ករណីជំងឺតម្រង់នោមស្រួចស្រាល់ បានហក់ឡើងយ៉ាងខ្លាំងនៅឥណ្ឌូណេស៊ី បើគិតចាប់តាំងពីខែសីហា ខណៈមនុស្សចំនួន ១៩៩នាក់ បានទទួលមរណភាព ដោយភាគច្រើនជាក្មេងៗ។ បញ្ហានេះ បានបង្កឱ្យមានការស៊ើបអង្កើត និងហាមឃាត់ការលក់ថ្នាំប្រភេទទឹក។ 

 

ទាក់ទិននឹងករណីនេះ គ្រួសារឥណ្ឌូណេស៊ី ដែលមានសមាជិកស្លាប់ និងធ្លាក់ខ្លួនឈឺ បានដាក់ពាក្យបណ្តឹងរួមគ្នាលើរដ្ឋាភិបាល។ ពាក្យបណ្តឹងនោះ បានផ្តោតលើក្រសួងសុខាភិបាល ទីភ្នាក់ងារថ្នាំពេទ្យ និងអាហារឥណ្ឌូណេស៊ី រួមទាំងក្រុមហ៊ុនចំនួន ៧ ពាក់ព័ន្ធការលក់ថ្នាំប្រភេទទឹក ដែលមានផ្ទុកសារធាតុប្រើប្រាស់ក្នុងឧស្សាហកម្មលើសកម្រិត។ 

 

តំណាងផ្នែកច្បាប់របស់ក្រុមគ្រួសារជនរងគ្រោះ លោក Awan Puryadi បានប្រាប់ទីភ្នាក់ងារព័ត៌មាន AFP នៅថ្ងៃទី១ ខែធ្នូថា ប្រជាជនឥណ្ឌូណេស៊ី បានចាត់វិធានការផ្នែកច្បាប់ ដោយសារតែអាជ្ញាធរបរាជ័យក្នុងការទប់ស្កាត់ការលក់ថ្នាំប្រភេទទឹក ដែលបង្កឱ្យមានហានិភ័យ រួមទាំងបង្កឱ្យមានករណីស្លាប់លើកុមារ និងធ្លាក់ខ្លួនឈឺ។ 

 

«គ្មាននរណាម្នាក់ទទួលខុសត្រូវឡើយ។ ពួកគេ (ប្រជាជន) ខកបំណងចំពោះស្ថានភាពបច្ចុប្បន្នណាស់»។ លោក​ Puryadi បានបញ្ជាក់បែបនេះ។ ពាក្យបណ្តឹង ត្រូវបានដាក់តាំងពីថ្ងៃទី១៨ ខែវិច្ឆិកា មកម្លេះ។ 

 

ក្នុងពាក្យបណ្តឹងនោះ ប្រជាជនបានទាមទាររកការទទួលខុសត្រូវ និងសំណងប្រមាណ ១២ម៉ឺនដុល្លារ សម្រាប់អ្នកស្លាប់ និងជាង ៦ម៉ឺនដុល្លារ សម្រាប់ជនរងគ្រោះធ្លាក់ខ្លួនឈឺ៕