លោក ឃៀង យិង បានបញ្ជាក់ថា ការសាងសង់ផ្លូវ និងអភិវឌ្ឍឃុំអណ្ដូងទឹក គឺមានការចូលរួមច្រើន ពីប្រជាពលរដ្ឋ និង​ស្ថាប័នដែលពាក់ព័ន្ធ។​ លោក យិង បន្តថា នៅឆ្នាំ២០២២ជិតដាច់ចូលឆ្នាំ២០២៣ ដូច្នេះខាងឃុំ នឹងបន្តអភិវឌ្ឍផ្លូវបន្តទៀត ដើម្បីបំពេញតម្រូវការនៃការធ្វើដំណើររបស់ប្រជាពលរដ្ឋនៅក្នុងសហគមន៍។ 


 

«ស្ថានភាពផ្លូវបច្ចុប្បន្នខូចច្រើន នៅតាមបណ្តាភូមិនីមួយៗ ដោយសារអាកាសធាតុនៅរដូវវស្សាមានភ្លៀងធ្លាក់ច្រើន ទើបធ្វើឱ្យមានផ្លូវខូចខាតខ្លាំងនៅតាមភូមិ»។ លោក ឃៀង យិង លើកឡើងដូច្នេះ រួចបន្ថែមថា កត្តាយានយន្តធំៗ បានបើកបរលើផ្លូវលំ ទើបបណ្ដាលឱ្យខូចផ្លូវ ពលរដ្ឋពិបាកក្នុងការធ្វើដំណើរប្រកបមុខរបររកស៊ីប្រចាំថ្ងៃ ពិសេសស្ត្រីមានផ្ទៃពោះ ជនពិការ និងសិស្សសាលាជាដើម។
 

លោកមេឃុំបន្ថែមថា បច្ចុប្បន្នក្នុងឃុំអណ្ដូងមានផ្លូវចំនួន ២ខែ្ស ដែលពុំទាន់បានជួសជុលគឺ ផ្លូវនៅភូមិអណ្ដូងទឹក និងភូមិជីមាល។ ជុំវិញការសាងសង់ផ្លូវក្នុងឆ្នាំ២០២២ និងឆ្នាំ២០២៣ អាជ្ញាធរឃុំ មានគម្រោងសាងសង់ផ្លូវ ២ខ្សែបន្តទៀត ដើម្បីឱ្យប្រជាពលរដ្ឋងាយស្រួលក្នុងការធ្វើដំណើរ។ លោក យិង បន្តថា សម្រាប់គម្រោងបានដេញថ្លៃជាមួយក្រុមហ៊ុនរួចហើយ គឺចំណាយថវិកាប្រមាណជាង ១០០លានដុល្លារ សម្រាប់សាងសង់ផ្លូវបេតុង និងជាង ៤០លានដុល្លារ សម្រាប់សាងសង់ផ្លូវក្រួសក្រហមប្រវែង ៥០០ម៉ែត្រ។ 
 

មេឃុំរូបនេះ បន្ថែមថា ចំពោះសមិទ្ធផលដែលបានធ្វើកន្លងមក គឺនៅភូមិអណ្ដូងទឹកបានជួសជុលផ្លូវចំនួន ៧ខ្សែ។ នៅឆ្នាំ២០២១ បានចាក់បេតុង​ ២ខ្សែ គឺខ្សែទី១ នៅភូមិជីត្រេះ មានប្រវែង ៥០០ម៉ែត្រ ជាជំនួយរបស់រដ្ឋាភិបាលជប៉ុន និងខ្សែទី២ មានប្រវែងប្រមាណ ២០ ម៉ែត្រ ជាជំនួយរបស់មន្ទីរអភិវឌ្ឍន៍ជនបទ៕

 

អានអត្ថបទពាក់ព័ន្ធផ្សេងទៀត៖ យុវជនសកម្ម សេវាល្អ