្អែកលើមិត្តភាព សាមគ្គីភាព និងកិច្ចសហប្រតិបត្តិការយូរអង្វែង។ លោក លើកឡើងថា វៀតណាម តែងឧបត្ថម្ភគាំទ្រទាំងស្មារតី សម្ភារៈ ថវិកា និងការបណ្តុះបណ្តាលធន់ធានមនុស្សដល់កងទ័ពកម្ពុជា ហើយក្នុងការសម្ព័ន្ធមេត្រីភាពនេះ លោក សង្ឃឹមថា វៀតណាម ជាពិសេសបញ្ជាការដ្ឋានកងទ័ពខេត្តបិញយឿង នឹងបន្តជួយដល់កងទ័ពកម្ពុជាទៀត។ 

 

លោកឧត្តមសេនីយ៍ឯក ចាប ភក្តី មេបញ្ជាការនៃបញ្ជាការដ្ឋានកងទ័ពពិសេសកម្ពុជា ថ្លែងថា ការចងសម្ព័ន្ធមេត្រីភាពរវាងបញ្ជាការដ្ឋានទ័ពពិសេសកម្ពុជា ជាមួយបញ្ជាការដ្ឋានកងទ័ពខេត្តបិញយឿង ឆ្លុះបញ្ចាំងឲ្យឃើញពីចំណងសាមគ្គីភាព មិត្តភាព និងកិច្ចសហប្រតិបត្តិការលើគ្រប់វិស័យរវាងកម្ពុជា-វៀតណាម។ ចំណែក លោកវរសេនីយ៍ឯក ង្វៀន ហ័ងមិញ មេបញ្ជាការនៃបញ្ជាការដ្ឋានកងទ័ពខេត្តបិញយឿង អះអាងថា បញ្ជាការដ្ឋានកងទ័ពខេត្តបិញយឿង បានចងសម្ព័ន្ធមេត្រីភាពជាមួយកងឯកភាពចំណុះចំនួន៧ នៃកងយោធពលខេមរភូមិន្ទ (កម្ពុជា) ដើម្បីរឹតចំណងសាមគ្គី មិត្តភាព និងបង្កើនភាពជឿជាក់លើគ្នាទៅវិញទៅមក។ 

 

ក្នុងពិធីខាងលើ បញ្ជាការដ្ឋានកងទ័ពពិសេសកម្ពុជា និងបញ្ជាការដ្ឋានកងទ័ពខេត្តបិញយឿងនៃប្រទេសវៀតណាម បានចុះហត្ថលេខាលើពិធីសារស្តីពីកិច្ចសហការជួយទៅវិញទៅមកនៅគ្រប់កាលៈទេសៈ៕