ថ្លែងក្នុងសេចក្ដីថ្លែងការណ៍មួយ ផ្សព្វផ្សាយដោយទីភ្នាក់ងារព័ត៌មានកណ្ដាលកូរ៉េខាងជើង (KCNA) លោកស្រី គីម យ៉ូចង រិះគន់កិច្ចពិភាក្សារបស់ UNSC ថា លម្អៀងចំពោះកូរ៉េខាងជើង ខណៈ​មិន​មើល​ពីការគំរាមកំហែងរបស់អាម៉េរិក និងសម្ព័ន្ធមិត្ត លើកូរ៉េខាងជើងអ្វីសោះ។

 

«UNSC បានធ្វើមើលមិនឃើញពីសមយុទ្ធយោធាដ៏គ្រោះថ្នាក់របស់អាម៉េរិក និងកូរ៉េខាងត្បូង និង​ព្រម​ទាំងការបង្កើនអាវុធដ៏លោភលន់របស់ពួកគេ ដោយមានគោលបំណងលើកូរ៉េខាងជើង ហើយ​ទាញ​យក​បញ្ហាជាមួយការតេស្តរបស់កូរ៉េខាងជើង ដែលមានសិទ្ធិមិនអាចរំលងបានក្នុងការការពារខ្លួន និងឆ្លើយតប»។ លោកស្រី គីម សង្កត់ធ្ងន់បែបនេះ រួចបន្តថា សកម្មភាពរបស់ UNSC បែបនេះ​ បង្ហាញ​ពី​ភាព​ជាក់​ស្តែង​នៃ​ការ​អនុវត្ត​ស្តង់ដារ​ពីរ។ 
 

ប្អូនស្រីមេដឹកនាំគីមព្រមានថា កូរ៉េខាងជើងនឹងប្រឆាំងដាច់ណាត់បំផុត ប្រសិនបើនរណាម្នាក់ បង្កាច់​បង្ខូចការអនុវត្តសិទ្ធិការពារខ្លួន។ លោកស្រីក៏ប្រាប់អាម៉េរិកចំៗថា ទោះបីជាព្យាយាម​រំសាយ​អាវុធ​កូរ៉េ​ខាងជើង យ៉ាងណាក៏ដោយ ក៏មិនអាចដកហូតសិទ្ធិការពារខ្លួនបានដែរ។ ជាចុងក្រោយ ​លោក​ស្រី​ គំរាម​ក្រុងវ៉ាស៊ីនតោនថា ការណ៍ដែលអាម៉េរិក ប្រឆាំងកូរ៉េខាងជើង នឹងទទួលលទ្ធផលប្រឈម​ នឹង​វិបត្តិ​សន្តិសុខកាន់តែ​ធ្ងន់ធ្ងរ។
 

គួរបញ្ជាក់ថា អាម៉េរិក និងសម្ព័ន្ធមិត្តរបស់ខ្លួនបានថ្កោលទោសយ៉ាងដាច់អហង្ការ ចំពោះការ​សាក​ល្បង​នាពេលថ្មីៗនេះ របស់កូរ៉េខាងជើង ក្នុងអំឡុងកិច្ចប្រជុំបន្ទាន់ UNSC នៅថ្ងៃទី២១ ខែវិច្ឆិកា។ ទោះ​បី​ជា​យ៉ាងណា UNSC មិនបានចាត់វិធានការណាមួយ ជា​ការឆ្លើយតបទៅ​នឹង​កូរ៉េខាងជើង​ ដោយសារ​តែ​ការ​ប្រឆាំងពីរុស្ស៊ី និងចិន។
 

ជាមួយគ្នានោះ រដ្ឋមន្ត្រីការបរទេសកូរ៉េខាងជើង បានហៅអគ្គលេខាធិការអង្គការសហប្រជាជាតិ (UN) លោក អាន់តូនីញ៉ូ ហ្គូតេរ៉េស ជាអាយ៉ងរបស់អាម៉េរិក សម្រាប់ការចូលរួមក្នុងការថ្កោលទោសការ បាញ់មីស៊ីលនេះ៕