ជាតិ
សង្គមជាតិ
សេដ្ឋកិច្ច
អាស៊ាន
កិច្ចប្រជុំអភិបាលរាជធានី/រដ្ឋធានីអាស៊ាន៖ លោក នួន ផារ័ត្ន ថាវេទិកាចែករំលែកពិសោធន៍ រួមចំណែកអភិវឌ្ឍទីក្រុង
×![]()
ដោយ: វិច្ឆិកា
លោក នួន ផារ័ត្ន អភិបាលរងរាជធានីភ្នំពេញ គឺជាអ្នកចុងក្រោយដែលធ្វើបទបង្ហាញអំពីគម្រោងអភិវឌ្ឍរាជធានីភ្នំពេញ បន្ទាប់ពីអភិបាលរាជធានី និងរដ្ឋធានីទាំង៩របស់អាស៊ាន បានបញ្ចប់បទបង្ហាញស្តីពីពិសោធន៍ និងគោលនយោបាយអភិវឌ្ឍរាជធានី និងរដ្ឋធានីរបស់ពួកគេ។
នារសៀលថ្ងៃទី២ខែធ្នូឆ្នាំ២០២២ រាជធានីភ្នំពេញ គឺជាម្ចាស់ផ្ទះរៀបចំកិច្ចប្រជុំអភិបាលរាជធានី/រដ្ឋធានីអាស៊ាន។ ថ្នាក់ដឹកនាំរាជធានី/រដ្ឋធានីអាស៊ានបានបង្ហាញអំពីគោលដៅនៃការអភិវឌ្ឍទីក្រុង ដោយមានភាពធន់ ប្រកបដោយចីរភាពដូចៗគ្នា ប៉ុន្តែទីក្រុងខ្លះក៏មានមធ្យោបាយ និងគោលនយោបាយផ្សេងគ្នា ហើយក៏មានបញ្ហាប្រឈមជាអាទិភាពដែលត្រូវដោះស្រាយដែរ។
នៅក្នុងចំណុចចុងក្រោយនៃបទបង្ហាញអំពីផែនការមេអភិវឌ្ឍរាជធានីភ្នំពេញ លោក នួន ផារ័ត្ន គូសបញ្ជាក់អំពីសារសំខាន់នៃកិច្ចប្រជុំអភិបាលរាជធានីនិងរដ្ឋធានីអាស៊ាន ដែលលោកលើកទឹកចិត្តឱ្យមានការរៀបចំកិច្ចប្រជុំនេះបន្តទៀត។ សម្រាប់លោកអភិបាលរងរាជធានីភ្នំពេញ គឺវេទិកាបែបនេះហើយដែលថ្នាក់ដឹកនាំរបស់ទីក្រុងនានាបានស្ដាប់ឮ បានរៀនសូត្រអំពីពិសោធន៍នៃការដោះស្រាយ និងកសាងទីក្រុងពីគ្នាទៅវិញទៅមក។
លោក នួន ផារ័ត្ន បាននិយាយនៅក្នុងអង្គប្រជុំយ៉ាងដូច្នេះថា៖«យើងត្រូវការការចែករំលែកច្រើន។ ហេតុដូចនេះបានជាយើងប្ដេជ្ញារៀបចំកិច្ចប្រជុំនេះឡើង។ យើងត្រូវការរៀនពីគ្នាទៅវិញទៅមក។ នៅថ្ងៃនេះ យើងបានអញ្ជើញថ្នាក់ដឹកនាំទីក្រុងនៅតាមខេត្តក្នុងប្រទេសកម្ពុជាមកច្រើនដើម្បីពួកគេបានរៀនសូត្រពីពិសោធន៍ថ្មីៗ ពីទីក្រុងផ្សេងៗនៅអាសាន។»។
លោក នួន ផារ័ត្ន បាននិយាយនៅក្នុងអង្គប្រជុំយ៉ាងដូច្នេះថា៖«យើងត្រូវការការចែករំលែកច្រើន។ ហេតុដូចនេះបានជាយើងប្ដេជ្ញារៀបចំកិច្ចប្រជុំនេះឡើង។ យើងត្រូវការរៀនពីគ្នាទៅវិញទៅមក។ នៅថ្ងៃនេះ យើងបានអញ្ជើញថ្នាក់ដឹកនាំទីក្រុងនៅតាមខេត្តក្នុងប្រទេសកម្ពុជាមកច្រើនដើម្បីពួកគេបានរៀនសូត្រពីពិសោធន៍ថ្មីៗ ពីទីក្រុងផ្សេងៗនៅអាសាន។»។
លោក នួន ផារ័ត្ន ចាប់អារម្មណ៍អំពីទស្សនទានរបស់អភិបាលរាជធានីបាងកកដែលមានផែនការធ្វើយ៉ាងណាឱ្យបាងកកក្លាយជាទីក្រុងដែលមនុស្សចង់រស់នៅ ជាជាងទីក្រុងដែលទំនើបដោយបច្ចេកវិទ្យា។ អភិបាលក្រុងបាងកកក៏បានលើកឡើងអំពីការព្យាយាមរបស់ខ្លួនដើម្បីទទួលបានជឿជាក់ និងសេចក្តីទុកចិត្តពីប្រជាជនរបស់ខ្លួនផងដែរ។
នៅក្នុងបទបង្ហាញរបស់ខ្លួន លោក នួន ផារ័ត្ន បានលើកឡើងអំពីផែនការមេរបស់រាជធានីភ្នំពេញក្នុងការប្រើប្រាស់ដី ការបង្កើតលំហបៃតង ការដោះស្រាយបញ្ហាចរាចរណ៍តាមរយៈការបង្កើតប្រព័ន្ធដឹកជញ្ជូនសាធារណៈ អភិវឌ្ឍបណ្ដាញផ្លូវ កែលម្អប្រព័ន្ធលូ និងការបំពាក់ប្រព័ន្ធបច្ចេកវិទ្យាដើម្បីគ្រប់គ្រងចរាចរណ៍ជាដើម។
នៅពេលដែលរាជធានីបាងកក និងរដ្ឋធានីណៃពីដោ លើកឡើងអំពីផែនការដាំដើមឈើ១លានដើម លោកអភិបាលរាជធានីភ្នំពេញ ក៏បានប្រាប់មិត្តភក្តិអាស៊ានផងដែរថា ភ្នំពេញរបស់លោកក៏បានលំហបៃតង ៧៥ហិកតា ដែលត្រូវបានបង្កើតផងដែរ។
ទីក្រុងគូឡាឡាំពួនៃប្រទេសម៉ាឡេស៊ីឯណោះវិញ បានសង្កត់ធ្ងន់ទៅលើការប្ដេជ្ញាចិត្តកាត់បន្ថយការបំភាយកាបូនទៅក្នុងបរិយាកាស តាមរយៈគោលនយោបាយការកាត់បន្ថយការប្រើប្រាស់រថយន្តឯកជន និងបង្កើនសេវាដឹកជញ្ជូនសាធារណៈ និងការប្រើប្រាស់ថាមពលកកើតឡើងវិញឱ្យបានកាន់តែច្រើននៅក្នុងទីក្រុង និងទីប្រជុំជន។
កិច្ចប្រជុំអភិបាលរាជធានី និងរដ្ឋធានីអាស៊ានបានបញ្ចប់ដោយការចុះហត្ថលេខាលើសេចក្តីថ្លែងការណ៍រួមភ្នំពេញដែលបង្ហាញអំពីការប្តេជ្ញាចិត្តរបស់អភិបាលរាជធានីនិងរដ្ឋធានីក្នុងការចូលរួមអភិវឌ្ឍទីក្រុងប្រកដោយកិច្ចសហការប្រតិបត្តិការគ្រប់ជ្រុងជ្រោយ ដើម្បីទីក្រុងឆ្លាត មានភាពធន់ និងមានចីរភាព៕
© រក្សាសិទ្ធិដោយ thmeythmey.com
