ក្រុមអាស៊ី អ៊ីរ៉ង់ និងកាតា រួមជាមួយក្រុមអាហ្វ្រិកសេណេហ្កាល់ សុទ្ធតែត្រូវការពិន្ទុដាច់ខាតនៅជំនួបទី២ បន្ទាប់ពីខកចិត្តនៅជំនួបបើកឆាករៀងខ្លួន។ ក្នុងចំណោមក្រុមទាំង៣ ក្រុមណាបន្តចាញ់នៅជំនួបទី២នេះ នឹងត្រូវហាលអាវដោយស្វ័យប្រវត្តិតែម្តង។
 

ក្រោយចាញ់អង់គ្លេសនៅជំនួបដំបូងដោយលទ្ធផល ៦-២ រួចមក អ៊ីរ៉ង់ ត្រូវបន្តជួបវេលស៍ នៅជើងទី២ពូល B នាកីឡដ្ឋាន Ahmad bin Ali។ ជំនួបបើកឆាករបស់វេលស៍ ស្មើអាម៉េរិក ១-១។ ដោយឡែកអាម៉េរិក នឹងត្រូវបន្តជួយក្រុមខ្លាំងតោកំណាចអង់គ្លេសដែលកំពុងឈរកំពូលតារាងពូល B។
 

ដោយឡែកនៅពូល A ម្ចាស់ផ្ទះកាតាដែលរងការខកចិត្តនៅជំនួបដំបូងក្រោមថ្វីជើងអេក្វាទ័រក្នុងលទ្ធផល ២-០ ត្រូវស្តាមុខមាត់ឡើងវិញជាមួយសេណេហ្កាល់ដែលត្រូវការពិន្ទុចាំបាច់ដូចគ្នា។ សេណេហ្កាល់ ចាញ់ហូឡង់ ២-០ កាលពីជំនួបបើកឆាក។
 

ហូឡង់ក្រុមឈរកំពូលតារាងពូល A បណ្តោះអាសន្ន ត្រូវបន្តជួបក្រុមអេក្វាទ័រដែលឈរលេខ២។ ចំណោមក្រុមទាំងពីរ ក្រុមណាអាចរកបាន៣ពិន្ទុបន្ថែម នឹងទទួលបានកៅអីស្វ័យប្រវត្តិទៅកាន់វគ្គខ្វែងតែម្តង៕