ព័រទុយហ្កាល់រួមដំណើរជាមួយបារាំង និងប្រេស៊ីល ឆ្ពោះបន្តទៅកាន់វគ្គ១៦ក្រុមចុងក្រោយនៃព្រឹត្តិការណ៍ FIFA World Cup 2022 ក្រោយជ័យជម្នះ ២-០ លើអ៊ុយរូហ្កាយនៅកីឡដ្ឋាន Lusail ដែលសម្រេចបានដោយ Bruno Fernandes ទាំងពីរគ្រាប់។

 

Bruon Fernandes រកបានគ្រាប់បាល់ដំបូងនៅនាទី៥៤ ហើយប៉េណាល់ទីបាន១គ្រាប់ទៀត នៅនាទី បន្ថែម ក្រោយ VAR បង្ហាញឲ្យឃើញថា ខ្សែការពារអ៊ុយរូហ្កាយយកដៃប៉ះបាល់នៅតំបន់គ្រោះថ្នាក់។

 

ជ័យជម្នះដែលសម្រេចបានទាំងពីរគ្រាប់ដោយខ្សែបម្រើ Manchester United ក៏ជាការសងសឹកបានសម្រេចផងដែរ លើអ៊ុយហ្កាយ ដែលបានទម្លាក់ព័រទុយហ្កាល់ ២-១ នៅវគ្គ១៦ក្រុមចុងក្រោយ កាលពីព្រឹត្តិការណ៍ឆ្នាំ២០១៨នៅប្រទេសរុស្ស៊ី។

 

សម្រាប់ពូល H ព័រទុយហ្កាល់ឈរលេខ១ប៉ុណ្ណោះអាសន្ននៅពូល A ដោយទុកឲ្យហ្កាណា (៣ពិន្ទុ), កូរ៉េខាងត្បូង និងអ៊ុយរូហ្កាយ (១ពិន្ទុដូចគ្នា) បន្តដណ្តើមកៅអីគ្នា នាការប្រកួតចុងក្រោយក្នុងពូល។ កូរ៉េខាងត្បូងត្រូវប៉ះព័រទុយហ្កាល់ ខណៈហ្កាណា ជួបអ៊ុយរូហ្កាយ នាថ្ងៃទី២ ខែធ្នូ។

 

ក្រោយបញ្ចប់ការប្រកួតពីរជុំគ្រប់ពូល ក្រុមដែលឡើងទៅកាន់វគ្គ១៦ដោយស្វ័យប្រវត្តិមានតែ៣ក្រុមប៉ុណ្ណោះ គឺព័រទុយហ្កាល់ ប្រេស៊ីល និងបារាំង រីឯក្រុមដែលធ្លាក់ចេញ គឺម្ចាស់ផ្ទះកាតា និងកាណាដា ៕