ប្រធានាធិបតីតៃវ៉ាន់លោកស្រី Tsai Ing-wen នឹងត្រូវចប់អាណត្តិនៅឆ្នាំ២០២៤ខាងមុខ ហើយមិនអាចឈរឈ្មោះជាប្រធានាធិបតីម្តងទៀតបានទេ ដោយសារជាប់ឆ្នោតពីរអាណត្តិរួចមកហើយ។ កាលពីឆ្នាំ ២០២០ កន្លងទៅ លោកស្រីបានជាប់ឆ្នោតជាថ្មីដោយភ្លូកទឹកភ្លូកដី ក្រោយសន្យាដើម្បីក្រោកឈរឡើងប្រឈមមុខនឹងចិន ការពារសេរីភាព និងលទ្ធិប្រជាធិបតេយ្យរបស់តៃ​វ៉ាន់​​។
 

តៃវ៉ាន់នៅថ្ងៃទី២៦ ខែវិច្ឆិកាខាងមុខនឹងរៀបចំការបោះឆ្នោតសម្រាប់ការជ្រើសរើសអភិបាលក្រុង ចៅហ្វាយស្រុក និងក្រុមប្រឹក្សាមូលដ្ឋាន។

ក្នុងយុទ្ធនាការបោះឆ្នោតនេះដែរ លោកស្រី Tsai ក៏បានលើយកបញ្ហាជាមួយចិនដែលចាត់ទុកតៃវ៉ាន់ជាទឹកដីរបស់ខ្លួន និងបង្កើនសម្ពាធយោធាមកនិយាយផងដែរ។ ក្នុងសារវីដេអូមួយនៃយុទ្ធនាការបោះឆ្នោតនេះ លោកស្រី Tsai លើកឡើងថា ការបោះឆ្នោតសម្រាប់បេក្ខភាពរបស់គណបក្សប្រជាធិបតេយ្យជឿនលឿន (DPP) ស្មើនឹងការបោះឆ្នោតជូនលោកស្រីដែរ។
 

«​ប្រសិន​អ្នក​មិន​ទាន់​សម្រេច​ថា​តើ​បេក្ខជន​ចៅសង្កាត់​ណាដែលអ្នក​ត្រូវ​បោះឆ្នោតឱ្យទេ សូមបោះឆ្នោត​ឱ្យ​បេក្ខជន​ដែល​ខ្ញុំ​ណែនាំ​»​។ លោកស្រី Tsai បានលើកឡើងបែបនេះ។ ទន្ទឹមនឹងនេះ លោកស្រីក៏បានថ្លែងអំណរគុណដល់ពលរដ្ឋដែលបានផ្តល់ការគាំទ្រដល់លោកស្រី។ លោកស្រីក៏បានបន្ថែមថា លោកស្រីនឹងមានការខុសត្រូវខ្ពស់ចំពោះតៃវ៉ាន់ ក្នុងការឈានជើងយ៉ាងរឹងមាំលើឆាកអន្តរជាតិ ហើយប្តេជ្ញារក្សាសន្តិភាព និងស្ថិរភាពនៅទូទាំងច្រកសមុទ្រតៃវ៉ាន់។
 

យ៉ាងណាមិញ សមាជិកជាន់ខ្ពស់នៃគណបក្សប្រឆាំងនៅតៃវ៉ាន់គណបក្ស Kuomintang (KMT) និងជាអតីតប្រធានាធិបតីតៃវ៉ាន់លោក Ma Ying-jeou បានលើកឡើងថាការបោះឆ្នោតឱ្យគណកប្ស DPP និងធ្វើឱ្យតៃវ៉ាន់ប្រឈមនឹងសង្រ្គាម។ 
 

ការបោះឆ្នោតនេះ កើតឡើងនៅមួយខែបន្ទាប់ពីការបញ្ចប់សមាជលើកទី២០ នៃបក្សកុម្មុយនិស្តចិនដែលលោក ស៊ី ជិនភីងទទួលបានអាណត្តិទីបីក្នុងការដឹកនាំប្រទេស។ ចិនក្នុងខែ​សីហាកន្លងទៅ ក៏បានធ្វើសមយុទ្ធយោធាជិត​កោះ​តៃវ៉ាន់ ដើម្បី​បង្ហាញពីការ​ខឹង​សម្បារ​របស់​ខ្លួន​ក្នុង​ដំណើរ​ទស្សនកិច្ច​ទៅ​ក្រុង​តៃប៉ិ​របស់ប្រធានសភាអាម៉េរិក Nancy Pelosi៕